চুবুৰীয়া ৰাজ্য পশ্চিমবংগত নিপাহ ভাইৰাছৰ আতংক। সোমবাৰে নিপাহ ভাইৰাছত আক্ৰান্তৰ সন্দেহযুক্ত দুজন লোকৰ সন্ধান পোৱা গৈছে।
আইচিএমআৰৰ ভাইৰাছ ৰিচাৰ্চ এণ্ড ডায়েগনষ্টিক লেবৰেটৰীয়ে এইমছ কল্যাণীত পৰীক্ষা চলোৱাৰ পিছতে বিষয়টো পোহৰলৈ আহে। এই খবৰ পোৱাৰ পিছতে ৰাজ্য চৰকাৰক সহায় কৰিবলৈ আগবাঢ়ি আহিছে ৰাষ্ট্ৰীয় যৌথ প্ৰাদুৰ্ভাৱ সঁহাৰি দল।
ইতিমধ্যে কেন্দ্ৰই নিৰীক্ষণ আৰম্ভ কৰিছে, সংস্পৰ্শলৈ অহা লোকৰ সন্ধান উলিওৱা হৈছে আৰু কুইক ৰেচপন্স টিম সক্ৰিয় কৰা হৈছে। কেন্দ্ৰীয় স্বাস্থ্য বিষয়াসকলে কয় যে তেওঁলোকে সমগ্ৰ পৰিস্থিতিৰ ওপৰত তীক্ষ্ণ দৃষ্টি ৰাখিছে। নিপাহ বৰ বেছি সাধাৰণ ৰোগ নহয় যদিও দেখা দিলে ইয়াক সহজভাৱে ল’ব নোৱাৰি।
উল্লেখ্য যে ১৯৯৮-৯৯ চনত মালয়েছিয়াত প্ৰথমবাৰৰ বাবে নিপাহ ভাইৰাছ চিনাক্ত কৰা হৈছিল। মূলতঃ গাহৰি পালকসকলৰ মাজত এই সংক্ৰমণ বিয়পি পৰিছিল। সেই প্ৰাদুৰ্ভাৱত এশৰো অধিক লোকৰ মৃত্যু হৈছিল। তেতিয়া স্পষ্ট হৈ পৰিল যে নিপাহ মাৰাত্মক, মৃত্যুৰ হাৰ বেছি আৰু পৰিস্থিতি অতি সোনকালে বেয়া হ’ব পাৰে।
ভাৰতত নিপাহৰ উপস্থিতি বিৰল যদিও ভয়ানক। ২০০১ আৰু ২০০৭ চনত পশ্চিম বংগত নিপাহ সংক্ৰমণৰ ৰোগী ধৰা পৰে। পিছলৈ কেৰেলা সংক্ৰমণৰ কেন্দ্ৰবিন্দু হৈ পৰে। ২০১৮ চনত যেতিয়া এই ভাইৰাছ আমাৰ দেশত বৃহৎ পৰিসৰত বিয়পি পৰিছিল, তেতিয়া কঠোৰ কণ্টেইনমেণ্ট ব্যৱস্থা গ্ৰহণ কৰিবলগীয়া হৈছিল।
ইয়াৰ পিছত যদিও কেৰালাত সৰু সৰু থুপ আৰু পৃথক সংক্ৰমণ দেখা গৈছিল, তথাপিও অধিকাংশ ৰোগীক দ্ৰুতভাৱে নিয়ন্ত্ৰণ কৰা সম্ভৱ হৈছিল। সংখ্যাৰ পাৰ্থক্য থাকিব পাৰে, কিন্তু ছবিখন একেই, ঘটনা কম, ফলাফল ভয়ংকৰ।
