সদৌ অসম ছাত্ৰ সন্থাৰ মজিয়াৰ পৰা দুৰ্ভাগ্যজনক পৰিস্থিতিত অব্যাহতি লোৱাৰ পাছত শংকৰজ্যোতি বৰুৱাই নিজৰ ৰাজনৈতিক ইনিংছ আৰম্ভ কৰাৰ বাবে ব্যাপক প্ৰস্তুতি চলাইছিল। বিশেষকৈ নিজৰ গৃহ সমষ্টি দুলীয়াজানত তেওঁ যোৱা কিছুদিন ধৰি বিভিন্ন সামাজিক কাম-কাজত সক্ৰিয় হৈ পৰা পৰিলক্ষিত হৈছিল। কোনো দলত আনুষ্ঠানিকভাৱে যোগদান নকৰিলেও তেওঁৰ এই তৎপৰতাই স্পষ্ট কৰি দিছিল যে তেওঁ আগন্তুক নিৰ্বাচনৰ বাবে কুজকাৱাজ আৰম্ভ কৰিছে। চৰ্চা অনুসৰি তেওঁ প্ৰথমে শাসকীয় বিজেপি আৰু আৰ এছ এছৰ নেতৃত্বৰ সৈতেও যোগাযোগ কৰিছিল যদিও তাৰ পৰা কোনো সেউজ সংকেত লাভ নকৰিলে। অৱশেষত সকলো জল্পনা-কল্পনাৰ অন্ত পেলাই শনিবাৰে তেওঁ কংগ্ৰেছত যোগদান কৰিবলৈ সাজু হৈছিল যদিও শেষ মুহূৰ্তত দলটোৰ ভিতৰচৰাতে লাগিল কেনা।
শংকৰজ্যোতি বৰুৱাক কংগ্ৰেছত অন্তৰ্ভুক্ত কৰাক লৈ দলটোৰ শীৰ্ষ পৰ্যায়ৰ পৰা আৰম্ভ কৰি তৃণমূল পৰ্যায়লৈকে তীব্ৰ বিৰোধিতাৰ সৃষ্টি হৈছে। দুলীয়াজান সমষ্টিৰ মণ্ডল কংগ্ৰেছ আৰু জিলা কংগ্ৰেছৰ একাংশ নেতা-কৰ্মীয়ে তেওঁৰ যোগদানৰ বিৰুদ্ধে সৰৱহৈ উঠিছে। ইয়াৰ মূল কাৰণটো হ’ল দুলীয়াজান সমষ্টিত কংগ্ৰেছৰ টিকটৰ প্ৰবল দাবীদাৰ ধ্ৰুৱজ্যোতি গগৈ। ধ্ৰুৱজ্যোতি গগৈৰ সমৰ্থনত দলটোৰ বহুতো জ্যেষ্ঠ নেতা থকাৰ বাবে শংকৰজ্যোতিয়ে দলত সোমালে ধ্ৰুৱজ্যোতিৰ ৰাজনৈতিক ভৱিষ্যত সংকটত পৰাৰ সম্ভাৱনা আছে। এনে পৰিস্থিতিত দলটোৰ ভিতৰৰ বাধাৰ বাবে শংকৰজ্যোতিয়ে কংগ্ৰেছত যোগদানৰ সিদ্ধান্তৰ পৰা ১০ খোজ পিছুৱাই যাবলৈ বাধ্য হয়। এই বিবাদৰ খবৰ ৰাজহুৱা হোৱাৰ পিছতে তেওঁ ছচিয়েল মিডিয়াযোগে স্পষ্ট কৰি দিছে যে বৰ্তমান তেওঁৰ কোনো ৰাজনৈতিক দলত যোগদানৰ সিদ্ধান্ত নাই আৰু ভৱিষ্যতে তেনে সিদ্ধান্ত ল’লে নিজেই জনাই দিব।
অকল শংকৰজ্যোতি বৰুৱাই নহয়, শেহতীয়াকৈ আমছুৰ পৰা বিদায় লোৱা ৰেজাউল কৰিম সৰকাৰৰ কংগ্ৰেছত যোগদানক লৈও অনুৰূপ সমস্যাৰ সৃষ্টি হৈছে। বঙাইগাঁও জিলা কংগ্ৰেছ আৰু সৃজনগ্ৰাম মণ্ডল কংগ্ৰেছে ৰেজাউল কৰিম সৰকাৰৰ যোগদানৰ তীব্ৰ বিৰোধিতা কৰিছে। জিলা কংগ্ৰেছৰ তৰফৰ পৰা প্ৰদেশ কংগ্ৰেছলৈ প্ৰেৰণ কৰা পত্ৰত অভিযোগ কৰা হৈছে যে সৃজনগ্ৰাম সমষ্টিত তেওঁৰ কোনো গণভিত্তি নাই। তদুপৰি লোকসভা নিৰ্বাচনৰ সময়ত তেওঁ কংগ্ৰেছ প্ৰাৰ্থীৰ বিৰুদ্ধে কাম কৰাৰো গুৰুতৰ অভিযোগ উত্থাপন হৈছে। দলৰ স্থানীয় নেতা-কৰ্মীসকলে এনে নেতাক দলত গ্ৰহণ কৰাৰ কোনো প্ৰয়োজন নাই বুলি স্পষ্ট কৰি দিয়াত ৰেজাউল কৰিম সৰকাৰৰ ৰাজনৈতিক ভৱিষ্যতো এতিয়া অনিশ্চয়তাৰ মাজত সোমাই পৰিছে।
