২০২৭ চনৰ লোকপিয়লৰ পূৰ্বে কেন্দ্ৰীয় চৰকাৰে প্ৰশ্ন লানিৰ এক অধিসূচনা জাৰি কৰিছে। বৃহস্পতিবাৰে ভাৰতীয় গেজেটত প্ৰকাশিত এক অধিসূচনা অনুসৰি এই প্ৰশ্নসমূহেই হৈছে প্ৰথম পৰ্যায়ৰ লোকপিয়লৰ প্ৰশ্ন।
এই অধিসূচনা গৃহ পৰিক্ৰমা মন্ত্ৰালয়ে ভাৰতৰ মহাপঞ্জীয়কৰ কাৰ্যালয়ৰ যোগেদি জনগণনা আইন, ১৯৪৮ৰ বিধান অনুসৰি জাৰি কৰা হৈছে। ফলত ২০২০ চনৰ জানুৱাৰী মাহত জাৰি কৰা পূৰ্বৰ অধিসূচনা বাতিল কৰা হৈছে।
প্ৰথম পৰ্যায়ত হ’ব ঘৰ আৰু বাসগৃহৰ গণনা। এই পৰ্যায়ত মুঠ ৩৩টা প্ৰশ্ন ৰখা হৈছে। এই প্ৰক্ৰিয়া চলিত বৰ্ষৰ ১ এপ্ৰিলৰ পৰা আৰম্ভ হ’ব আৰু ছেপ্টেম্বৰ মাহত শেষ হ’ব। চৰকাৰী সূত্ৰ অনুসৰি দ্বিতীয় পৰ্যায়ৰ লোকপিয়লৰ প্ৰশ্ন লানি পৰৱৰ্তী সময়ত পৃথকে অৱগত কৰা হ’ব।
২০১১ চনৰ প্ৰথম পৰ্যায়ৰ লোকপিয়লত ২৯টা প্ৰশ্ন আছিল। এইবাৰ আৰু চাৰিটা সংযোজন কৰা হৈছে। অতিৰিক্ত প্ৰশ্নসমূহ ইণ্টাৰনেট ব্যৱহাৰ আৰু পৰিয়ালৰ মূল খাদ্য শস্যৰ সৈতে জড়িত। এটা নিৰ্দিষ্ট সময়ৰ বাবে ছেলফ এনেউমাৰেশ্যন বা স্ব-গণনা কৰাৰ সুযোগো আছে। ১৫ দিন খোলা থাকিব।
চৰকাৰী অধিসূচনা অনুসৰি, প্ৰশ্নসমূহৰ ভিতৰত ঘৰৰ অৱস্থা, পৰিয়ালৰ গঠন আৰু মৌলিক সুবিধাসমূহৰ সৈতে জড়িত সবিশেষ তথ্য সন্নিবিষ্ট কৰা হৈছে। ইয়াৰ ভিতৰত ঘৰৰ সংখ্যা, লোকপিয়ল ঘৰৰ নম্বৰ, মজিয়া, দেৱাল আৰু চালৰ বাবে ব্যৱহাৰ কৰা মূল সামগ্ৰী, লোকপিয়লৰ ঘৰ আৰু ঘৰৰ সংখ্যাৰ ব্যৱহাৰ আৰু অৱস্থা আদি।
তদুপৰি ঘৰখনত সাধাৰণতে বাস কৰা মুঠ ব্যক্তিৰ সংখ্যা, ঘৰৰ মুৰব্বীৰ নাম আৰু লিংগ আৰু মুৰব্বীজন অনুসূচিত জাতি, অনুসূচিত জনজাতি বা আন শ্ৰেণীৰ হয় নে নহয় সেই সম্পৰ্কে তথ্য সংগ্ৰহ কৰা হ’ব।
অধিসূচনাখনত ঘৰৰ মালিকীস্বত্বৰ অৱস্থা, বহা কোঠাৰ সংখ্যা, ঘৰখনত বাস কৰা বিবাহিত দম্পতীৰ সংখ্যা আৰু খোৱাপানীৰ মূল উৎস আৰু ইয়াৰ উপলব্ধতাৰ বিষয়ে উল্লেখ কৰা হৈছে।
আন আন সবিশেষৰ ভিতৰত পোহৰৰ মূল উৎস, শৌচাগাৰৰ সুবিধা, শৌচাগাৰৰ প্ৰকাৰ, নলা নিষ্কাশন ব্যৱস্থা, গা ধোৱাৰ সুবিধা, পাকঘৰ আৰু এলপিজি/পিএনজি সংযোগ আৰু ৰন্ধা-বঢ়াৰ বাবে ব্যৱহাৰ কৰা মূল ইন্ধন আদি অন্তৰ্ভুক্ত।
এই লোকপিয়লত ঘৰুৱা সম্পত্তি যেনে ৰেডিঅ’ বা ট্ৰেঞ্জিষ্টৰ, টেলিভিছন, ইণ্টাৰনেট সংযোগ, লেপটপ বা কম্পিউটাৰ, টেলিফোন বা মোবাইল ফোন বা স্মাৰ্টফোন, চাইকেল, স্কুটাৰ, মটৰ চাইকেল, মপেড, গাড়ী, জীপ বা ভ্যানৰ মালিকীস্বত্বও লিপিবদ্ধ কৰা হ’ব। ইয়াৰ উপৰিও ঘৰখনত খোৱা মূল শস্যৰ তথ্য আৰু লোকপিয়ল সম্পৰ্কীয় যোগাযোগৰ বাবে এটা মোবাইল নম্বৰ সম্পৰ্কে তথ্য সংগ্ৰহ কৰিব।
২০২৭ চনত দুটা পৰ্যায়ত অনুষ্ঠিত হ’ব এই লোকপিয়ল।দ্বিতীয় পৰ্যায়ত জনসংখ্যা গণনাৰ লগতে জাতি সম্পৰ্কীয় তথ্য সংগ্ৰহ কৰিব পাৰে।
