মঙলবাৰে কংগ্ৰেছ নেতা ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীক তীব্ৰ কটাক্ষ কৰি প্ৰশ্ন কৰে যে নৰৱেই তেওঁৰ ব্যক্তিগত অনুৰোধ মানি আদানি গ্ৰুপক পেঞ্চন ফাণ্ডৰ ক’লা তালিকাৰ পৰা আঁতৰাইছেনে। যোৱা ফেব্ৰুৱাৰী মাহত নৰৱেৰ ছোভাৰেইন ৱেলথ ফাণ্ডে আদানি গ্ৰীণক নিজৰ পৰ্টফলিঅ’ৰ পৰা বাদ দিয়াৰ পিছতেই গান্ধীয়ে এই প্ৰশ্ন উত্থাপন কৰিছে।
এক্স (পূৰ্বৰ টুইটাৰ) যোগে দিয়া এটা পোষ্টত ৰাহুল গান্ধীয়ে কয় যে আজিকালি আমি বহুত ভাল খবৰ পাওঁ। মোদী জী, নৰৱেই তেওঁলোকৰ পেঞ্চন ফাণ্ডৰ ক’লা তালিকাৰ পৰা আদানিক আঁতৰাবলৈ কৰা আপোনাৰ ব্যক্তিগত অনুৰোধ মানি লৈছেনে বুলি তেওঁ প্ৰশ্ন কৰে। পোষ্টটোত তেওঁ দুটা বাতৰিৰ ছবিও ব্যৱহাৰ কৰিছে। ইয়াৰে এটা যোৱা ২৭ ফেব্ৰুৱাৰীৰ বাতৰি য’ত লিখা আছিল যে নৰৱেৰ ছোভাৰেইন ৱেলথ ফাণ্ডে আদানি গ্ৰীণ এনাৰ্জিক নিজৰ পৰ্টফলিঅ’ৰ পৰা বাদ দিছে আৰু আনটো ১৮ মে’ৰ বাতৰি য’ত ৪৩ বছৰৰ পাছত এগৰাকী ভাৰতীয় প্ৰধানমন্ত্ৰীৰ ঐতিহাসিক নৰৱে ভ্ৰমণৰ কথা উল্লেখ আছিল।
চলিত বৰ্ষৰ ফেব্ৰুৱাৰী মাহত বিশ্বৰ সৰ্ববৃহৎ ১.২ ট্ৰিলিয়ন ডলাৰৰ এই ছোভাৰেইন ৱেলথ ফাণ্ডটোৱে আদানি গ্ৰীণ এনাৰ্জি লিমিটেডক বিত্তীয় অপৰাধৰ সৈতে জড়িত থকাৰ অভিযোগৰ বাবে নিজৰ পৰ্টফলিঅ’ৰ পৰা বাদ দিয়াৰ সিদ্ধান্ত লৈছিল। নৰ্গেছ বেংকে ইয়াৰ ৱেবছাইটত প্ৰকাশ কৰা অনুসৰি, ২০২৪ চনৰ মে’ মাহত আদানি পোৰ্টছ এণ্ড স্পেচিয়েল ইকনমিক জ’ন লিমিটেডক বাদ দিয়াৰ পিছত এতিয়া আদানি গ্ৰীণকো এই তালিকাত অন্তৰ্ভুক্ত কৰা হৈছে। এই সিদ্ধান্তৰ আঁৰত দুৰ্নীতি বা অন্য গুৰুতৰ বিত্তীয় অপৰাধৰ কাৰণ দৰ্শাইছিল যদিও ইয়াৰ কোনো বিতং ব্যাখ্যা আগবঢ়োৱা নাছিল।
২০২০ চনৰ জুলাই মাহত যেতিয়া নৰ্গেছ বেংকে প্ৰথমবাৰৰ বাবে আদানি গ্ৰীণৰ শ্বেয়াৰ ক্ৰয় কৰিছিল, তেতিয়া ইয়াৰ মূল্য আছিল ৩৪১ টকা আৰু যোৱা ২৭ ফেব্ৰুৱাৰীত ইয়াৰ মূল্য ৯৪৪ টকা হৈছিলগৈ। এই সন্দৰ্ভত কোম্পানীটোৱে লগে লগে কোনো প্ৰতিক্ৰিয়া প্ৰকাশ কৰা নাছিল যদিও উদ্যোগটোৰ একাংশ বিষয়াই কয় যে জীৱাশ্ম ইন্ধনৰ পুঁজিৰে চলি থকা এখন ফাণ্ডে এটা নৱীকৰণযোগ্য শক্তি কোম্পানীৰ বিৰুদ্ধে এক নেতিবাচক ধাৰণা সৃষ্টি কৰিবলৈ চেষ্টা কৰিছে।
