১০০ দিনীয়া কৰ্ম প্ৰকল্পৰ পৰা মহাত্মা গান্ধীৰ নাম আঁতৰাই তীব্ৰ বিৰোধিতাৰ সন্মুখীন হ’বলগীয়া হৈছিল। হয়তো সেই বিতৰ্কৰ বাবেই কেন্দ্ৰীয় চৰকাৰে এইবাৰ গান্ধীৰ নামত নতুন প্ৰকল্প আৰম্ভ কৰিব লগা হ’ল। কেন্দ্ৰীয় বাজেটত বিত্তমন্ত্ৰী নিৰ্মলা সীতাৰমণে ঘোষণা কৰে যে এইবাৰ কেন্দ্ৰীয় চৰকাৰে বস্ত্ৰ উদ্যোগৰ উন্নয়নৰ বাবে মহাত্মা গান্ধী গ্ৰাম স্বৰাজ যোজনা আৰম্ভ কৰিব।
কেন্দ্ৰই এমএনৰেগাৰ সলনি বিকাশ ভাৰত গেৰান্টি ফৰ এম্প্লয়মেণ্ট এণ্ড লাইভলিহুড মিছন (গ্ৰামিন) বা ভিবি-জি ৰাম-জি (চমুকৈ জি ৰাম জী) আইন আনিছে। ইয়াৰ ফলত সমগ্ৰ দেশতে বিতৰ্কৰ সৃষ্টি হৈছে।
কংগ্ৰেছে অভিযোগ কৰিছে যে মোডী চৰকাৰে সেই প্ৰকল্পৰ পৰা গান্ধীজীৰ নাম আঁতৰাবলৈ বিধেয়কখন আনিছে। এই বিধেয়কখন অসাংবিধানিক। সংখ্যাগৰিষ্ঠতাৰ দোহাই দি সংসদত গৃহীত কৰিছে কেন্দ্ৰই। সেই সিদ্ধান্তৰ বিৰুদ্ধে ইতিমধ্যে কংগ্ৰেছে দেশজোৰা আন্দোলন আৰম্ভ কৰিছে। আন বিৰোধী দলসমূহো গান্ধীজীৰ অপমানত ক্ষুব্ধ হৈ পৰিছে।
হয়তো সেই বিতৰ্কৰ বাবেই নিৰ্মলা সীতাৰমনৰ বাজেটত গান্ধীজীৰ নাম শুনা গ’ল। কেন্দ্ৰই খাদী আৰু বস্ত্ৰ উদ্যোগৰ জৰিয়তে ভাৰতৰ গ্ৰাম্য অঞ্চলৰ অৰ্থনৈতিক উন্নয়ন আৰু স্বাৱলম্বীতাৰ বাবে মহাত্মা গান্ধী গ্ৰাম স্বৰাজ যোজনা আৰম্ভ কৰিবলৈ ওলাইছে। মূলতঃ বস্ত্ৰ উদ্যোগ আৰু খাদীৰ উন্নয়নৰ বাবে সেই প্ৰকল্পত বিপুল পৰিমাণৰ বিনিয়োগ কৰা হ’ব।
আজি বাজেট ভাষণত নিৰ্মলাই কয়, “মই চেলেঞ্জ মোড টেক্সটাইল পাৰ্ক নিৰ্মাণৰ প্ৰস্তাৱ দিছো। খাদী আৰু হস্ততাঁত উদ্যোগৰ উন্নয়নৰ বাবে মহাত্মা গান্ধী গ্ৰাম স্বৰাজ প্ৰকল্প আৰম্ভ কৰাৰ প্ৰস্তাৱ দিছো।”
ইতিমধ্যে গান্ধীজী আৰু ভাৰতৰ ইতিহাসৰ লগত খাদীৰ ওতঃপ্ৰোত সম্পৰ্ক আছে। গান্ধীজীয়ে খাদীক আত্মনিৰ্ভৰশীলতাৰ অস্ত্ৰ হিচাপে চাইছিল। তেওঁ ইয়াক গ্ৰাম্য অৰ্থনীতিক আগুৱাই নিয়াৰ এক অস্ত্ৰ হিচাপে চাইছিল। নিৰ্মলাই সেই সপোন বাজেটত অন্তৰ্ভুক্ত কৰিলে। লক্ষ্য হৈছে বিৰোধীৰ জি ৰাম জী অস্ত্ৰক ব্যৰ্থ কৰি গান্ধীৰ প্ৰতি আবেগ জগাই তোলা।
