হাফলং সমষ্টিৰ প্ৰাক্তন বিধায়ক তথা অৱসৰপ্ৰাপ্ত ভাৰতীয় প্ৰশাসনিক সেৱাৰ বিষয়া (আই এ এছ) বীৰ ভদ্ৰ হাগজেৰ দেহাৱসান ঘটিছে।
সোমবাৰে গুৱাহাটী চিকিৎসা মহাবিদ্যালয় হাস্পাতালত তেওঁ শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৭৫ বছৰ।
হাগজেৰ ২০১৬ চনত হাফলং সমষ্টিক প্ৰতিনিধিত্ব কৰি অসম বিধানসভালৈ নিৰ্বাচিত হৈছিল। বিধায়ক হিচাপে তেওঁ সমষ্টিৰ জনসাধাৰণৰ সেৱাত ব্ৰতী আছিল। তেওঁ পূৰ্বে কংগ্ৰেছ দলত আছিল যদিও পিছত বিজেপিত যোগদান কৰে।
এগৰাকী আই এ এছ বিষয়া হিচাপে কৰ্মৰত সময়ছোৱাত তেওঁ অসমৰ পৰিৱেশ আৰু বন বিভাগৰ আয়ুক্ত আৰু সচিবৰ দৰে গুৰুত্বপূৰ্ণ পদবীত অধিষ্ঠিত আছিল।
এনে প্ৰশাসনিক ভূমিকাৰে তেওঁ চৰকাৰী পদক্ষেপসমূহ জনসাধাৰণৰ সেৱাত ৰূপায়ণ কৰাত আত্মনিয়োগ কৰিছিল।
হাগজেৰ বিশিষ্ট ৰাজনীতিক, অসমৰ প্ৰাক্তন শিক্ষামন্ত্ৰী, বড়ো সাহিত্য সভাৰ প্ৰতিষ্ঠাপক সভাপতি জয় ভদ্ৰ হাগজেৰৰ পুত্ৰ।
বিজেপি ডিমা হাছাও শাখাই তেওঁৰ মৃত্যুত গভীৰ শোক প্ৰকাশ কৰি তেওঁৰ মৃত্যুক সমাজৰ বাবে এক অপূৰণীয় ক্ষতি বুলি উল্লেখ কৰিছে।
