পশ্চিমবংগৰ বীৰভূম জিলাৰ দুটা দৰিদ্ৰ প্ৰব্ৰজিত শ্ৰমিক পৰিয়ালক বাংলাদেশলৈ বিতাড়িত, নথি-পত্ৰবিহীন অনুপ্ৰৱেশকাৰী বুলি অভিযোগ কৰা দুটা প্ৰব্ৰজিত শ্ৰমিক পৰিয়ালক ঘূৰাই আনিবলৈ কলিকতা উচ্চ ন্যায়ালয়ে দিয়া নিৰ্দেশক প্ৰত্যাহ্বান জনাই কেন্দ্ৰই উচ্চতম ন্যায়ালয়ত আবেদন কৰিছে।
প্ৰকাশিত তথ্য অনুসৰি, বিতাড়িত পৰিয়াল দুটাক চাৰি সপ্তাহৰ ভিতৰত ঘূৰাই আনিবলৈ কলিকতা উচ্চ ন্যায়ালয়ে ২৬ ছেপ্টেম্বৰত দিয়া নিৰ্দেশক প্ৰত্যাহ্বান জনাই কেন্দ্ৰই আবেদন দাখিল কৰিছে। উক্ত আদেশত উচ্চ ন্যায়ালয়ে আঠ মাহীয়া গৰ্ভৱতী সুনালী খাতুনকে ধৰি ছয়জন লোকৰ বিতাৰনৰ নিৰ্দেশ প্ৰত্যাহাৰ কৰি তেওঁলোকক ভাৰতলৈ ঘূৰাই আনিবলৈ নিৰ্দেশ দিছিল।
২২ অক্টোবৰত কেন্দ্ৰীয় গৃহ মন্ত্রালয় আৰু দিল্লী আৰক্ষীয়ে যৌথভাৱে উচ্চতম ন্যায়ালয়ত এই আদেশ প্ৰতিৰোধৰ বাবে আবেদন দাখিল কৰে। আবেদনত যুক্তি দৰ্শাইছে যে, একেধৰণৰ দুইখন আবেদন ইতিমধ্যে দিল্লী উচ্চ ন্যায়ালয়ত বিচাৰাধীন থাকোতে কলিকতা উচ্চ ন্যায়ালয়ে এই গোচৰ গ্ৰহণ কৰা ন্যায়সংগত নহয়।
উচ্চতম ন্যায়ালয়ত শুনানিৰ সময়ত অতিৰিক্ত ছলিচিটৰ জেনেৰেল অশোক কুমাৰ চক্ৰৱৰ্তীয়ে অভিযোগ উত্থাপন কৰে যে সুনালী খাতুনৰ পিতৃ ভোডু শ্বেখে সংবিধানৰ ৩২ নং অনুচ্ছেদৰ বন্দী প্ৰত্যক্ষীকৰণ (হাবিয়াছ কৰ্পাছ)ৰ অধীনত আবেদন দাখিলৰ সময়ত দিল্লী উচ্চ ন্যায়ালয়ত একেই বিষয়ৰ শুনানি চলি থকাৰ কথা গোপন কৰা হৈছিল। এই বিষয়টো আদালতৰ পৰা লুকুৱাই ৰখা হৈছে বুলিও তেওঁ মন্তব্য কৰে।
ইফালে,কলিকতা উচ্চ ন্যায়ালয়ে কেন্দ্ৰৰ পৰা বিতাড়নৰ প্ৰক্ৰিয়া সম্পৰ্কে বিস্তাৰিত তথ্য আৰু শপতনামা দাখিল কৰিবলৈ নিৰ্দেশ দিছিল। কেন্দ্ৰই শপতনামাত বিতাড়িত লোকসকল “বাংলাদেশী নাগৰিক” বুলি উল্লেখ কৰে।
প্ৰাসংগক্ৰমে মে’ মাহৰ পৰা বিজেপি শাসিত কেইবাখনো ৰাজ্যত হাজাৰোধিক বঙালী ভাষাভাষীক বিদেশী সন্দেহত আটক কৰাৰ ঘটনা চর্চা লাভ কৰিছে।
প্ৰব্ৰজিত শ্ৰমিকক গোট খুৱাই তেওঁলোকক ভাৰতীয় নাগৰিক তথা নথি-পত্ৰবিহীন অনুপ্ৰৱেশকাৰী নহয় বুলি প্ৰমাণ কৰিবলৈ কোৱা হৈছে। বহু ক্ষেত্ৰত নথিপত্ৰ থকা স্বত্বেও বহু নাগৰিকক বিদেশী ঘোষণাৰে বাংলাদেশলৈ বিতাড়িত কৰাৰো অভিযোগ উঠিছে।
সুনালী খাতুনৰ পৰিয়ালৰ দাবী অনুযায়ী, জুন মাহত দিল্লীৰ পৰা আটক কৰি সীমান্ত পাৰ হোৱাৰ বাবে বাধ্য কৰা ছয়জনৰ ভিতৰত সুনালী, তেওঁৰ স্বামী দনিছ শ্বেখ আৰু তেওঁলোকৰ আঠ বছৰীয়া কন্যা উপস্থিত আছিল। আনটো পৰিয়াল আছিল বীৰভূমৰ ৩২ বছৰীয়া ছুইটি বিবি আৰু তেওঁৰ দুজন পুত্ৰ (বয়স ৬ আৰু ১৬ বছৰ)।
এই গোচৰক লৈ এতিয়া ৰাজনৈতিক মহলতেও তীব্ৰ প্ৰতিক্ৰিয়া দেখা দিছে। মানবাধিকাৰ সংগঠনসমূহে এই ঘটনাক “আইনবহিৰ্ভূত বিতাড়ন” বুলি বৰ্ণনা কৰি কেন্দ্ৰীয় চৰকাৰৰ ভূমিকা সন্দেহজনক বুলিও মন্তব্য কৰিছে।
