প্ৰাণৰ শিল্পী জুবিন গাৰ্গৰ ৰহস্যজনক হত্যাকাণ্ডৰ গোচৰৰ অন্যতম অভিযুক্ত তথা শিল্পীগৰাকীৰ বাদ্যযন্ত্ৰী শেখৰজ্যোতি গোস্বামীৰ জামিন আবেদনৰ শুনানি সোমবাৰে ফাষ্টট্ৰেক আদালতত সম্পন্ন হয়। দুয়োটা পক্ষৰ যুক্তি-তৰ্ক শুনাৰ অন্তত আদালতে শেখৰৰ জামিনৰ ৰায় সংৰক্ষণ কৰি ৰাখে। অহা ২৮ মে’ত আদালতে এই সন্দৰ্ভত চূড়ান্ত ৰায় প্ৰদান কৰিব।
সোমবাৰে অনুষ্ঠিত হোৱা এই শুনানিৰ সময়ত অভিযুক্তৰ অধিবক্তাৰ বিপৰীতে চৰকাৰী অধিবক্তা জিয়াউৰ কামাৰকে ধৰি পাঁচজনীয়া এটা অধিবক্তাৰ দলে শেখৰজ্যোতিৰ জামিন লাভৰ তীব্ৰ বিৰোধিতা কৰি যুক্তি প্ৰদৰ্শন কৰে।
“শেখৰজ্যোতি গোস্বামীৰ জামিন আবেদনৰ শুনানি আজি সম্পন্ন হৈছে। আমাৰ তৰফৰ পৰা আদালতত দাঙি ধৰিবলগীয়া সকলো যুক্তি স্পষ্টকৈ ক’লো। যিহেতু অহা ২৬ মে’ত গোচৰটোৰ ৭ অভিযুক্তৰ চাৰ্জফ্ৰেমৰ ৰায়দান কৰা হ’ব, সেয়েহে ২৮ মে’তহে শেখৰজ্যোতিৰ জামিন আবেদনৰ ৰায় দিয়া হ’ব।”
উল্লেখ্য যে, জুবিন গাৰ্গৰ মৃত্যুৰ পিছতে আৰক্ষীয়ে গ্ৰেপ্তাৰ কৰা শেখৰজ্যোতি গোস্বামী বিগত বৰ্ষৰ ১৭ অক্টোবৰৰ পৰা হাফলং উপ-কাৰাগাৰত বন্দী হৈ আছে। তেওঁৰ সৈতে একেখন কাৰাগাৰতে বন্দী হৈ আছে গোচৰটোৰ আন এজন অন্যতম অভিযুক্ত অমৃতপ্ৰভা মহন্ত। শ্যামকানু আৰু সিদ্ধাৰ্থৰ জামিন আবেদনৰ পিছত শেখৰে নিজৰ অধিবক্তাৰ জৰিয়তে ফাষ্টট্ৰেক আদালতত এই জামিনৰ আবেদন দাখিল কৰিছিল।
জুবিন গাৰ্গ হত্যাকাণ্ডৰ গোচৰত শেখৰ আৰু অমৃতপ্ৰভাৰ উপৰিও শ্যামকানু মহন্ত, সিদ্ধাৰ্থ শৰ্মা, সন্দীপন গাৰ্গ, পৰেশ বৈশ্য আৰু নন্দেশ্বৰ বৰাৰ বিৰুদ্ধেও বৰ্তমান ফাষ্টট্ৰেক আদালতত শুনানি চলি আছে। অহা ২৬ মে’ত আদালতে এই ৭ অভিযুক্তৰ চাৰ্জফ্ৰেমৰ সন্দৰ্ভত গুৰুত্বপূৰ্ণ ৰায় দিব।
ইতিমধ্যে শৰ্মিলা ভূঞাৰ আদালতে এই গোচৰৰ আন দুজন অভিযুক্ত ক্ৰমে শ্যামকানু মহন্ত আৰু সিদ্ধাৰ্থ শৰ্মাৰ জামিন আবেদন নাকচ কৰিছে। এনে পৰিপ্ৰেক্ষিতত, অহা ২৮ মে’ত শেখৰজ্যোতি গোস্বামীৰ জামিন আবেদনৰ ক্ষেত্ৰত আদালতে কি ৰায় দিয়ে— তাক চাবলৈ এতিয়া উৎসুকতাৰে বাট চাই আছে জুবিন গাৰ্গৰ পৰিয়াল, অনুৰাগী তথা সমগ্ৰ অসমবাসীয়ে।
জুবিন গাৰ্গ হত্যাকাণ্ডৰ অন্যতম অভিযুক্ত শেখৰজ্যোতি গোস্বামীৰ জামিনৰ ৰায় আদালতে সংৰক্ষণ কৰি ৰখা কাৰ্যই বৰ্তমান বিশেষ চৰ্চা লাভ কৰিছে। জুবিন গাৰ্গৰ ৰহস্যজনক হত্যাকাণ্ডৰ সৈতে জড়িত থকাৰ অভিযোগত কাৰাগাৰত বন্দী হৈ থকা শেখৰৰ জামিন আবেদনৰ শুনানি সোমবাৰে ফাষ্টট্ৰেক আদালতে গ্ৰহণ কৰে। আদালতত দুয়োটা পক্ষৰ যুক্তি প্ৰদৰ্শন আৰু দীঘলীয়া শুনানিৰ অন্তত অহা ২৮ মে’ত এই আবেদনৰ চূড়ান্ত ৰায়দান কৰা হ’ব বুলি আদালতে ঘোষণা কৰে।
এই শুনানিৰ সময়ত অভিযুক্তৰ অধিবক্তাৰ লগতে চৰকাৰী অধিবক্তা জিয়াউৰ কামাৰকে ধৰি পাঁচজনীয়া এটা অধিবক্তাৰ দলটোৱে শেখৰজ্যোতি গোস্বামীৰ জামিন লাভৰ তীব্ৰ বিৰোধিতা কৰে আৰু ইয়াৰ বিপক্ষে বিভিন্ন যুক্তি প্ৰদৰ্শন কৰে। চৰকাৰী অধিবক্তা প্ৰদীপ্ত তালুকদাৰে সংবাদ মাধ্যমৰ আগত জানিবলৈ দিয়ে যে তেওঁলোকৰ তৰফৰ পৰা ক’বলগীয়া সকলো কথা আদালতক অৱগত কৰা হৈছে। যিহেতু অহা ২৬ মে’ত এই গোচৰৰ সৈতে জড়িত ৭ গৰাকী অভিযুক্তৰ চাৰ্জফ্ৰেমৰ ৰায়দান কৰা হ’ব, সেইবাবেই আদালতে ২৮ মে’তহে শেখৰৰ জামিন আবেদনৰ ৰায় দিব বুলি সিদ্ধান্ত লৈছে।
