পাকিস্তানত শেহতীয়াকৈ এটি অতি বিৰল নৱজাতকৰ জন্ম হৈছে যিয়ে চিকিৎসা বিজ্ঞানৰ জগতত সকলোকে আচৰিত কৰি তুলিছে। এই শিশুটিৰ জন্মগতভাৱে দুটা লিংগ আছে যদিও আচৰিত ধৰণে তাৰ শৰীৰত মলদ্বাৰ নাই। চিকিৎসা বিজ্ঞানৰ ভাষাত এই বিৰল অৱস্থাটোক ডিফেলিয়া বুলি কোৱা হয়। পৰিসংখ্যা অনুসৰি প্ৰায় ৬০ লাখ শিশুৰ ভিতৰত মাত্ৰ এজনৰ গাতহে এনে ধৰণৰ অস্বাভাৱিকতা দেখা পোৱাৰ সম্ভাৱনা থাকে। ইণ্টাৰনেশ্যনেল জাৰ্নেল অৱ চাৰ্জাৰী কেছ ৰিপ’ৰ্টছৰ তথ্য অনুসৰি এই বিসংগতি সম্পূৰ্ণ বা আংশিক দুই ধৰণৰে হ’ব পাৰে আৰু বেছিভাগ ক্ষেত্ৰতে ইয়াৰ সৈতে পাচনতন্ত্ৰ বা প্ৰস্ৰাৱৰ নলীৰ বিভিন্ন জটিলতা জড়িত হৈ থাকে।
প্ৰতিবেদন অনুসৰি এই শিশুটিৰ দুয়োটা লিংগ দেখাত স্বাভাৱিক যদিও এটা আনটোতকৈ আকাৰত অলপ সৰু। শিশুটিৰ দুয়োটা লিংগতে পৃথক মূত্ৰনলী থকাৰ বাবে সি দুয়োফালৰ পৰাই প্ৰস্ৰাৱ কৰিবলৈ সক্ষম হৈছে। অৱশ্যে পৰীক্ষা কৰি দেখা গৈছে যে তাৰ মূত্ৰাশয়টো সম্পূৰ্ণ নহয় আৰু ইয়াত কিছু জটিলতা আছে। আটাইতকৈ গুৰুত্বপূৰ্ণ কথাটো হ’ল যে শিশুটিৰ মলদ্বাৰ নথকাৰ বাবে চিকিৎসকে ততাতৈয়াকৈ অস্ত্ৰোপচাৰ কৰি শৌচ কৰাৰ বাবে এটা কৃত্ৰিম আৰু অস্থায়ী পথ তৈয়াৰ কৰি দিছে। এই অপাৰেচনৰ সময়তে চিকিৎসকে শিশুটিৰ কলন বা নাড়ীৰ আন এক বিসংগতিও ধৰা পেলাইছে।
ডিফেলিয়াৰ দৰে জটিল সমস্যাৰ কোনো নিৰ্দিষ্ট কাৰণ এতিয়াও বিজ্ঞানসন্মতভাৱে স্পষ্ট হোৱা নাই। বিশেষজ্ঞসকলৰ মতে গৰ্ভাৱস্থাৰ তৃতীয়ৰ পৰা ষষ্ঠ সপ্তাহৰ ভিতৰত যেতিয়া ভ্ৰুণৰ অংগসমূহ গঠন হ’বলৈ আৰম্ভ কৰে, সেই সময়ত কোনো কোষীয় বিসংগতিৰ বাবেই এনে হ’ব পাৰে। যিহেতু এনে শিশুৰ ক্ষেত্ৰত শৰীৰৰ ভিতৰৰ বিভিন্ন অংগৰ গঠন জটিল হয়, সেয়েহে এওঁলোকৰ চিকিৎসাৰ বাবে শিশু বিশেষজ্ঞ, ইউৰ’লজিষ্ট আৰু চাৰ্জনৰ এটা ডাঙৰ দলৰ প্ৰয়োজন হয়। বহু ক্ষেত্ৰত ভৱিষ্যতে শিশুটিৰ এটা লিংগ আঁতৰাই পেলোৱাৰ প্ৰয়োজন হ’ব পাৰে যাতে তাৰ প্ৰস্ৰাৱ তন্ত্ৰই স্বাভাৱিকভাৱে কাম কৰিব পাৰে।
চিকিৎসকসকলে জনাইছে যে যদি শিশুটিয়ে স্বাভাৱিকভাৱে প্ৰস্ৰাৱ কৰিব পাৰে, তেন্তে লিংগৰ অস্ত্ৰোপচাৰৰ বাবে অতিপাত খৰধৰ কৰাৰ প্ৰয়োজন নাই। প্ৰথমে শিশুটিৰ শৰীৰ সুস্থিৰ হোৱাটো জৰুৰী। পাকিস্তানৰ এই শিশুটিৰ ক্ষেত্ৰতো চিকিৎসকে অতি সাৱধানে খোজ দিছে আৰু মলদ্বাৰৰ সমস্যাটো সমাধান কৰাৰ পিছত এতিয়া তাক নিৰীক্ষণত ৰখা হৈছে। বৰ্তমান শিশুটিৰ অৱস্থা সন্তোষজনক আৰু তাক চিকিৎসালয়ৰ পৰা ঘৰলৈ যাবলৈ দিয়া হৈছে। এনে বিৰল ৰোগৰ চিকিৎসা প্ৰতিটো শিশুৰ ক্ষেত্ৰত বেলেগ বেলেগ হয় আৰু ইয়াৰ বাবে দীৰ্ঘম্যাদী পৰীক্ষা-নিৰীক্ষাৰ প্ৰয়োজন থাকে।
