ভাৰতীয় জনতা পাৰ্টীয়ে আগন্তুক ২০২৬ বৰ্ষৰ অসম বিধানসভা নিৰ্বাচনৰ বাবে প্ৰকাশ কৰা ৮৮ জনীয়া প্ৰথমখন প্ৰাৰ্থী তালিকাই ৰাজ্যৰ ৰাজনৈতিক মহলত ব্যাপক জোকাৰণিৰ সৃষ্টি কৰিছে। পৰিৱৰ্তিত ৰাজনৈতিক সমীকৰণ আৰু প্ৰতিষ্ঠানবিৰোধী ঢৌ প্ৰতিহত কৰাৰ কৌশল হিচাপে শাসকীয় দলটোৱে এইবাৰৰ তালিকাত বৃহৎ সালসলনি ঘটোৱা পৰিলক্ষিত হৈছে। প্ৰকাশিত তালিকাখনৰ বিশ্লেষণৰ পৰা দেখা গৈছে যে দলটোৱে বৰ্তমানৰ বিধানসভাত প্ৰতিনিধিত্ব কৰি থকা কেবিনেট মন্ত্ৰী আৰু প্ৰাক্তন মন্ত্ৰীসহ মুঠ ১৯ গৰাকী বিধায়কক এইবাৰ টিকটৰ পৰা বঞ্চিত কৰি তেওঁলোকৰ স্থানত নতুন মুখক অগ্ৰাধিকাৰ দিছে। নিৰ্বাচনৰ ঠিক পূৰ্বে বিৰোধী শিবিৰৰ পৰা অহা কেইবাগৰাকীও জ্যেষ্ঠ নেতা আৰু প্ৰাক্তন সাংসদক প্ৰাৰ্থিত্ব প্ৰদান কৰিবলৈ গৈয়ে কেন্দ্ৰীয় নেতৃত্বই এনে কঠোৰ সিদ্ধান্ত গ্ৰহণ কৰিবলগীয়া হৈছে।
এই ব্যাপক সালসলনিৰ ভিতৰত আটাইতকৈ চৰ্চিত বিষয়টো হৈছে সদ্যযোগদানকাৰী প্ৰভাৱশালী নেতাসকলক স্থান দিয়াৰ ৰণনীতি। শেহতীয়াকৈ কংগ্ৰেছ ত্যাগ কৰি বিজেপিত যোগদান কৰা দুগৰাকী শীৰ্ষ নেতা ক্ৰমে প্ৰদ্যুৎ বৰদলৈ আৰু ভূপেন বৰাক প্ৰাৰ্থীত্ব প্ৰদান কৰা হৈছে। প্ৰদ্যুৎ বৰদলৈক দিছপুৰ সমষ্টিৰ পৰা প্ৰাৰ্থিত্ব প্ৰদান কৰাৰ ফলত বৰ্তমানৰ বিধায়ক অতুল বৰা টিকটৰ পৰা বঞ্চিত হৈছে। একেদৰে, বিহপুৰীয়া সমষ্টিত বৰ্তমানৰ বিধায়ক অমিয় কুমাৰ ভূঞাৰ টিকট কৰ্তন কৰি সদ্যযোগদানকাৰী নেতা ভূপেন কুমাৰ বৰাক প্ৰাৰ্থিত্ব প্ৰদান কৰা হৈছে। আনহাতে, প্ৰাক্তন সাংসদ পল্লৱ লোচন দাস আৰু ৰাজদীপ ৰয়ক ক্ৰমে বিশ্বনাথ আৰু শিলচৰ সমষ্টিৰ পৰা টিকট দিয়াৰ বাবে এই দুয়োটা সমষ্টিৰ বৰ্তমানৰ বিধায়ক ক্ৰমে প্ৰমোদ বৰঠাকুৰ আৰু দীপায়ন চক্ৰৱৰ্তীয়ে নিজৰ প্ৰাৰ্থিত্ব হেৰুৱাইছে। ভৱানীপুৰ সমষ্টিতো বৰ্তমানৰ বিধায়ক ফণীধৰ তালুকদাৰৰ স্থানত সমষ্টি সলনি কৰি মন্ত্ৰী ৰঞ্জিত কুমাৰ দাসক প্ৰাৰ্থিত্ব দিয়া হৈছে।
