শীতকালৰ ঠাণ্ডা পুৱাবোৰত আমাৰ বহুতৰে বিচনাৰ পৰা উঠিবলৈ মন নাযায়। বহু সময় ধৰি শুই থকাৰ পিছতো দেহটো গধুৰ লাগে আৰু শৰীৰত শক্তিৰ অভাৱ অনুভৱ হয়। কিছুমান লোকৰ আকৌ পুৱা উঠাৰ লগে লগে মূৰৰ বিষ বা গাৰ বিষৰ দৰে সমস্যাই দেখা দিয়ে। আচলতে শীতকালত আমাৰ দৈনন্দিন জীৱনশৈলীৰ পৰিৱৰ্তন আৰু সূৰ্যৰ পোহৰ কমকৈ পোৱাৰ বাবে শৰীৰত এনেবোৰ প্ৰভাৱ পৰে। কিন্তু যদি আপুনি প্ৰতিদিনে পুৱা সাৰ পোৱাৰ পিছত অতিমাত্ৰা ভাগৰুৱা অনুভৱ কৰে, তেন্তে ইয়াক কেৱল এলাহ বুলি ভাবি আওকাণ কৰা উচিত নহয়। ই শৰীৰৰ ভিতৰত থকা কোনো গভীৰ সমস্যাৰ সংকেতো হ’ব পাৰে। সেয়েহে ভৱিষ্যতে হ’ব পৰা জটিলতা ৰোধ কৰিবলৈ ইয়াৰ অন্তৰালৰ কাৰণসমূহ বুজি লোৱাটো অতি প্ৰয়োজনীয়।
পুৱা ভাগৰুৱা অনুভৱ কৰাৰ এটা প্ৰধান কাৰণ হ’ল টোপনিৰ নিম্ন মানদণ্ড। নিশা দেৰিলৈকে মোবাইল ফোন ব্যৱহাৰ কৰা বা কোনো কাৰণত মাজনিশা বাৰে বাৰে টোপনি ভাঙিলে শৰীৰে যিমানখিনি বিশ্ৰাম পাব লাগে সিমানখিনি নাপায়। ইয়াৰ উপৰি শীতকালত পিয়াহ কমকৈ লগাৰ বাবে আমি পানী বহুত কম পৰিমাণে খাওঁ। শৰীৰত পানীৰ অভাৱ হ’লে আমাৰ পেশীবোৰ দুৰ্বল হৈ পৰে আৰু শৰীৰত এলেহুৱা ভাৱৰ সৃষ্টি হয়। আন এটা গুৰুত্বপূৰ্ণ কাৰণ হৈছে ভিটামিন ডি-ৰ অভাৱ। ঠাণ্ডাৰ দিনত সূৰ্যৰ পোহৰ কমকৈ পোৱাৰ বাবে শৰীৰত শক্তিৰ মাত্ৰা কমি যায়। কেৱল শাৰীৰিক কাৰণেই নহয়, অত্যধিক মানসিক চাপ বা চিন্তাৰ বাবেও আমাৰ মগজুৱে জিৰণি নাপায় আৰু ইয়াৰ ফলত পুৱা শোৱাৰ পৰা উঠিলে ক্লান্তি অনুভৱ হয়। একেদৰে ব্যায়াম নকৰা আৰু বেছি সময় বিচনাত পৰি থকাৰ ফলত পেশীবোৰ সক্ৰিয় হৈ নাথাকে আৰু শৰীৰটো অৱশ হৈ পৰে।
এই সমস্যাৰ পৰা মুক্তি পাই নিজক সক্ৰিয় কৰি ৰাখিবলৈ কিছুমান সহজ নিয়ম মানি চলাটো দৰকাৰ। সদায় এটা নিৰ্দিষ্ট সময়ত শোৱা আৰু পুৱা সোনকালে উঠাৰ অভ্যাস কৰিলে শৰীৰৰ জৈৱিক ঘড়ীটোৱে সঠিকভাৱে কাম কৰে। পিয়াহ নালাগিলেও দিনটোত সঠিক পৰিমাণৰ পানী খাব লাগে যাতে শৰীৰত জলীয় অংশৰ পৰিমাণ ঠিকে থাকে। দিনৰ ভাগত কিছু সময় ৰ’দত বহিলে প্ৰাকৃতিকভাৱে ভিটামিন ডি পোৱা যায়, যিয়ে মনটো সতেজ কৰি ৰাখে। পুৱা উঠি কিছু সময় খোজ কঢ়া বা পাতল ব্যায়াম কৰিলে শৰীৰত তেজৰ চলাচল বৃদ্ধি পায় আৰু শক্তি আহে। খাদ্যৰ ক্ষেত্ৰতো সচেতন হোৱাটো প্ৰয়োজনীয়। সদায় সুষম আহাৰ গ্ৰহণ কৰিব লাগে আৰু বেছি তেল-মচলাযুক্ত খাদ্য পৰিহাৰ কৰিব লাগে।
পুৱা শুই উঠিয়েই এগিলাচ কুহুমীয়া গৰম পানী খোৱাৰ অভ্যাস কৰিলে ই শৰীৰৰ বিষাক্ত পদাৰ্থবোৰ উলিয়াই দিয়াত সহায় কৰে। নিশা দেৰিলৈকে সাৰে থকাৰ অভ্যাস ত্যাগ কৰি টোপনিৰ সময়খিনি সঠিক কৰিব লাগে। লগতে চাহ বা কফিৰ দৰে অধিক কেফেইনযুক্ত পানীয় সেৱনৰ পৰা বিৰত থকাটো মংগলজনক। মনত ৰাখিব লাগে যে যদি এই ক্লান্তি বা ভাগৰুৱা ভাৱটো ধাৰাবাহিকভাৱে দীৰ্ঘদিন ধৰি চলি থাকে, তেন্তে ইয়াক সাধাৰণ বুলি নাভাবি চিকিৎসকৰ পৰামৰ্শ লোৱাটোৱেই আটাইতকৈ বুদ্ধিমানৰ কাম হ’ব।
