২০১৮ চনৰ পৰা সমগ্ৰ অসমক জোকাৰি যোৱা অভিজিত নাথ আৰু নীলোৎপল দাসৰ হত্যাকাণ্ডৰ বিচাৰ প্ৰক্ৰিয়া এতিয়া অন্তিম পৰ্যায়ত উপনীত হৈছে। দীর্ঘ আঠ বছৰ ধৰি চলি থকা এই স্পৰ্শকাতৰ গোচৰটোৰ চূড়ান্ত ৰায়দান অহা ৬ এপ্ৰিলত নগাঁও জিলা সত্ৰ ন্যায়াধীশৰ আদালতত ঘোষণা কৰাৰ সম্ভাৱনা আছে। এই খবৰে এতিয়া সমগ্ৰ ৰাজ্যবাসীৰ লগতে ভুক্তভোগী পৰিয়াল দুটাক ন্যায়ৰ আশা প্ৰদান কৰিছে। দেশজুৰি চৰ্চা লাভ কৰা এই হত্যাকাণ্ডৰ বিচাৰ প্ৰক্ৰিয়াই অৱশেষত এক নিৰ্ণায়ক দিশত ভৰি দিছে।
২০১৮ চনৰ ৮ জুনত সংঘটিত হোৱা সেই বিৰল আৰু মৰ্মান্তিক ঘটনাই আজিও সকলোৰে মনত ভীতিৰ সঞ্চাৰ কৰে। ব্যৱসায়ী অভিজিত নাথ আৰু সংগীত শিল্পী নীলোৎপল দাসে কাৰ্বি আংলং জিলাৰ ডকমকাৰ কাংথিলেংছো জলপ্ৰপাত দৰ্শন কৰি উভতি অহাৰ পথত এক উন্মত্ত জনতাৰ আক্ৰমণৰ বলি হৈছিল। ছচিয়েল মিডিয়া হোৱাটছএপত বিয়পি পৰা মিছা উৰা বাতৰিৰ বাবে তেওঁলোকক সোপাধৰা বুলি সন্দেহ কৰি গাঁৱৰ মানুহে বৰ্বৰভাৱে হত্যা কৰিছিল। এই ঘটনাই অসমৰ সমাজ জীৱনত এক ক’লা অধ্যায়ৰ সূচনা কৰিছিল আৰু ভুৱা খবৰে যে কিমান ভয়াবহ ৰূপ ল’ব পাৰে, তাৰ এক চানেকি দাঙি ধৰিছিল।
এই জঘন্য হত্যাকাণ্ডৰ পাছত সমগ্ৰ অসমত প্ৰতিবাদৰ জোৱাৰ উঠিছিল। সচেতন নাগৰিক সমাজ আৰু মানৱ অধিকাৰ কৰ্মীসকলে দোষীক উচিত শাস্তি দিয়াৰ বাবে চৰকাৰক দাবী জনাইছিল। আৰক্ষীয়ে এই গোচৰৰ সন্দৰ্ভত ৪৭ জন লোকক আটক কৰিছিল আৰু দীৰ্ঘদিন ধৰি আদালতত ইয়াৰ শুনানি প্ৰক্ৰিয়া চলি আছিল। ভুৱা খবৰ আৰু অন্ধবিশ্বাসৰ বলি হৈ দুজন নিৰপৰাধী যুৱকে প্ৰাণ হেৰুওৱা এই ঘটনাই ছচিয়েল মিডিয়াৰ অপব্যৱহাৰৰ বিৰুদ্ধে এক ডাঙৰ সতৰ্কবাণী দিছিল।
আঠ বছৰজোৰা দীঘলীয়া অপেক্ষাৰ অন্তত এতিয়া সকলোৰে চকু আদালতৰ ৰায়দানৰ ওপৰত নিৱদ্ধ হৈছে। এই ৰায়দানে কেৱল অভিজিত আৰু নীলোৎপলৰ পৰিয়াললৈ ন্যায় কঢ়িয়াই অনায়ে নহয়, বৰঞ্চ সমাজত চলি থকা উৰা বাতৰি আৰু গণপ্ৰহাৰৰ দৰে অপৰাধৰ বিৰুদ্ধে এক কঠোৰ বাৰ্তা প্ৰেৰণ কৰিব। ৬ এপ্ৰিলৰ এই ৰায়দান অসমৰ ন্যায়িক ইতিহাসৰ বাবে এক অত্যন্ত গুৰুত্বপূৰ্ণ মুহূৰ্ত হিচাপে বিবেচিত হ’ব।
