উচ্চতম ন্যায়ালয়ে অহা ১৬ ফেব্ৰুৱাৰীত অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে দাখিল হোৱা কেবাখনো আবেদনৰ শুনানি গ্ৰহণ কৰিব। এটা বিশেষ সম্প্ৰদায়ৰ লোকক লক্ষ্য কৰি গুলীবৰ্ষণ কৰাৰ সন্দৰ্ভত কৰা বিতৰ্কিত মন্তব্য সম্বলিত এটা ভিডিঅ‘ৰ ওপৰত ভিত্তি কৰিয়েই এই আবেদনসমূহ দাখিল কৰা হৈছে।
আদালতৰ সূত্ৰ অনুসৰি, মুখ্য ন্যায়াধীশ সঞ্জীৱ খান্না আৰু ন্যায়াধীশ জয়মাল্য বাগচীৰ এক বিচাৰপীঠে এই বিষয়টোৰ শুনানি গ্ৰহণ কৰাৰ সম্ভাৱনা আছে। চি.পি.আই.(এম.) নেতা নিজাম পাছাই ইতিমধ্যে মুখ্যমন্ত্ৰীগৰাকীৰ বিৰুদ্ধে এজাহাৰ পঞ্জীয়নৰ দাবী জনাই এখন আবেদন দাখিল কৰিছে।
উল্লেখ্য যে, শীৰ্ষ আদালতে পূৰ্বতেই এই আবেদনসমূহ তালিকাভুক্ত কৰাৰ ইংগিত দিছিল। অসমৰ আগন্তুক বিধানসভা নিৰ্বাচনৰ প্ৰসংগ উল্লেখ কৰি বিচাৰপীঠখনে পৰ্যবেক্ষণ কৰিছিল যে নিৰ্বাচনী প্ৰক্ৰিয়াৰ বহু বিতৰ্কিত অংশ প্ৰায়েই আদালতৰ মজিয়া পায়হি।
এই বিতৰ্কৰ সূত্ৰপাত হৈছিল এখন নিৰ্বাচনী সভাত ৰেকৰ্ডিং কৰা এটা ভিডিঅ‘ৰ পৰা, য‘ত দুজন ব্যক্তিক লক্ষ্য কৰি গুলীবৰ্ষণৰ কথা কোৱা হৈছিল বুলি অভিযোগ উত্থাপন হৈছে। যোৱা ৭ ফেব্ৰুৱাৰীত অসম বিজেপিৰ চৰকাৰী ছচিয়েল মিডিয়া একাউণ্টত এই ভিডিঅ‘ প্ৰচাৰ কৰাৰ পিছতে তীব্ৰ ৰাজনৈতিক প্ৰতিক্ৰিয়াৰ সৃষ্টি হয়। যদিও পৰৱৰ্তী সময়ত পোষ্টটো মচি পেলোৱা হৈছিল, তথাপিও ইতিমধ্যে বহু লোকে ইয়াক ডাউনলোড কৰি সামাজিক মাধ্যমত বিয়পাই দিছিল।
আনহাতে, চি.পি.আই.(এম.) আৰু দলটোৰ নেত্ৰী এনী ৰাজাই সাম্প্ৰদায়িক মেৰুকৰণৰ উদ্দেশ্যে দিয়া ঘৃণা ভাষণৰ ওপৰত উদ্বেগ প্ৰকাশ কৰি এজাহাৰ পঞ্জীয়নৰ দাবীত পৃথক আবেদন দাখিল কৰিছে। আবেদনকাৰীসকলে এক বিশেষ তদন্তকাৰী দল (SIT) গঠনৰো দাবী জনাইছে। তেওঁলোকৰ মতে, ৰাজ্যিক বা কেন্দ্ৰীয় সংস্থাৰ দ্বাৰা এই ক্ষেত্ৰত নিৰপেক্ষ তদন্ত সম্ভৱ নহয়।
ইয়াৰ উপৰি, পূৰ্বে ১২ জন ব্যক্তিয়ে আন এক আবেদন দাখিল কৰি সাংবিধানিক পদত অধিষ্ঠিত ব্যক্তিসকলক বিভাজনমূলক মন্তব্য কৰাৰ পৰা বিৰত ৰাখিবলৈ আদালতৰ নিৰ্দেশনা বিচাৰিছিল।
একেদৰে, বিশিষ্ট বুদ্ধিজীৱী ড°হীৰেন গোহাঁই, অসমৰ প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকা, ‘নৰ্থ ইষ্ট নাও’ৰ মুখ্য সম্পাদক পৰেশ মালাকাৰ আৰু জ্যেষ্ঠ অধিবক্তা শান্তনু বৰঠাকুৰেও মুখ্যমন্ত্ৰীগৰাকীৰ বিৰুদ্ধে একে অভিযোগত সংবিধানৰ ৩২ নং অনুচ্ছেদৰ অধীনত উচ্চতম ন্যায়ালয়ত এখন সুকীয়া লেখ আবেদন দাখিল কৰিছে, যিখন জৰুৰী শুনানিৰ বাবে মুখ্য ন্যায়াধীশ সূৰ্য কান্তৰ বিচাৰপীঠত উল্লেখ কৰা হৈছে।
