বৈধ শংসাপত্ৰ অবিহনেই যাত্ৰীবাহী বিমান চলাচল কৰাৰ গুৰুতৰ অভিযোগত এয়াৰ ইণ্ডিয়াৰ বিৰুদ্ধে কঠোৰ পদক্ষেপ গ্ৰহণ কৰিছে ডিৰেক্টৰেট জেনেৰেল অৱ চিভিল এভিয়েশ্বন চমুকৈ ডিজিসিএ-য়ে। নিয়ম উলংঘা কৰাৰ বাবে বিমান নিয়ন্ত্ৰক সংস্থাটোৱে এয়াৰ ইণ্ডিয়াক এক কোটি টকাৰ বৃহৎ জৰিমনা বিহিছে। ডিজিসিএ-ৰ মতে এই ত্ৰুটিয়ে বিমান সংস্থাটোৰ সুৰক্ষাৰ মানদণ্ড আৰু জনসাধাৰণৰ বিশ্বাস দুয়োটাতে আঘাত হানিছে।
অভিযোগ অনুসৰি যোৱা বছৰৰ ২৪ আৰু ২৫ নৱেম্বৰত এয়াৰবাছ এ৩২০ নামৰ এখন বিমানে দিল্লী, বেংগালুৰু, মুম্বাই আৰু হায়দৰাবাদৰ মাজত মুঠ আঠবাৰকৈ উৰণ সম্পন্ন কৰিছিল। এই উৰণসমূহৰ বাবে আটাইতকৈ গুৰুত্বপূৰ্ণ এয়াৰৱৰ্ডিনেছ ৰিভিউ চাৰ্টিফিকেট বা এআৰচি নাছিল। উল্লেখ্য যে প্ৰতিখন বিমানে বছৰেকীয়া সুৰক্ষা পৰীক্ষাৰ অন্তত এই শংসাপত্ৰ লাভ কৰাটো বাধ্যতামূলক। এই ঘটনাৰ পিছত হোৱা বিভাগীয় তদন্তত বিমান সংস্থাটোৰ ভিতৰচ’ৰাৰ কেইবাটাও পদ্ধতিগত বিফলতাৰ কথা পোহৰলৈ আহে। আনকি পাইলটসকলৰ ভূমিকাৰ ওপৰতো প্ৰশ্ন উত্থাপন হৈছে কাৰণ উৰণৰ পূৰ্বে ল’বলগীয়া সাৱধানতাসমূহ সঠিকভাৱে পালন কৰা হোৱা নাছিল।
ডিজিসিএ-ৰ যুগ্ম মহাপৰিকিলক মণীশ কুমাৰে এয়াৰ ইণ্ডিয়াৰ মুখ্য কাৰ্যবাহী বিষয়া কেম্পবেল উইলছনক এখন চিঠিৰ জৰিয়তে এই নিৰ্দেশনা প্ৰদান কৰিছে। তেওঁ স্পষ্টকৈ উল্লেখ কৰিছে যে এই কাৰ্যই যাত্ৰীৰ নিৰাপত্তাৰ ক্ষেত্ৰত ডাঙৰ প্ৰত্যাহ্বান সৃষ্টি কৰিছে। এয়াৰ ইণ্ডিয়াই ইতিমধ্যে কেইবাটাও দুৰ্ঘটনাৰ বাবে তীব্ৰ নিৰীক্ষণৰ মাজত থকাৰ সময়তে এই নতুন জৰিমনাৰ বোজা পৰিছে। যোৱা জুন মাহত আহমেদাবাদত হোৱা বিমান দুৰ্ঘটনাৰ তদন্তও বৰ্তমান চলি আছে।
এয়াৰ ইণ্ডিয়াৰ এআই-১৭১ দুৰ্ঘটনাক লৈ শেহতীয়াকৈ হোৱা চৰ্চাৰ মাজতে এয়াৰক্ৰাফ্ট এক্সিডেন্ট ইনভেষ্টিগেশ্বন ব্যুৰো বা এএআইবি-য়ে জানিবলৈ দিছে যে এই তদন্ত এতিয়াও সম্পূৰ্ণ হোৱা নাই। পাইলটৰ স্বেচ্ছাকৃত ভুলৰ বাবে দুৰ্ঘটনা হোৱা বুলি যি চৰ্চা চলিছিল তাকো সংস্থাটোৱে নাকচ কৰিছে। টাটা গোষ্ঠী আৰু ছিংগাপুৰ এয়াৰলাইন্সৰ মালিকানাধীন এই সংস্থাটোৰ নিৰাপত্তা ব্যৱস্থাক লৈ এতিয়া সৰ্বত্ৰে প্ৰশ্ন উত্থাপন হৈছে।
