কাৰ্বি আংলং জিলাৰ ডকমকাৰ পাণজুৰি গাঁৱত যোৱা ৮ জুনত সংঘটিত হত্যাকাণ্ডৰ ঘটনাৰ পৰিপ্ৰেক্ষিতত নগাঁও জিলাৰ উচ্চ শিক্ষানুষ্ঠানসমূহলৈ কাৰ্বি জনগোষ্ঠীৰ ছাত্ৰ-ছাত্ৰীসকলৰ আগমন হ্ৰাস পাইছে। আজি নগাঁৱৰ এক অন্যতম শিক্ষানুষ্ঠান এ ডি পি কলেজত অনুষ্ঠিত হোৱা স্নাতক বিজ্ঞান শাখাৰ নামভৰ্তিত মাত্ৰ ১৪ জন ছাত্ৰৰ উপস্থিতিয়ে এই কথাটোকে প্ৰমাণ কৰা বুলি ক’ব পাৰি। ঘটনাটোৰ এনেকুৱা প্ৰভাৱে জিলাখনৰ বিদ্বৎ মহলক চিন্তিত কৰিছে।
উল্লেখযোগ্য যে প্ৰতিটো বৰ্ষতে মহাবিদ্যালয়খনলৈ শতাধিক ছাত্ৰ-ছাত্ৰীৰ আগমন ঘটে যদিও সামগ্ৰিক পৰিস্থিতিৰ পৰিপ্ৰেক্ষিতত শংকিত হৈ ছাত্ৰ-ছাত্ৰীয়ে নামভৰ্তি প্ৰক্ৰিয়াৰ পৰা বিৰত থকা বুলি জানিব পৰা গৈছে। নামভৰ্তিৰ প্ৰক্ৰিয়াত এনে ছাত্ৰ-ছাত্ৰীসকলে পুনৰ অংশগ্ৰহণ কৰিব পাৰে, তাৰ বাবে মহাবিদ্যালয়খনৰ কৰ্তৃপক্ষই স্নাতক বিজ্ঞান শাখাৰ ৫০ টা স্থান সংৰক্ষিত আসনৰ নামভৰ্তি পুনৰ অহা ২১ জুনত কৰাৰ সিদ্ধান্ত গ্ৰহণ কৰে।
জিলা উপায়ুক্ত বিশ্বজিৎ পেগুৰ সন্মতি সাপেক্ষেই এনে এক সিদ্ধান্ত লোৱা হৈছে বুলি মহাবিদ্যালয়খনৰ অধ্যক্ষ ড° সুৰজিৎ কুমাৰ ভাগৱতীয়ে মতপোষণ কৰিছে। কাৰ্বি আংলং জিলাৰ ছাত্ৰ-ছাত্ৰীসকলে কোনো সংশয় নোহোৱাকৈ মহাবিদ্যালয়খনত নামভৰ্তি কৰিবলৈ আহ্বান জনোৱা অধ্যক্ষগৰাকীয়ে ছাত্ৰ-ছাত্ৰীসকলক প্ৰয়োজনীয় সহযোগিতা প্ৰদান কৰা হ’ব বুলিও প্ৰকাশ কৰে।
তাৰোপৰি অধ্যক্ষগৰাকীয়ে কয় যে কলা, বিজ্ঞান আৰু বাণিজ্য শাখাৰ স্নাতক পাঠ্যক্ৰমৰ নামভৰ্তিৰ উদেশ্যে প্ৰ-পত্ৰ দাখিল কৰা কাৰ্বি জনগোষ্ঠীৰ ছাত্ৰ-ছাত্ৰীসকলক সহায় কৰিবলৈও মহাবিদ্যালয়খন সাজু আছে।
