মহিলাসকলৰ নামত আঁচনি দি প্ৰলোভিত কৰিলেও ৰাজনীতিত তেওঁলোকক আগবঢ়াই অনাৰ ক্ষেত্ৰত বিশেষ গুৰুত্ব দিয়া নাই বিজেপিয়ে।
আগন্তুক ২০২৬ চনৰ অসম বিধানসভা নিৰ্বাচনত বিজেপিৰ প্ৰাৰ্থী তালিকাত মহিলাৰ প্ৰতিনিধিত্বক লৈ প্ৰশ্নৰ অৱতাৰণা হৈছে। এইবাৰ মহিলাৰ প্ৰতিনিধিত্ব ২০২১ চনৰ নিৰ্বাচনতকৈও এগৰাকী কম।
এইবাৰ প্ৰাৰ্থিত্ব লাভ কৰা ছয়গৰাকী প্ৰাৰ্থী হ’ল মাধৱী দাস (বীৰচিং-জৰুৱা), জ্যোস্না কলিতা (ছয়গাঁও), নিলিমা দেৱী (মংগলদৈ), অজন্তা নেওগ (গোলাঘাট), নিছ’ তেৰাংপি (ডিফু) আৰু ৰূপালী লাংথাছা (হাফলং)।
এইক্ষেত্ৰত নেতৃত্বই দিয়া পূৰ্বৰ আশ্বাসৰ প্ৰতিফলন নঘটাত প্ৰশ্ন উত্থাপন হৈছে। নিৰ্বাচনৰ প্ৰাকমুহূৰ্তত মুখ্যমন্ত্ৰী হিমন্ত বিশ্ব শৰ্মাই বাৰে বাৰে ইংগিত দিছিল যে দলটোৱে যুৱ আৰু নতুন মুখৰ লগতে মহিলা প্ৰাৰ্থীৰ সংখ্যাও বৃদ্ধি কৰিব।
নিৰ্বাচনী কুচকাৱাজ চলি থকাৰ সময়ত মুখ্যমন্ত্ৰী শৰ্মাই একাধিকবাৰ কৈছিল যে বিজেপিয়ে যুৱ আৰু শক্তিশালী মুখৰ লগতে মহিলাৰ প্ৰতিনিধিত্ব বৃদ্ধিত অগ্ৰাধিকাৰ দিব। বিজেপিৰ প্ৰাৰ্থী তালিকাখনত অৱশ্যে তাৰ কোনো প্ৰতিফলন নঘটিল।
২০২১ চনত বিজেপিয়ে মনোনীত প্ৰাৰ্থীৰ ভিতৰত ৭ গৰাকী মহিলাক প্ৰক্ষেপ কৰাৰ বিপৰীতে কংগ্ৰেছে ইয়াৰ ৯৫ গৰাকী প্ৰাৰ্থীৰ ভিতৰত ৯ গৰাকী মহিলাক মনোনীত কৰিছিল।
আনহাতে, ২০১৬ চনত বিজেপিয়ে প্ৰতিদ্বন্দ্বিতা কৰা ৮৪খন আসনৰ ভিতৰত ৬ গৰাকী মহিলাক প্ৰক্ষেপ কৰাৰ বিপৰীতে কংগ্ৰেছে ১২২ খনৰ ভিতৰত ১৭ গৰাকী মহিলাক মনোনীত কৰিছিল।
ভাৰতীয় নিৰ্বাচন আয়োগৰ তথ্যই ইংগিত দিয়ে যে ভোটাৰ হিচাপে মহিলাৰ অংশগ্ৰহণ বৃদ্ধি পোৱাৰ পিছতো অসম বিধানসভাত মহিলাৰ প্ৰতিনিধিত্ব সীমিত হৈয়েই আছে। ২০১৬ চনত দলসমূহৰ মাজত ৯১গৰাকী মহিলা প্ৰাৰ্থীৰ ভিতৰত মাত্ৰ ৮গৰাকীহে নিৰ্বাচিত হৈছিল। ইপিনে, ২০২১ চনত এই সংখ্যা আৰু হ্ৰাস পাইছিল, ১২৬ জনীয়া সদনত ৭৬ গৰাকী মহিলা প্ৰাৰ্থীৰ মাত্ৰ ছয়গৰাকীয়েহে আসন লাভ কৰিছিল।
এই পৰিসংখ্যাই ৰাজনৈতিক দলসমূহে অধিক প্ৰতিনিধিত্বৰ প্ৰতিশ্ৰুতি দি অহাৰ পিছতো নিৰ্বাচনত মহিলাৰ অংশগ্ৰহণ আৰু বিধানসভাত তেওঁলোকৰ প্ৰতিনিধিত্বৰ মাজত বিৰাট ব্যৱধানকে তুলি ধৰিছে।
