দিল্লীৰ লালকিল্লাৰ সমীপত সংঘটিত হোৱা বিস্ফোৰণটো আত্মঘাতী আক্ৰমণ নাছিল, বৰং এক আকস্মিক দুৰ্ঘটনা আছিল বুলি কেন্দ্ৰীয় চোৰাংচোৱা সংস্থাৰ প্ৰাৰম্ভিক তদন্তত পোহৰলৈ আহিছে। ওমৰ নবী নামৰ এজন সন্ত্ৰাসবাদীয়ে বিস্ফোৰকসমূহ সম্পূৰ্ণৰূপে প্ৰস্তুত কৰিব নোৱাৰাৰ ফলত ইয়াৰ প্ৰভাৱ ‘সীমিত’ হয়।
সূত্ৰ অনুসৰি, ফৰিদাবাদৰ এটা ভাড়াঘৰত মজুত কৰা প্ৰায় ৩,০০০ কিলোগ্ৰাম বিস্ফোৰক আৰক্ষীয়ে জব্দ কৰাৰ পিছতে ওমৰ আৰু তেওঁৰ সংগীসকলৰ মূল পৰিকল্পনা ভংগ হয়। দিল্লী-এনচিআৰ (NCR) আৰু ফৰিদাবাদত চলা সংগঠিত অভিযানে ওমৰক আতংকিত কৰি তোলে। নিজৰ সহযোগী গ্ৰেপ্তাৰ হোৱাৰ পাছত ধৰা পৰাৰ আশংকাত ওমৰে তৎক্ষণাৎ বিস্ফোৰকখিনি অন্য ঠাইলৈ স্থানান্তৰ কৰাৰ চেষ্টা আৰম্ভ কৰিছিল।
তদন্ত অনুসৰি, বিস্ফোৰকেৰে ভৰা বাহনখন স্থানান্তৰ কৰাৰ সময়তে হঠাতে বিস্ফোৰণ ঘটে, যাৰ ফলত সম্পূৰ্ণ পৰিকল্পনাটোৱেই ব্যাহত হয়। তদন্তকাৰীয়ে জনোৱা মতে, বিস্ফোৰণৰ সময়ত বাহনখন চলন্ত অৱস্থাত আছিল। গতিকে বিস্ফোৰণটো আত্মঘাতী আক্ৰমণ নাছিল ।
চোৰাংচোৱা বিভাগৰ প্ৰাথমিক মূল্যায়ন অনুসৰি, এয়া আগ্ৰাসী আক্ৰমণৰ ফল নহয়, বৰঞ্চ এক দুৰ্ঘটনাজনিত বিস্ফোৰণ। তদন্তকাৰীয়ে বিশ্বাস কৰে যে, দেশজুৰি সন্ত্ৰাসবিৰোধী অভিযান অব্যাহত থকাৰ বাবে ভাৰত এটা বৃহৎ বিপদৰ পৰা ৰক্ষা পৰিল।
তথাপিও, ওমৰ নবীৰ সৈতে জড়িত সকলো সম্ভাৱ্য নেটৱৰ্কৰ অনুসন্ধান বৰ্তমানেও চলি আছে। তেওঁ সংগ্ৰহ কৰা বিস্ফোৰক সামগ্ৰীৰ আচল উদ্দেশ্য কি আছিল, সেই সন্দৰ্ভতো তদন্ত অব্যাহত ৰাখিছে কেন্দ্ৰীয় সংস্থাই।
