পশ্চিম এছিয়াত আমেৰিকা, ইজৰাইল আৰু ইৰাণক কেন্দ্ৰ কৰি তীব্ৰতৰ হৈ উঠা সামৰিক সংঘাতৰ ফলত আকাশমাৰ্গ বন্ধ হোৱাৰ পৰিণতিত বিশ্বজুৰি বিমান চলাচল ব্যৱস্থাত ব্যাপক প্ৰভাৱ পৰিছে। এই পৰিস্থিতিৰ ফলত এতিয়ালৈকে ভাৰতীয় এয়াৰলাইনছসমূহে মুঠ ৪,৩৩৫টা উৰণ বাতিল কৰাৰ লগতে বিদেশী এয়াৰলাইনছসমূহেও ১,১৮৭টা উৰণ বাতিল কৰিছে বুলি সোমবাৰে ৰাজ্যসভাত অৱগত কৰে কেন্দ্ৰীয় অসামৰিক বিমান পৰিবহণ মন্ত্ৰী কে. ৰামমোহন নাইডুৱে।
ৰাজ্যসভাৰ প্ৰশ্নোত্তৰ পৰ্বত এক প্ৰশ্নৰ উত্তৰত মন্ত্ৰীগৰাকীয়ে জনায় যে পশ্চিম এছিয়াৰ বিভিন্ন দেশৰ আকাশমাৰ্গ বন্ধ হৈ থকাৰ বাবে বিমান চলাচল ব্যাহত হৈছে। তেওঁ স্পষ্ট কৰি দিয়ে যে এনে জটিল পৰিস্থিতিত বিমান চলাচলৰ ক্ষেত্ৰত যাত্ৰীৰ সুৰক্ষা আৰু নিৰাপত্তাক চৰকাৰে অগ্ৰাধিকাৰ দিছে। “যেতিয়া কোনো অঞ্চলৰ আকাশপথ বন্ধ হৈ থাকে, তেতিয়া সেই অঞ্চলত উৰণ চলোৱাটো যুক্তিযুক্ত নহয়,” বুলি তেওঁ মন্তব্য কৰে।
মন্ত্ৰী নাইডুৱে লগতে উল্লেখ কৰে যে এই সংকটকালীন পৰিস্থিতিতো ভাৰতৰ অসামৰিক বিমান পৰিবহণ মন্ত্ৰালয় আৰু অসামৰিক বিমান চলাচল সঞ্চালকালয়ে (DGCA) সংশ্লিষ্ট দেশসমূহৰ নিয়ামক সংস্থাসমূহৰ সৈতে নিৰন্তৰ যোগাযোগ ৰাখি আছে। তেওঁ কয় যে যেতিয়াই কোনো আকাশপথত উৰণ চলাবলৈ সুবিধা উপলব্ধ হৈছে, তেতিয়াই ভাৰতীয় বিমান সংস্থাসমূহে উৰণ চলাইছে।
তেওঁ জনোৱা মতে, এই সংকটৰ মাজতো প্ৰায় ২,১৯,৭৮০ জন যাত্ৰীয়ে বিমানযোগে যাত্ৰা সম্পন্ন কৰিছে। ভাৰতীয় বিমান সংস্থাসমূহে স্থানীয় কৰ্তৃপক্ষৰ সৈতে সমন্বয় সাধন কৰি সুৰক্ষিতভাৱে বিমান চলাচল অব্যাহত ৰাখিবলৈ প্ৰয়োজনীয় সকলো ব্যৱস্থা গ্ৰহণ কৰিছে বুলিও তেওঁ নিশ্চিত কৰে।
ইয়াৰ লগতে মন্ত্ৰীগৰাকীয়ে কয় যে পশ্চিম এছিয়াৰ কিছু আকাশমাৰ্গ এতিয়াও বন্ধ হৈ আছে আৰু সেইসমূহ মুকলি নোহোৱালৈকে স্বাভাৱিক বিমান চলাচল আৰম্ভ কৰা সম্ভৱ নহ’ব। তেওঁ পুনৰ দোহাৰে যে যাত্ৰীৰ সুৰক্ষা নিশ্চিত কৰাৰ পিছতেইহে নিয়মীয়া বিমান চলাচল পুনৰ আৰম্ভ কৰাৰ সিদ্ধান্ত লোৱা হ’ব।
পশ্চিম এছিয়াত চলি থকা এই সংঘাতে কেৱল ৰাজনৈতিক আৰু সামৰিক ক্ষেত্ৰতেই নহয়, বিশ্বজুৰি বাণিজ্য, যাতায়াত আৰু বিমান চলাচল ব্যৱস্থাতো গভীৰ প্ৰভাৱ পেলোৱা দেখা গৈছে। বিশেষজ্ঞসকলৰ মতে, যদি এই সংঘাত শীঘ্ৰে নিয়ন্ত্ৰণলৈ অনা নহয়, তেন্তে বিশ্বব্যাপী বিমান চলাচল আৰু পৰ্যটন খণ্ডত ইয়াৰ দীৰ্ঘম্যাদী প্ৰভাৱ পৰাৰ সম্ভাৱনা নাকচ কৰিব নোৱাৰি।
