দিল্লীৰ মালৱীয় নগৰত অৰুণাচল প্ৰদেশৰ তিনিগৰাকী যুৱতীক বৰ্ণবৈষম্যমূলক গালি-গালাজ কৰা হৰ্ষ সিঙে এতিয়া নিজৰ কৰ্মৰ বাবে লজ্জিত বুলি প্ৰকাশ কৰিছে। তেওঁ আৰু তেওঁৰ পত্নী ৰুবী জৈনে কৰা এই দুৰ্ব্যৱহাৰৰ ভিডিঅ’ ভাইৰেল হোৱাৰ পিছতে সমগ্ৰ দেশতে তীব্ৰ প্ৰতিক্ৰিয়াৰ সৃষ্টি হৈছিল। হৰ্ষ সিঙে সংবাদ মাধ্যমৰ আগত কয় যে তেওঁলোকে যি মন্তব্য কৰিছিল সেয়া পৰিস্থিতিৰ উত্তেজনাত কৰিছিল আৰু তাৰ বাবে তেওঁ উত্তৰ-পূবৰ জনসাধাৰণৰ ওচৰত ক্ষমা বিচাৰিছে। এই দম্পতীহালে যুৱতীকেইগৰাকীক বৰ্ণবাদী শব্দ ব্যৱহাৰ কৰাৰ লগতে তেওঁলোকৰ চৰিত্ৰক লৈও অতি নিম্নমানৰ কথা কৈছিল।
ঘটনাৰ সূত্ৰপাত হৈছিল এটা সামান্য কথাৰ পৰা। যুৱতীকেইগৰাকীয়ে তেওঁলোকৰ ভাড়া ঘৰত বিদ্যুৎ সংযোগৰ কাম কৰি থকাৰ সময়ত কিছু ধূলি হৰ্ষ সিঙৰ ঘৰত পৰিছিল। এই কথাকে লৈ দুয়োপক্ষৰ মাজত তৰ্ক আৰম্ভ হয় আৰু হৰ্ষ সিং আৰু তেওঁৰ পত্নীয়ে যুৱতীকেইগৰাকীক লক্ষ্য কৰি বিভিন্ন অপমানজনক মন্তব্য কৰে। আৰক্ষীৰ সন্মুখতে হোৱা এই কাজিয়াৰ ভিডিঅ’ ভাইৰেল হোৱাৰ পিছত দিল্লী আৰক্ষীয়ে গোচৰ ৰুজু কৰিছে। হৰ্ষ সিঙে জনাইছে যে তেওঁলোকে আৰক্ষীক সম্পূৰ্ণ সহায় কৰিছে আৰু ন্যায়পালিকাৰ ওপৰত তেওঁলোকৰ ভৰসা আছে। লগতে তেওঁ অনুৰোধ কৰিছে যাতে তেওঁলোকৰ পৰিয়াল আৰু বৃত্তিক এই ঘটনাৰ মাজলৈ টানি অনা নহয়।
ইফালে ছচিয়েল মিডিয়া ব্যৱহাৰকাৰীসকলে হৰ্ষ সিঙৰ এই ক্ষমাক সহজভাৱে ল’ব পৰা নাই। বহুতে মন্তব্য কৰিছে যে এয়া কেৱল খঙৰ ভমকত কোৱা কথা নহয়, বৰঞ্চ উত্তৰ-পূবৰ লোকসকলৰ প্ৰতি থকা সমাজৰ এক গভীৰ বৰ্ণবাদী মানসিকতাহে। কেন্দ্ৰীয় মন্ত্ৰী জ্যোতিৰাদিত্য সিন্ধিয়াই এই ঘটনাক অতি দুৰ্ভাগ্যজনক বুলি অভিহিত কৰিছে। তেওঁ অৰুণাচল প্ৰদেশৰ মুখ্যমন্ত্ৰী পেমা খাণ্ডুৰ সৈতে কথা পাতিছে আৰু দিল্লী আৰক্ষীৰ আয়ুক্তক দোষীৰ বিৰুদ্ধে কঠোৰ ব্যৱস্থা ল’বলৈ নিৰ্দেশ দিছে। চৰকাৰে স্পষ্ট কৰি দিছে যে উত্তৰ-পূবৰ লোকসকলৰ সুৰক্ষা আৰু আত্মসন্মানৰ লগত কোনো ধৰণৰ খেলা কৰিবলৈ দিয়া নহ’ব।