দৰাচলতে নিপাহ ভাইৰাছ এক জুনোটিক সংক্ৰমণ। অৰ্থাৎ প্ৰাণীৰ পৰা মানুহলৈ বিয়পি পৰে। ফলাহাৰী বাদুলি এই ভাইৰাছৰ প্ৰাকৃতিক বাহক। বাদুলি নিজেই অসুস্থ নহ’লেও দূষিত খাদ্য, আক্ৰান্ত জীৱ-জন্তু বা সংক্ৰমিত ব্যক্তিৰ ঘনিষ্ঠ সংস্পৰ্শৰ জৰিয়তে এই ভাইৰাছ বিয়পাব পাৰে।
নিপাহৰ কোনো বিশেষ এন্টিভাইৰেল চিকিৎসা নাই। লগতে কোনো অনুমোদিত ভেকচিনো নাই। গতিকে চিকিৎসা মূলতঃ লক্ষণসমূহ নিয়ন্ত্ৰণ আৰু শৰীৰক সহায় কৰাতে সীমাবদ্ধ। এই কাৰণেই আগতীয়া সতৰ্কতা আৰু আগতীয়াকৈ ধৰা পেলোৱাটো আটাইতকৈ গুৰুত্বপূৰ্ণ।
নিপাহৰ লক্ষণ
প্ৰথম অৱস্থাত নিপাহৰ লক্ষণবোৰ প্ৰায়ে সাধাৰণ চৰ্দি বা ফ্লুৰ দৰে দেখা যায়। যেনে-
• জ্বৰ,
• মূৰৰ বিষ,
• পেশীৰ বিষ,
• ভাগৰ।
সংক্ৰমণ বৃদ্ধি পোৱাৰ লগে লগে লক্ষণসমূহ হ’ব পাৰে—
• মূৰ ঘূৰোৱা,
• বিভ্ৰান্তি
• উশাহ লোৱাত অসুবিধা
• এনকেফেলাইটিছ।
গুৰুতৰ ক্ষেত্ৰত ৰোগীৰ অৱস্থা কেইদিনমানৰ ভিতৰতে দ্ৰুতগতিত অৱনতি ঘটিব পাৰে। বাচি যোৱা বহুতৰে দীৰ্ঘদিনীয়া স্নায়ুজনিত সমস্যা হ’ব পাৰে।
নিপাহৰ পৰা হাত সাৰিবলৈ কি কৰিব লাগে
স্বাস্থ্য বিভাগৰ পৰামৰ্শ মতে—
বাদুলিয়ে কামোৰা বা দূষিত হোৱা ফল নাখাব
• কেঁচা খেজুৰৰ ৰস পৰিহাৰ কৰক,
• ফল-মূল ভালদৰে ধুব লাগে,
• নিয়মিতভাৱে হাত ধুব লাগে,
• আক্ৰান্ত ব্যক্তিৰ বেছি ওচৰলৈ নাহিব
• যদি আপুনি কোনো ৰোগীৰ যত্ন লৈ আছে তেন্তে সুৰক্ষামূলক ব্যৱস্থা গ্ৰহণ কৰক।
সম্ভাৱ্য সংস্পৰ্শৰ পিছত যদি লক্ষণ দেখা দিয়ে তেন্তে তৎক্ষণাত চিকিৎসকৰ কাষ চাপিব লাগে।
ভাৰতৰ বাহিৰত সৰ্বাধিক নিপা সংক্ৰমণ দেখা গৈছে বাংলাদেশত। ২০০০ চনৰ আৰম্ভণিৰ পৰাই তাত প্ৰায় প্ৰতি বছৰে কিছুমান ঘটনা পোহৰলৈ আহিছে, বেছিভাগেই দূষিত খাদ্যৰ বাবে। দক্ষিণ-পূব এছিয়াৰ কিছুমান অঞ্চলতো ড্ৰপলেট সংক্ৰমণৰ দৃষ্টান্ত দেখা গৈছে। বিশ্বজুৰি মুঠ সংক্ৰমণৰ সংখ্যা কম যদিও ইয়াৰ আশংকা সম্পূৰ্ণৰূপে নুই কৰিব নোৱাৰি।
