দিল্লীত প্ৰচণ্ড গৰমৰ প্ৰকোপে ত্ৰাহিমধুসূদন পৰিৱেশৰ সৃষ্টি কৰিছে। ১৯ মে’ মঙলবাৰৰ দিনটোত দিল্লীত বিগত দুবছৰৰ ভিতৰত মে’ মাহৰ আটাইতকৈ গৰম দিন হিচাপে ৰেকৰ্ড কৰা হয়। ভাৰতীয় বতৰ বিজ্ঞান বিভাগৰ তথ্য অনুসৰি, দিল্লীৰ প্ৰধান বতৰ কেন্দ্ৰসমূহৰ সকলোতে তাপমাত্ৰা ৪৫ ডিগ্ৰী চেলচিয়াছতকৈ ওপৰলৈ গুচি গৈছে। চফদৰজং বতৰ কেন্দ্ৰত সৰ্বাধিক তাপমাত্ৰা ৪৫.১ ডিগ্ৰী চেলচিয়াছ ৰেকৰ্ড কৰা হৈছে, যিয়ে পূৰ্বৰ সকলো অভিলেখ ভংগ কৰিছে। ইয়াৰ পূৰ্বে সোমবাৰে অৰ্থাৎ ১৮ মে’ত তাপমাত্ৰা ৪৩.৪ ডিগ্ৰী চেলচিয়াছ আছিল, কিন্তু মাত্ৰ ২৪ ঘণ্টাতে ইয়াৰ দ্ৰুত বৃদ্ধি ঘটে।
ৰাজধানী দিল্লীৰ বিভিন্ন ঠাইৰ ভিতৰত ৰিজ অঞ্চলত সৰ্বাধিক ৪৬.৫ ডিগ্ৰী চেলচিয়াছ তাপমাত্ৰা ৰেকৰ্ড কৰা হয়, যিটো দিল্লীৰ আটাইতকৈ গৰম স্থান আছিল। ইয়াৰ উপৰি পালম আৰু চফদৰজঙত ৪৫.১ ডিগ্ৰী, লোধী ৰোডত ৪৫.২ ডিগ্ৰী আৰু আয়ানগৰত ৪৫.৫ ডিগ্ৰী চেলচিয়াছ তাপমাত্ৰা পোৱা গৈছে। বতৰ বিজ্ঞান বিভাগৰ মতে, এই তাপমাত্ৰা স্বাভাৱিকতকৈ বহু বেছি। লোধী ৰোডত স্বাভাৱিকতকৈ ৬.২ ডিগ্ৰী আৰু চফদৰজঙত ৪.৭ ডিগ্ৰী বেছি তাপমাত্ৰা হোৱাৰ বাবে ইয়াক এক গুৰুতৰ তাপ প্ৰবাহ বা হিট ৱেভ বুলি ঘোষণা কৰা হৈছে। দিনৰ প্ৰচণ্ড গৰমৰ লগতে নিশাৰ ভাগতো বতাহ শুকান হৈ থকাৰ বাবে আৰু বৰষুণ নোহোৱাৰ বাবে মানুহে কোনো সকাহ পোৱা নাই। ৰাতিৰ তাপমাত্ৰাও ২৭ ৰ পৰা ২৮.২ ডিগ্ৰী চেলচিয়াছ পৰ্যন্ত হৈ থকাৰ বাবে মানুহৰ শৰীৰ ঠাণ্ডা হোৱাত বাধাৰ সৃষ্টি হৈছে।
প্ৰচণ্ড গৰমৰ সমান্তৰালভাৱে দিল্লীৰ বায়ু প্ৰদূষণেও এতিয়া জনসাধাৰণৰ বাবে এক ডাঙৰ সমস্যা কঢ়িয়াই আনিছে। মঙলবাৰে দিল্লী আৰু ইয়াৰ আশে-পাশে থকা অঞ্চলসমূহৰ বায়ুৰ গুণাগুণ সূচক অৰ্থাৎ একিউআই ২০৮ লৈ বৃদ্ধি পায়, যাক বেয়া বা দুৰ্বল শ্ৰেণীত ধৰা হয়। ইয়াৰ বাবে বায়ু গুণাগুণ পৰিচালনা আয়োগে সমগ্ৰ অঞ্চলটোত গ্ৰেপ অৰ্থাৎ গ্ৰেডেড ৰেছপন্স একচন প্লেনৰ প্ৰথম পৰ্যায় জাৰি কৰিছে। বতৰ বিজ্ঞান বিভাগৰ মতে অহা দিনবোৰতো এই প্ৰদূষণ আৰু গৰমৰ মাত্ৰা এনেকৈয়ে থকাৰ সম্ভাৱনা আছে, যাৰ ফলত জনসাধাৰণৰ তীব্ৰ মূৰৰ বিষ আৰু বিভিন্ন স্বাস্থ্যজনিত সমস্যা বৃদ্ধি পাব পাৰে।
