পাঁচ দিন ধৰি সন্ধানহীন হৈ থকা তিতাবৰৰ এখন আগশাৰীৰ মহাবিদ্যালয়ৰ স্নাতক প্ৰথম ষান্মাসিকৰ ছাত্ৰীগৰাকীৰ ৰহস্যজনকভাৱে মৃতদেহ উদ্ধাৰ হোৱাৰ পিছত এই ঘটনাই এক নতুন মোৰ লৈছে।
অভিযোগ অনুসৰি, ছাত্ৰীগৰাকীক হত্যা কৰি মূল অভিযুক্তই নিজৰ ঘৰৰ শৌচাগাৰৰ টেংকীত পেলাই দিছিল। এই ঘটনাৰ পিছতে তথাকথিত ভণ্ড বেজ জগত সিঙৰ বহুতো কু-কাৰ্য পোহৰলৈ আহিবলৈ ধৰিছে।
এই নাৰকীয় ঘটনাৰ সৈতে জড়িত থকাৰ অভিযোগত আৰক্ষীয়ে ভণ্ড বেজ জগত সিংসহ তেওঁৰ দুই পুত্ৰ আৰু এজন ফাৰ্মাচিষ্টক গ্ৰেপ্তাৰ কৰিছে।
মূল অভিযুক্ত জগত সিঙৰ বিৰুদ্ধে আৰক্ষীয়ে PSCO আইনৰ লগতে ভাৰতীয় ন্যায় সংহিতাৰ (হত্যাকে ধৰি) কেইবাটাও গুৰুত্বপূৰ্ণ ধাৰাৰ অধীনত গোচৰ ৰুজু কৰিছে।
ছাত্ৰীগৰাকীৰ বিষয়ে জানিও আৰক্ষীক অৱগত নকৰা বাবে ফাৰ্মাচিষ্টজনৰ বিৰুদ্ধেও PSCO আইনৰ অধীনত গোচৰ ৰুজু কৰা হৈছে।
এই ঘটনাৰে জড়িত অভিযুক্তক ৰক্ষণাবেক্ষণ দিয়াৰ অভিযোগত তিতাবৰ আৰক্ষী থানাৰ ভাৰপ্ৰাপ্ত বিষয়া লক্ষ্মণ কুমাৰ দাসক ৰিজাৰ্ভ ক্ল’জ কৰা হৈছে। যোৰহাট জিলাৰ আৰক্ষী অধীক্ষক শুভ্ৰজিৎ বৰাই সদৰী কৰা মতে, তেওঁৰ বিৰুদ্ধে বিভাগীয় তদন্তও আৰম্ভ কৰা হৈছে।
ছাত্ৰীগৰাকী নিৰুদ্দেশ হোৱাৰ অভিযোগ ৭ নৱেম্বৰত উত্থাপিত হোৱাৰ পিছত আৰক্ষীয়ে তদন্ত আৰম্ভ কৰে আৰু জগত সিঙক সোধাপোছাৰ বাবে আটক কৰা হয়।
তদন্তৰ সময়ত আৰক্ষীয়ে জানিব পাৰে যে অভিযুক্ত জগত সিঙে ছাত্ৰীগৰাকীক চিকিৎসকৰ ওচৰলৈ লৈ গৈছিল আৰু এজন ফাৰ্মাচিষ্টৰ সহায় লৈছিল।
আৰক্ষীয়ে ছাত্ৰীগৰাকীৰ বন্ধু আৰু চিকিৎসকৰ সহায়ত গম পাইছিল যে যুৱতীগৰাকী ৬ৰ পৰা ৭ মাহৰ অন্তঃসত্ত্বা আছিল।
দেওবাৰে নিশা ১০ বজাত মূল অভিযুক্তজনে আৰক্ষীৰ ওচৰত সকলো স্বীকাৰ কৰে আৰু তেওঁৰ বিৱৰণৰ ভিত্তিত সোমবাৰে পুৱতি নিশা ৩.৩০ বজাৰ পৰা ৪ বজাৰ ভিতৰত অভিযুক্তৰ বাসগৃহৰ শৌচাগাৰৰ টেংকীৰ পৰা ছাত্ৰীগৰাকীৰ মৃতদেহ উদ্ধাৰ কৰা হয়।
