বিন্নাকান্দি সমষ্টিৰ পৰা বিধানসভা নিৰ্বাচনত প্ৰতিদ্বন্দ্বিতা কৰা অল ইণ্ডিয়া ইউনাইটেড ডেম’ক্ৰেটিক ফ্ৰণ্টৰ (এআইইউডিএফ) মুৰব্বী বদৰুদ্দিন আজমলে নিৰ্বাচনী শপতনামাত ৪.৪৫ কোটিতকৈ অধিক ধাৰৰ লগতে মুঠ ১৬৯ কোটি টকাৰ অধিক সম্পত্তিৰ কথা ঘোষণা কৰিছে।
মনোনয়ন পত্ৰৰ সৈতে দাখিল কৰা শপতনামা অনুসৰি আজমলৰ মুঠ অস্থাৱৰ সম্পত্তিৰ মূল্য প্ৰায় ৫২.৪৩ কোটি টকা। আনহাতে তেওঁৰ স্থাৱৰ সম্পত্তিৰ মূল্য প্ৰায় ১৪৯.১২ কোটি টকা। তেওঁৰ পত্নী ৰিজৱানা বদৰুদ্দিন আজমলৰ প্ৰায় ৩১.০৮ লাখ টকাৰ অস্থাৱৰ সম্পত্তি আৰু প্ৰায় ৬.৮২ লাখ টকাৰ স্থাৱৰ সম্পত্তি আছে।
এআইইউডিএফৰ মুৰব্বীগৰাকীৰ শপতনামাত ৪.৪৫ কোটি টকাৰ ধাৰৰ কথাও উল্লেখ কৰা হৈছে, য’ত মূলতঃ বিত্তীয় প্ৰতিষ্ঠানৰ পৰা ঋণ লোৱা হৈছে। আয়ৰ ক্ষেত্ৰত আজমলে ২০২৪-২৫ বিত্তীয় বৰ্ষত প্ৰায় ৩.২১ কোটি টকা উপাৰ্জনৰ তথ্য দিয়াৰ বিপৰীতে একে সময়ছোৱাত তেওঁৰ পত্নীয়ে ৪৯,৯৫০ টকা আয় ঘোষণা কৰে।
বিগত দশকত আজমলৰ ঘোষিত সম্পত্তিৰ তীব্ৰ উত্থান ঘটিছে। তেওঁৰ পূৰ্বৰ শপতনামাৰ সৈতে তুলনা কৰিলে দেখা যায় যে যোৱা ১০ বছৰত আজমলৰ সম্পত্তিৰ পৰিমানৰ ব্যাপক বৃদ্ধি ঘটিছে। ২০১৪ চনৰ লোকসভা নিৰ্বাচনৰ সময়ত আজমলে প্ৰায় ৪৪-৫০ কোটি টকাৰ ভিতৰত সম্পত্তি ঘোষণা কৰিছিল।
২০১৯ চনৰ লোকসভা নিৰ্বাচনলৈকে তেওঁৰ মুঠ সম্পত্তি যথেষ্ট বৃদ্ধি পাই প্ৰায় ৭৮-৯০ কোটি টকা হৈছে, যিয়ে পাঁচ বছৰৰ ভিতৰত প্ৰায় দুগুণ বৃদ্ধি দেখুৱায়। এই বৃদ্ধিৰ মূল কাৰণ হৈছে ৫২ কোটিৰো অধিক মূল্যৰ অস্থাৱৰ সম্পত্তিৰ লগতে বৰ্তমান প্ৰায় ১৪৯ কোটি টকাৰ স্থাৱৰ সম্পত্তি বৃদ্ধি।
শপতনামাৰ পৰিশিষ্টসমূহত বিতংভাৱে উল্লেখ কৰা তথ্য মতে তেওঁৰ বিনিয়োগসমূহে ৰিয়েল এষ্টেট, ব্যৱসায়িক বিনিয়োগ, শ্বেয়াৰ আৰু বিত্তীয় পৰিযোজনাসমূহৰ ওপৰত বিস্তৃত। এআইইউডিএফৰ মুৰব্বীগৰাকীয়ে বেংকত জমা ধন, শ্বেয়াৰ, বণ্ড, বিভিন্ন ব্যৱসায়িক উদ্যোগৰ অংশীদাৰিত্বকে ধৰি বহুতো বিনিয়োগৰ বিশদ বিৱৰণ দিছে। শপতনামাত হোজাই, গুৱাহাটী আৰু কৰ্ণাটকৰ কিছু অংশৰ দৰে স্থানত থকা সম্পত্তিৰ তালিকাও দিয়া হৈছে।
আইনী দিশত শপতনামাত আজমলৰ বিৰুদ্ধে এটা বিচাৰাধীন অপৰাধমূলক গোচৰৰ কথা উল্লেখ কৰা হৈছে, যিটো অভিযোগ আপত্তিজনক মন্তব্যৰ সৈতে জড়িত। সেইটো বৰ্তমান তদন্তৰ অধীনত আছে। শপতনামাত আৰু কোৱা হৈছে যে আজমলৰ সৰ্বোচ্চ শিক্ষাগত অৰ্হতা হৈছে দাৰুল উলুম দেওবন্দৰ পৰা মেট্ৰিক উত্তীৰ্ণ।
