ৰান্ধনীঘৰত পিয়াজ আৰু নহৰু অবিহনে সোৱাদযুক্ত খাদ্য প্ৰস্তুত কৰাটো প্ৰায় অসম্ভৱ। কিন্তু এই দুয়োবিধ সামগ্ৰী ব্যৱহাৰ কৰাৰ পাছত হাতত এটা তীব্ৰ দুৰ্গন্ধ ৰৈ যায় যিটো সহজে আঁতৰিব নিবিচাৰে। বাৰে বাৰে চাবোনেৰে হাত ধোৱাৰ পাছতো বহু সময়লৈকে এই গোন্ধ ৰৈ যোৱাৰ বাবে বহুতৰে ওচৰত অপ্ৰস্তুত হ’বলগীয়া হয়। যদি আপুনিও এই সমস্যাৰ পৰা পৰিত্ৰাণ পাব বিচাৰে তেন্তে পাকঘৰতে থকা কিছুমান সহজ সামগ্ৰী ব্যৱহাৰ কৰি ইয়াৰ পৰা মুক্তি পাব পাৰে।
হাতৰ পৰা পিয়াজ আৰু নহৰুৰ গোন্ধ আঁতৰাবলৈ নেমুৰ ৰস অতি কাৰ্যকৰী। নেমুত থকা চাইট্ৰিক এচিডে যিকোনো ধৰণৰ দুৰ্গন্ধ নিমিষতে নাশ কৰিব পাৰে। ইয়াৰ বাবে এটা নেমু কাটি তাৰ ৰস উলিয়াই দুয়োখন হাতত ভালদৰে ঘঁহি লওক। প্ৰায় এমিনিটমান সময় ৰাখি ঠাণ্ডা পানীৰে ধুই পেলালে গোন্ধটো একেবাৰে নোহোৱা হৈ যায়। ইয়াৰ উপৰিও নেমুৰ ব্যৱহাৰে আপোনাৰ হাতৰ ছালখন উজ্জ্বল কৰি তোলাতো সহায় কৰে।
বেকিং চোডাৰ সহায়তো আপুনি এই সমস্যাৰ সমাধান কৰিব পাৰে। অলপমান বেকিং চোডাত পানী মিহলাই এটা মিশ্ৰণ তৈয়াৰ কৰি লওক আৰু স্ক্ৰাবৰ দৰে হাতত ৩০ ছেকেণ্ডমান ঘঁহক। ইয়াৰ ফলত হাতৰ পৰা কেৱল দুৰ্গন্ধই আঁতৰি নাযায় বৰঞ্চ ছালৰ মৃত কোষবোৰো পৰিষ্কাৰ হয়। আন এক আচৰিত কৌশল হৈছে ষ্টেইনলেছ ষ্টীলৰ ব্যৱহাৰ। নহৰু আৰু পিয়াজত থকা ছালফাৰৰ অণুবোৰ আঁতৰাবলৈ এটা ষ্টীলৰ পাত্ৰত ঠাণ্ডা পানী লৈ তাত হাত দুখন কিছু সময় ডুবাই ৰাখিলে সুফল পোৱা যায়।
কফি আৰু ছেনিটাইজাৰৰ জৰিয়তেও আপুনি এই দুৰ্গন্ধৰ পৰা হাত সাৰিব পাৰে। ৰন্ধা-বঢ়াৰ কাম শেষ হোৱাৰ পিছত হাতত অলপ কফি পাউদাৰ লৈ ভালদৰে ঘঁহিলে মাত্ৰ দুমিনিটৰ ভিতৰতে গোন্ধ নাইকিয়া হয়। একেদৰে এলকহলযুক্ত ছেনিটাইজাৰ হাতত লগালেও ইয়াৰ তীব্ৰ গোন্ধৰ পৰা মুক্তি পাব পাৰি। অৱশ্যে যদি আপুনি এইবোৰ ঝামেলাৰ পৰা বাচি থাকিব বিচাৰে তেন্তে নহৰু আৰু পিয়াজ কটাৰ সময়ত হাতত গ্ল’ভছ পিন্ধি লোৱাটোৱেই আটাইতকৈ উত্তম উপায়।
