অসমৰ সৰ্বাংগীণ বিকাশৰ দিশত এক নতুন মাত্ৰা প্ৰদান কৰি বিশ্ব বেংকে ৰাজ্যখনৰ বাবে ৬৮০ মিলিয়ন ডলাৰৰ এক বৃহৎ সাহাৰ্য্য পেকেজত অনুমোদন জনাইছে। এই বিশাল ধনৰাশিৰ জৰিয়তে অসমত জলবায়ু পৰিৱৰ্তনৰ প্ৰত্যাহ্বান নেওচিব পৰা আন্তঃগাঁথনি নিৰ্মাণ, বিদ্যালয় শিক্ষাৰ মানদণ্ড বৃদ্ধি আৰু চৰকাৰী শাসন ব্যৱস্থা অধিক শক্তিশালী কৰাৰ বাবে তিনিটাকৈ গুৰুত্বপূৰ্ণ প্ৰকল্প ৰূপায়ণ কৰা হ’ব।
বিশ্ব বেংকৰ কাৰ্যবাহী সঞ্চালক মণ্ডলীয়ে গ্ৰহণ কৰা এই সিদ্ধান্তই ৰাজ্যখনৰ যোগাযোগ ব্যৱস্থা উন্নত কৰাৰ লগতে প্ৰায় ৪০ লাখতকৈও অধিক শিক্ষাৰ্থী আৰু যুৱক-যুৱতীক ভৱিষ্যতৰ কৰ্মসংস্থাপনৰ বাবে দক্ষ কৰি তুলিব বুলি আশা কৰা হৈছে।
এই সাহাৰ্য্য পেকেজৰ এটা ডাঙৰ অংশ অৰ্থাৎ ৩৫০ মিলিয়ন ডলাৰ ব্যয় কৰা হ’ব অসমৰ পাহাৰীয়া আৰু জনজাতীয় অঞ্চলসমূহৰ পথ যোগাযোগ উন্নত কৰাৰ বাবে। এই প্ৰকল্পৰ অধীনত বিশেষকৈ দুৰ্গম অঞ্চলবোৰত এনেকুৱা পথ নিৰ্মাণ কৰা হ’ব যিবোৰ প্ৰাকৃতিক দুৰ্যোগ বা অতিপাত বৰষুণৰ দৰে পৰিস্থিতিতো অটুট থাকিব। ইয়াৰ ফলত প্ৰায় ১.৯০ লাখ লোক পোনপটীয়াকৈ উপকৃত হ’ব আৰু তেওঁলোকৰ যাতায়তৰ সময় বহুখিনি কমি যাব। এই পথসমূহৰ কাষত আধুনিক পৰিবহন কেন্দ্ৰ নিৰ্মাণ কৰাৰ লগতে ট্ৰাক, বাছ আৰু বৈদ্যুতিক বাহন চাৰ্জ কৰাৰ ব্যৱস্থাও ৰখা হ’ব, যাৰ ফলত প্ৰায় ৫০ হাজাৰ যুৱক-যুৱতীৰ বাবে সংস্থাপনৰ নতুন সুযোগ সৃষ্টি হ’ব।
শিক্ষা খণ্ডৰ উন্নয়নৰ বাবে এই পেকেজৰ পৰা ২৫০ মিলিয়ন ডলাৰ আৱণ্টন দিয়া হৈছে। ইয়াৰ জৰিয়তে ৰাজ্যৰ ২০ লাখতকৈ অধিক প্ৰাথমিক বিদ্যালয়ৰ ছাত্ৰ-ছাত্ৰীৰ লগতে ১০ৰ পৰা ১৯ বছৰ বয়সৰ প্ৰায় ২০ লাখ কিশোৰ-কিশোৰীক জীৱন শৈলীৰ শিক্ষা আৰু ভৱিষ্যতৰ সংস্থাপনৰ বাবে প্ৰশিক্ষণ দিয়া হ’ব। বিশেষকৈ বানপানী বা বতৰৰ প্ৰতিকূল অৱস্থাতো যাতে ল’ৰা-ছোৱালীবোৰৰ পঢ়া-শুনা বন্ধ নহয়, তাৰ বাবে জলবায়ু সহনশীল বিদ্যালয় গৃহ নিৰ্মাণ কৰা হ’ব। লগতে পাঠ্যক্ৰমবোৰ অধিক আধুনিক কৰি তোলা হ’ব যাতে শিক্ষাৰ্থীসকলে আধুনিক যুৱ সমাজৰ প্ৰত্যাহ্বানসমূহ মোকাবিলা কৰিব পাৰে।
ইফালে চৰকাৰী প্ৰশাসন আৰু ৰাজহুৱা সেৱা প্ৰদান ব্যৱস্থাটোক অধিক ক্ষিপ্ৰ কৰিবলৈ ৮০ মিলিয়ন ডলাৰ ব্যয় কৰা হ’ব। ইয়াৰ মূল লক্ষ্য হৈছে ৰাজ্যৰ বিত্তীয় ব্যৱস্থাপনা আৰু তথ্য সংগ্ৰহৰ পদ্ধতিটো উন্নত কৰা যাতে সাধাৰণ জনতাই চৰকাৰী আঁচনিসমূহৰ সুবিধা সহজেই লাভ কৰিব পাৰে। এই তিনিওটা প্ৰকল্পৰ বাবে ধাৰ লোৱা ধন পৰিশোধৰ বাবে অসম চৰকাৰে ১৬ বছৰ সময় লাভ কৰিব আৰু ইয়াৰ প্ৰথম তিনি বছৰত কোনো ধন ঘূৰাব নালাগিব। বিশ্ব বেংকৰ ভাৰতৰ কাৰ্যবাহী সঞ্চালক পাল প্ৰচিৰ মতে, এই বিনিয়োগে অসমৰ দৰে এক সম্ভাৱনাপূৰ্ণ অঞ্চলত ব্যক্তিগতখণ্ডৰ বিকাশ আৰু দীৰ্ঘম্যাদী সমৃদ্ধিৰ পথ প্ৰশস্ত কৰিব।
