ইউনেস্ক’ৰ স্বীকৃতিপ্ৰাপ্ত বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যানৰ সমীপত ৰাজ্যৰ পৰ্যটন খণ্ডক অধিক গতিশীল আৰু বহনক্ষম কৰাৰ লক্ষ্যৰে মুখ্যমন্ত্ৰী হিমন্ত বিশ্ব শৰ্মাই যোৱা ৩ মাৰ্চ তাৰিখে ‘কাজিৰঙা হেৰিটেজ’ আনুষ্ঠানিকভাৱে উদ্বোধন কৰে। অসম পৰ্যটন উন্নয়ন নিগম আৰু চেন্টাৰ পইণ্ট হস্পিটেলিটী গ্ৰুপৰ যুটীয়া প্ৰচেষ্টাত গঢ় লৈ উঠা এই প্ৰকল্পটো হৈছে ঐতিহ্যমণ্ডিত আতিথ্য (heritage hospitality) খণ্ডত ৰাজ্যৰ প্ৰথমটো বৃহৎ ৰাজহুৱা-ব্যক্তিগত অংশীদাৰিত্ব বা পিপিপি (PPP) প্ৰকল্প।
ব্ৰহ্মপুত্ৰৰ বানপানী প্লাৱিত অঞ্চল আৰু কহঁৰা নদীৰ পাৰত অৱস্থিত এই ঐতিহ্যমণ্ডিত প্ৰকল্পটোত ঔপনিৱেশিক যুগৰ স্থাপত্য আৰু আধুনিক আৱাসিক সুবিধাৰ এক অপূৰ্ব সংমিশ্ৰণ ঘটিছে। এই প্ৰকল্পৰ মূল কেন্দ্ৰবিন্দু হৈছে ১৯৩৮ চনত নিৰ্মিত ‘বননি বঙলা’, যাৰ অতিথিপঞ্জীয়ে কাজিৰঙা এক সাধাৰণ ঘাঁহনিৰ পৰা বিশ্বৰ অন্যতম শ্ৰেষ্ঠ বন্যপ্ৰাণী অভয়াৰণ্যলৈ ৰূপান্তৰিত হোৱাৰ গৌৰৱোজ্জ্বল ইতিহাস বহন কৰে।
দেশ-বিদেশৰ পৰ্যটকৰ সুবিধাৰ বাবে এই প্ৰকল্পত মুঠ ২৮ টা সুসজ্জিত কোঠাৰ ব্যৱস্থা কৰা হৈছে। ইয়াৰে ১০ টা কোঠা ঐতিহ্যমণ্ডিত ‘বননি বঙলা’ত থকাৰ বিপৰীতে, ৮ টা কোঠা ‘বনশ্ৰী’ত ৰখা হৈছে। বনশ্ৰীত অসমৰ পৰিৱেশ আৰু বৈষ্ণৱ পৰম্পৰাৰ সৈতে জড়িত কলা-সাহিত্যৰ সুন্দৰ প্ৰদৰ্শন কৰা হৈছে। ইয়াৰ উপৰিও কহঁৰা নদীৰ পাৰত ৬ টা নৈপৰীয়া কুটীৰ আৰু অৰ্কিড পাৰ্কৰ মনোমহা দৃশ্য উপভোগ কৰিব পৰাকৈ আছুতীয়া পুখুৰীসহ (plunge pools) ৪ টা বিলাসী চুইট নিৰ্মাণ কৰা হৈছে বুলি জানিবলৈ দিয়ে।
প্ৰকল্পটোৰ চৌহদত থকা ৪৮ খন আসনযুক্ত ৰেষ্টুৰেণ্টখনত খৰিৰ চৌকা ব্যৱহাৰ কৰি পৰম্পৰাগত অসমীয়া ব্যঞ্জন প্ৰস্তুত কৰাৰ ব্যৱস্থা কৰা হৈছে, য’ত স্থানীয় খাদ্যসামগ্ৰীৰ লগতে দক্ষিণ-পূব এছিয়াৰ খাদ্যশৈলীৰো সামান্য প্ৰভাৱ দেখিবলৈ পোৱা যায়। চিৰামিক শিল্পী জয়া বড়োৰ দ্বাৰা নিৰ্মিত আৰু তামৰ কলচীৰে সুশোভিত জাপিৰ আৰ্হিৰ চালখনে অতিথিসকললৈ অসমীয়া সমাজৰ উষ্ম আদৰণিৰ প্ৰতীক বহন কৰিছে। ইয়াৰ সমান্তৰালকৈ প্ৰকল্পটোৰ চৌহদত শিল্পী মৃদু মৌচম বৰাৰ তুলিকাত প্ৰাণ পাই উঠা বৈষ্ণৱ নৃত্য আৰু কাজিৰঙাৰ বন্যপ্ৰাণীৰ চিত্ৰকৰ্ম, লগতে সুধাকণ্ঠ ড° ভূপেন হাজৰিকা আৰু জনপ্ৰিয় শিল্পী জুবিন গাৰ্গৰ প্ৰতি শ্ৰদ্ধাঞ্জলি জ্ঞাপন কৰা সৃষ্টিৰাজিও সন্নিৱিষ্ট কৰা হৈছে সদৰী কৰে।
স্থানীয় স্থপতিবিদ, শিল্পী, ইতিহাসবিদ আৰু কাৰিকৰসকলৰ নিপুণ হাতৰ পৰশত গঢ় লৈ উঠা এই প্ৰকল্পটোৱে অসমৰ চহকী সাংস্কৃতিক ঐতিহ্যক সজীৱ কৰি ৰাখিছে। চৰকাৰী বিষয়াসকলে এই ৰাজহুৱা-ব্যক্তিগত অংশীদাৰিত্বৰ আৰ্হিক বহনক্ষম পৰ্যটনৰ এক আদৰ্শ হিচাপে অভিহিত কৰিছে। প্ৰাকৃতিক ভাৰসাম্য বিনষ্ট নকৰাকৈ কাজিৰঙাৰ এশ বছৰীয়া সংৰক্ষণৰ কাহিনী পৰ্যটকসকলৰ মাজত তুলি ধৰাৰ ক্ষেত্ৰত ‘কাজিৰঙা হেৰিটেজ’ এক গুৰুত্বপূৰ্ণ মাইলৰ খুঁটি হিচাপে পৰিগণিত হ’ব বুলি আশা কৰা হৈছে।
