অহা ৯ এপ্ৰিলত অনুষ্ঠিত হ‘বলগীয়া অসম বিধানসভা নিৰ্বাচনৰ প্ৰতি লক্ষ্য ৰাখি ভাৰতৰ নিৰ্বাচন আয়োগে সোমবাৰে ৰাজ্যখনত পাঁচগৰাকী জ্যেষ্ঠ আৰক্ষী অধীক্ষক নিযুক্তি দিয়াৰ লগতে এগৰাকী বিশেষ নিৰ্বাচনী পৰ্যবেক্ষক নিযুক্তি দিছে। নিৰ্বাচন প্ৰক্ৰিয়া সুচাৰুৰূপে, শান্তিপূৰ্ণ আৰু নিকাভাৱে সম্পন্ন কৰাৰ স্বাৰ্থত আয়োগে এই গুৰুত্বপূৰ্ণ নিৰ্দেশনা জাৰি কৰিছে।
ৰাজ্যৰ মুখ্য সচিবলৈ প্ৰেৰণ কৰা এক নিৰ্দেশনাত নিৰ্বাচন আয়োগে এই নিযুক্তি প্ৰক্ৰিয়া তাৎক্ষণিকভাৱে কাৰ্যকৰী কৰিবলৈ আৰু ১৭ মাৰ্চৰ ভিতৰত নতুন বিষয়াকেইগৰাকীয়ে নিজৰ নিজৰ কাৰ্যভাৰ গ্ৰহণ কৰাৰ প্ৰতিবেদন দাখিল কৰিবলৈ কঠোৰ নিৰ্দেশ দিছে। আয়োগৰ নিৰ্দেশনা অনুসৰি, ভাৰতীয় আৰক্ষী সেৱাৰ বিষয়া সোমালিন শুভদৰ্শিনীক মাজুলীৰ এছএছপি, আৰ চৌতাল কুমাৰক দক্ষিণ শালমৰাৰ এছএছপি, আঞ্চল চৌহানক শদিয়াৰ এছএছপি, সুধাকৰ সিঙক চিৰাং জিলাৰ এছএছপি আৰু মোহন লাল মীনাক ধেমাজিৰ এছএছপি হিচাপে নিযুক্তি দিয়া হৈছে। ইয়াৰ লগতে আয়োগে স্পষ্ট কৰি দিছে যে সদ্যহতে বদলি হোৱা পূৰ্বৰ বিষয়াকেইগৰাকীক নিৰ্বাচন সম্পূৰ্ণ নোহোৱালৈকে কোনো ধৰণৰ নিৰ্বাচন সম্পৰ্কীয় দায়িত্ব অৰ্পণ কৰিব পৰা নাযাব।
আন এখন সুকীয়া নিৰ্দেশনাৰ জৰিয়তে নিৰ্বাচন আয়োগে অৱসৰপ্ৰাপ্ত আইএএছ বিষয়া মনজিৎ সিঙক অসম নিৰ্বাচনৰ বাবে বিশেষ পৰ্যবেক্ষক হিচাপে নিযুক্তি প্ৰদান কৰিছে। তেওঁ ৰাজ্যখনৰ নিৰ্বাচনী প্ৰস্তুতি আৰু পৰিচালনাৰ বুজ ল‘বলৈ সঘনাই অসম ভ্ৰমণ কৰিব আৰু প্ৰয়োজনীয় ব্যৱস্থা গ্ৰহণৰ বাবে আয়োগক প্ৰতিবেদন দাখিল কৰিব। এই সমগ্ৰ প্ৰক্ৰিয়াত অসমৰ মুখ্য নিৰ্বাচনী বিষয়াই বিশেষ পৰ্যবেক্ষকগৰাকীক প্ৰয়োজনীয় প্ৰশাসনিক আৰু অন্যান্য সকলো সা-সুবিধা প্ৰদান কৰিব।
নিৰ্বাচনৰ দিন ঘোষণাৰ লগে লগে সমগ্ৰ ৰাজ্যত আদৰ্শ নিৰ্বাচনী বিধি (এমচিচি) কঠোৰভাৱে ৰূপায়ণ কৰাৰ বাবেও আয়োগে নিৰ্দেশ দিছে। নীতিগত ঘোষণা আৰু সিদ্ধান্তৰ ক্ষেত্ৰত এই বিধি কেন্দ্ৰীয় আৰু ৰাজ্য দুয়োখন চৰকাৰৰ বাবেই প্ৰযোজ্য হ‘ব বুলি আয়োগে স্পষ্ট কৰিছে। আয়োগে লগতে জানিবলৈ দিয়ে যে নিৰ্বাচনী প্ৰচাৰৰ সময়ত প্ৰতিগৰাকী নাগৰিকৰ গোপনীয়তা ৰক্ষা কৰাটো বাধ্যতামূলক আৰু ব্যক্তিগত বাসগৃহৰ বাহিৰত প্ৰদৰ্শন বা পিকেটিং কৰিবলৈ দিয়া নহ’ব। গৃহস্থৰ সন্মতি অবিহনে কোনো ব্যক্তিগত ভূমি, অট্টালিকা বা দেৱালত ৰাজনৈতিক দলৰ পতাকা, বেনাৰ বা পোষ্টাৰ লগাব নোৱাৰিব বুলিও কঠোৰ সকীয়নি দিয়া হৈছে।
উল্লেখ্য যে, অসমৰ ১২৬ খন বিধানসভা আসনৰ বাবে অহা ৯ এপ্ৰিলত মাত্ৰ এটা পৰ্যায়ত নিৰ্বাচন অনুষ্ঠিত হ’ব আৰু ৪ মে’ত ইয়াৰ ভোটগণনা কৰা হ’ব। এই নিৰ্বাচনত মুখ্যমন্ত্ৰী হিমন্ত বিশ্ব শৰ্মাৰ নেতৃত্বাধীন শাসকীয় বিজেপি মিত্ৰজোঁট আৰু ক্ষমতা পুনৰুদ্ধাৰৰ লক্ষ্যৰে প্ৰতিদ্বন্দ্বিতাত অৱতীৰ্ণ হোৱা বিৰোধী কংগ্ৰেছৰ মাজত তীব্ৰ যুঁজ হোৱাৰ সম্ভাৱনা আছে। ২০২১ চনৰ বিধানসভা নিৰ্বাচনত বিজেপি, অসম গণ পৰিষদ আৰু ইউপিপিএল সন্মিলিত এনডিএ মিত্ৰজোঁটে ৭৫ খন আসন লাভ কৰি চৰকাৰ গঠন কৰিছিল। সেইবাৰ নিৰ্বাচনত ভোটদানৰ হাৰ আছিল প্ৰায় ৮৬.২ শতাংশ।
