প্ৰায় পাঁচ দশকৰ মূৰত পাকিস্তানৰ একমাত্ৰ স্থানীয় সুৰা কোম্পানী মুৰী ব্ৰুৱাৰীয়ে পুনৰ সুৰা ৰপ্তানি আৰম্ভ কৰিছে। যদিও দেশখনৰ মুছলমান জনসংখ্যাৰ বাবে সুৰা পান কৰা নিষিদ্ধ, তথাপিও এই কোম্পানীটোৱে অৰ্গেনাইজেশ্যন অৱ ইছলামিক কো-অপাৰেচন বা অ‘আইচিৰ অন্তৰ্গত নোহোৱা দেশসমূহলৈ বিয়েৰ আৰু অন্যান্য সুৰা ৰপ্তানি কৰিবলৈ লৈছে। কোম্পানীটোৰ ৰপ্তানি প্ৰবন্ধক ৰমিজ শ্বাহে জানিবলৈ দিয়া মতে, যোৱা এপ্ৰিল মাহত যুক্তৰাজ্য, জাপান, পৰ্তুগাল আৰু থাইলেণ্ড আদি দেশলৈ সুৰা প্ৰেৰণ কৰা হৈছে। ইয়াৰ পূৰ্বেও কোম্পানীটোৱে পেকেজড জুচ, মিনাৰেল ৱাটাৰ আৰু ফলৰ সোৱাদযুক্ত পানীয় ৰপ্তানি কৰি আহিছে।
২০২৫ চনত পাকিস্তান চৰকাৰৰ পৰা সুৰা ৰপ্তানিৰ বাবে এই কোম্পানীটোৱে আনুষ্ঠানিক অনুমতি লাভ কৰিছিল। ১৮৬০ চনত ব্ৰিটিছ সৈন্যক বিয়েৰ যোগান ধৰাৰ উদ্দেশ্যেৰে এডৱাৰ্ড ডায়াৰ আৰু এডৱাৰ্ড হোৱাইম্পাৰ নামৰ দুজন ব্ৰিটিছ উদ্যোগীয়ে এই মুৰী ব্ৰুৱাৰী স্থাপন কৰিছিল। ১৯৪৭ চনৰ দেশ বিভাজনৰ পূৰ্বে এটা পাৰ্চী পৰিয়ালে এই কোম্পানীটো ক্ৰয় কৰিছিল। বৰ্তমান ইছফান্যৰ ভাণ্ডাৰাই এই কোম্পানীটো পৰিচালনা কৰি আছে। তেওঁ পাকিস্তানৰ নেশ্যনেল এছেম্বলীৰ এজন সদস্য হোৱাৰ লগতে এই ৰপ্তানি অনুজ্ঞাপত্ৰ লাভ কৰাৰ ক্ষেত্ৰতো গুৰুত্বপূৰ্ণ ভূমিকা পালন কৰিছে।
ইয়াৰ পূৰ্বে ২০২১ চনত পাকিস্তান চৰকাৰে বেলুচিস্তানত চীনৰ দ্বাৰা পৰিচালিত এটা কোম্পানীক সুৰা উৎপাদনৰ অনুমতি দিছিল। এইটো ঘাইকৈ চীন-পাকিস্তান অৰ্থনৈতিক কৰিডৰকে ধৰি বিভিন্ন প্ৰকল্পত নিয়োজিত হাজাৰ হাজাৰ চীনা শ্ৰমিকৰ চাহিদা পূৰণৰ বাবে কৰা হৈছিল। উল্লেখযোগ্য যে, ১৯৭৭ চনলৈকে পাকিস্তানৰ সকলো নাগৰিকৰ বাবে সুৰা উপলব্ধ আছিল। কিন্তু ইছলামিক সংগঠনসমূহৰ হেঁচাত পৰি তেতিয়াৰ প্ৰধানমন্ত্ৰী জুলফিকাৰ আলী ভুট্টোৱে ইয়াৰ ওপৰত নিষেধাজ্ঞা আৰোপ কৰে। তাৰ পাছৰ পৰা মুৰী ব্ৰুৱাৰীয়ে কেৱল অ-মুছলমান নাগৰিক আৰু বিদেশীসকলকহে অনুজ্ঞাপত্ৰ থকা দোকানৰ জৰিয়তে সুৰা বিক্ৰী কৰিব পাৰিছিল। এই নিষেধাঞ্জাৰ পূৰ্বে কোম্পানীটোৱে ভাৰত, আফগানিস্তান আৰু আমেৰিকা যুক্তৰাষ্ট্ৰলৈকো সুৰা ৰপ্তানি কৰিছিল।
ৰপ্তানিৰ অনুমতি পোৱাৰ পাছত মুৰী ব্ৰুৱাৰীয়ে এতিয়া আন্তঃৰাষ্ট্ৰীয় বিতৰকসকলৰ সৈতে কাম কৰি আছে। কোম্পানীটোৱে প্ৰথমে এক শক্তিশালী ৰপ্তানি নেটৱৰ্ক গঢ়ি তোলাৰ পৰিকল্পনা কৰিছে আৰু তাৰ পাছত উৎপাদন বৃদ্ধি কৰিব বিচাৰিছে। যোৱা কেইবছৰমানত কোম্পানীটোৱে সুৰাবিহীন পানীয়ৰ পৰা যথেষ্ট ধন উপাৰ্জন কৰিছে আৰু যোৱা বিত্তীয় বৰ্ষত প্ৰায় ১০০ মিলিয়ন ডলাৰ ৰাজহ সংগ্ৰহ কৰিছে। এতিয়া কোম্পানীটোৱে সমগ্ৰ বিশ্বতে নিজৰ ব্যৱসায় সম্প্ৰসাৰণ কৰি অধিক বিদেশী মুদ্ৰা অৰ্জন কৰাৰ লক্ষ্য স্থিৰ কৰিছে।
