হিন্দু ধৰ্মাৱলম্বীসকলৰ অতি পবিত্ৰ তীৰ্থস্থান হিচাপে পৰিচিত চাৰধাম যাত্ৰাৰ বাবে পঞ্জীয়ন প্ৰক্ৰিয়া শুকুৰবাৰৰ পৰা আনুষ্ঠানিকভাৱে আৰম্ভ হৈছে। চৰকাৰী তথ্য অনুসৰি শুকুৰবাৰে পুৱা ৭ বজাৰ পৰাই এই পঞ্জীয়ন প্ৰক্ৰিয়া আৰম্ভ কৰা হৈছে।
এইবাৰ ১৯ এপ্ৰিলত অক্ষয় তৃতীয়াৰ পবিত্ৰ দিনটোৰ পৰাই চাৰধাম যাত্ৰা আৰম্ভ হ’ব। সেইদিনাই ভক্তসকলৰ বাবে গঙ্গোত্ৰী আৰু যমুনোত্ৰী ধামৰ দুৱাৰ মুকলি কৰা হ’ব। ইয়াৰ পিছতে ২২ এপ্ৰিলত কেদাৰনাথ আৰু ২৩ এপ্ৰিলত বদ্ৰীনাথ মন্দিৰৰ দুৱাৰ দৰ্শনাৰ্থীৰ বাবে মুকলি কৰি দিয়া হ’ব।
তীৰ্থযাত্ৰীসকলে এতিয়াৰে পৰা নিজৰ মোবাইলৰ জৰিয়তে অনলাইন পদ্ধতিৰে এই পঞ্জীয়ন সম্পন্ন কৰিব পাৰিব। ইয়াৰ বাবে চৰকাৰী চাৰধাম যাত্ৰা প’ৰ্টেললৈ গৈ অথবা নিৰ্দিষ্ট মোবাইল এপ ডাউনলোড কৰি আবেদন জনাব লাগিব।
পঞ্জীয়নৰ বাবে প্ৰথমে নিজৰ মোবাইল নম্বৰ দি এটা একাউণ্ট খুলিব লাগিব আৰু তাৰ পিছত নাম, পৰিচয় পত্ৰৰ তথ্য, যাত্ৰাৰ দিন আৰু ক’ৰ পৰা যাত্ৰা আৰম্ভ কৰিব সেই সকলো বিৱৰণ দি ফৰ্মখন জমা দিব লাগিব। এই সকলো তথ্য সঠিকভাৱে দি ফৰ্মখন চাবমিট কৰিলেই পঞ্জীয়ন প্ৰক্ৰিয়া সম্পূৰ্ণ হ’ব।
অনলাইনৰ উপৰি অফলাইন যোগেও পঞ্জীয়ন কৰাৰ সুবিধা উপলব্ধ থাকিব। যাত্ৰা আৰম্ভ হোৱাৰ দুদিন আগত অৰ্থাৎ ১৭ এপ্ৰিলৰ পৰা হৃষীকেশ, হৰিদ্বাৰ আৰু ডেৰাডুনত থকা চৰকাৰী কাউণ্টাৰসমূহৰ পৰা পঞ্জীয়ন কৰিব পৰা যাব। উত্তৰাখণ্ড চৰকাৰে আশা কৰিছে যে যোৱা বছৰৰ দৰে এইবাৰো চাৰধাম যাত্ৰাত দেশ-বিদেশৰ অগণন ভক্তৰ সমাগম হ’ব। চৰকাৰীভাৱে পঞ্জীয়ন কৰিবলৈ কোনো ধৰণৰ টকাৰ প্ৰয়োজন নহয় যদিও পৰিবহণ, হেলিকপ্টাৰ সেৱা আৰু বিশেষ দৰ্শনৰ সুবিধা ল’বলৈ হ’লে ভক্তসকলে অতিৰিক্ত ধন খৰচ কৰিব লাগিব।
বিশেষকৈ বৃদ্ধ যাত্ৰীসকলৰ সুবিধাৰ বাবে চৰকাৰে হেলিকপ্টাৰৰ ব্যৱস্থা কৰিছে। কেদাৰনাথলৈ হেলিকপ্টাৰেৰে যোৱাৰ বাবে প্ৰতিজন যাত্ৰীয়ে ৬০০০ টকাৰ পৰা ৯০০০ টকা পৰ্যন্ত খৰচ কৰিব লাগিব। এই খৰচ যাত্ৰীৰ চাহিদাৰ ওপৰত ভিত্তি কৰি কিছু সালসলনিও হ’ব পাৰে।
মন কৰিবলগীয়া যে বছৰটোৰ প্ৰায় ছয় মাহ ধৰি চাৰধামৰ এই মন্দিৰসমূহ বন্ধ হৈ থাকে। সাধাৰণতে গ্ৰীষ্মকালত মন্দিৰসমূহ খোলা হয় আৰু শীতকালত পুনৰ বন্ধ কৰি দিয়া হয়। এই যাত্ৰা পোনপ্ৰথমে যমুনোত্ৰীৰ পৰা আৰম্ভ কৰি ক্ৰমে গঙ্গোত্ৰী, কেদাৰনাথ আৰু শেষত বদ্ৰীনাথ দৰ্শনেৰে সমাপ্ত কৰা হয়।