উজনি আৰু মধ্য অসমৰ আন কেইবাটাও গুৰুত্বপূৰ্ণ সমষ্টিত দলটোৱে বৰ্তমানৰ বিধায়কসকলক বাদ দিছে। দুলীয়াজান আৰু মাহমৰা সমষ্টিৰ বৰ্তমানৰ বিধায়ক ক্ৰমে তেৰছ গোৱালা আৰু যোগেন মহন শেহতীয়াকৈ ৰাজ্যসভালৈ মনোনীত হোৱাৰ পৰিপ্ৰেক্ষিতত এই দুখন আসনত ক্ৰমে প্ৰাক্তন কেন্দ্ৰীয় মন্ত্ৰী ৰামেশ্বৰ তেলী আৰু সূৰুজ দিহিঙীয়াক প্ৰাৰ্থিত্ব প্ৰদান কৰা হৈছে। ইয়াৰোপৰি বিহালী সমষ্টিত জ্যেষ্ঠ নেতা ৰঞ্জিত দত্তৰ স্থানত মুনীন্দ্ৰ দাস, হোজাইত ৰামকৃষ্ণ ঘোষৰ স্থানত শিলাদিত্য দেৱ, বৰচলাত গণেশ কুমাৰ লিম্বুৰ স্থানত ঋতু বৰণ শৰ্মা আৰু মঙলদৈ সমষ্টিত বসন্ত দাসৰ পৰিৱৰ্তে নীলিমা দেৱীক প্ৰাৰ্থী হিচাপে অৱতীৰ্ণ কৰোৱা হৈছে।
নামনি অসম, বৰাক উপত্যকা আৰু পাহাৰীয়া জিলাকেইখনতো দলটোৱে প্ৰাৰ্থী নিৰ্বাচনত গুৰুত্বপূৰ্ণ পৰিৱৰ্তন আনিছে। নামনি অসমৰ বিজনী সমষ্টিত অজয় কুমাৰ ৰায়ৰ পৰিৱৰ্তে অৰূপ কুমাৰ দে আৰু পলাশবাৰী সমষ্টিত হেমাংগ ঠাকুৰীয়াৰ পৰিৱৰ্তে হিমাংশু শেখৰ বৈশ্যক টিকট দিয়া হৈছে। একেদৰে বৰাক উপত্যকাৰ উদাৰবন্দ সমষ্টিত মিহিৰ কান্তি সোমৰ স্থানত ৰাজদ্বীপ গোৱালা আৰু ধলাই সমষ্টিত নীহাৰ ৰঞ্জন দাসৰ স্থানত অমিয় কান্তি দাসক প্ৰক্ষেপ কৰা হৈছে। পাহাৰীয়া জিলাকেইখনৰ ভিতৰত বোকাজানত নোমল মমিনৰ স্থানত সূৰ্য ৰংফাৰ, হাওৰাঘাটত দৰসিং ৰংহাংৰ স্থানত লুন্সিং টেৰন, ডিফুত বিদ্যাছিং ইংলেংৰ স্থানত নিচো টেৰাংপী আৰু হাফলং সমষ্টিত মন্ত্ৰী নন্দিতা গাৰ্লোচাৰ পৰিৱৰ্তে ৰূপালী লঙ্থাচাক প্ৰাৰ্থিত্ব প্ৰদান কৰা হৈছে। এক বৃহৎসংখ্যক বৰ্তমানৰ বিধায়কৰ টিকট কৰ্তন হোৱা আৰু সদ্যযোগদানকাৰী নেতাই অগ্ৰাধিকাৰ পোৱা বিষয়টোৱে এতিয়া দলৰ অভ্যন্তৰত কিদৰে প্ৰতিক্ৰিয়াৰ সৃষ্টি কৰে, সেয়া পৰৱৰ্তী সময়ত লক্ষণীয় হ’ব।
