ক্লাছত কথা নশুনাৰ বাবে শাস্তি হিচাপে এজন শিক্ষকে এগৰাকী পাঁচ বছৰীয়া ছাত্ৰক গছৰ ডালত বান্ধি দিয়াৰ এক চাঞ্চল্যকৰ ঘটনা পোহৰলৈ আহিছে। এই ঘটনাৰ সন্দৰ্ভত প্ৰশাসনে তদন্তৰ নিৰ্দেশ দিছে।
ছত্তীশগড়ৰ সূৰ্যপুৰত সংঘটিত হৈছে এই অমানৱীয় কাণ্ড। অভিযোগ অনুসৰি, ক্লাছত অনুশাসন ভংগ কৰা আৰু কথা নশুনাৰ বাবে এজন শিক্ষকে ছাত্ৰজনক এনেদৰে শাস্তি দিছিল। তাৰ পিছতেই এটা ভিডিঅ’ সামাজিক মাধ্যমত ভাইৰেল হৈছে, য’ত এজোপা গছত বান্ধি ৰখা এটা কণমানি শিশুক দেখা যায় (এই ভিডিঅ’টোৰ সত্যতা পৰীক্ষা কৰা হোৱা নাই)। ঘটনাটো পোহৰলৈ অহাৰ লগে লগে শিক্ষকৰ এই ‘অমানৱীয় আচৰণ’ক লৈ প্ৰশ্ন উত্থাপন হৈছে।
সূৰ্যপুৰৰ বিদ্যালয় পৰিদৰ্শক (ডি ই অ‘) অজয় মিশ্ৰই জনোৱা মতে, সোমবাৰে এই ভিডিঅ’ পোহৰলৈ আহিছে। বিষয়টো লক্ষ্য কৰিবলৈ শিক্ষা বিভাগৰ এটা প্ৰতিনিধি দল বিদ্যালয়খনলৈ গৈছিল। প্ৰাৰম্ভিক প্ৰতিবেদনৰ ভিত্তিত বিদ্যালয় কৰ্তৃপক্ষলৈ কাৰণ দৰ্শোৱাৰ জাননী প্ৰেৰণ কৰা হৈছে।
অৱশ্যে, বিদ্যালয়খনৰ পৰিচালক সুভাষ শিৱহাৰে শিক্ষকজনক সমৰ্থন জনাইছে। তেওঁ দাবী কৰে, “এই কাণ্ড সংঘটিত হোৱাৰ সময়ত মই স্কুলত নাছিলোঁ। কিন্তু শিক্ষকে কেৱল শিশুটিক ভয় খুৱাব বিচাৰিছিল। শিশুটিয়ে ক্লাছত বহুত হুলস্থুল কৰিছিল আৰু আন ল’ৰা-ছোৱালীকো মাৰপিট কৰিছিল। বাৰে বাৰে সতৰ্কবাণী দিয়াৰ পিছতো সি কথা শুনা নাছিল। গতিকে তাক অনুশাসন শিকোৱাৰ প্ৰয়োজন আছিল।”
