পঞ্জাবৰ সংগীত জগতক জোকাৰি যোৱা এক ভয়ংকৰ ঘটনা পোহৰলৈ আহিছে। যোৱা ছয় দিনে সন্ধানহীন হৈ থকা জনপ্ৰিয় পঞ্জাবী গায়িকা যশইণ্ডৰ কৌৰ ওৰফে ইণ্ডৰ কৌৰক নিৰ্মমভাৱে হত্যা কৰা হৈছে। আৰক্ষীয়ে তেওঁৰ মৃতদেহ নীলো জুৰিৰ পৰা উদ্ধাৰ কৰিছে। এই চাঞ্চল্যকৰ হত্যাকাণ্ডৰ আঁৰত একতৰ্ফীয়া প্ৰেমৰ এক ভয়ংকৰ কাহিনী পোহৰলৈ আহিছে।
গায়িকাগৰাকীৰ মৃত্যুৰ খবৰে সংগীত জগত আৰু তেওঁৰ পৰিয়ালৰ মাজত গভীৰ শোকৰ ছাঁ পেলাইছে। আৰক্ষীয়ে মৃতদেহটো উদ্ধাৰ কৰি সমৰালাৰ অসামৰিক চিকিৎসালয়ৰ মৰ্গত ৰাখিছে।
নিহত গায়িকাগৰাকীৰ ভাতৃ জোতইণ্ডাৰ সিঙৰ অভিযোগ অনুসৰি, যোৱা ১৩ মে’ৰ নিশা প্ৰায় ৮:৩০ বজাত ইণ্ডাৰ কৌৰে নিজৰ ফ’ৰ্ড ফিগ’ গাড়ীৰে বজাৰলৈ ঘৰুৱা সামগ্ৰী আনিবলৈ গৈছিল। বহুত সময়লৈকে তেওঁ ঘৰলৈ উভতি নহাত পৰিয়ালৰ লোকৰ মনত সন্দেহ উপজিছিল। পৰিয়ালৰ লোকে নিজে কৰা অনুসন্ধানত পোহৰলৈ আহে যে মোগাৰ ভালুৰ গাঁৱৰ নিবাসী সুখবিন্দৰ সিং ওৰফে সুখা নামৰ লোকজনৰ সৈতে এই ঘটনাৰ সম্পৰ্ক আছে। সুখবিন্দৰে ইণ্ডাৰ কৌৰক বিয়াৰ বাবে হেঁচা দি আছিল। কিন্তু গায়িকাগৰাকীয়ে এই প্ৰস্তাৱ নাকচ কৰাৰ বাবেই সুখবিন্দৰে এই ভয়ংকৰ ষড়যন্ত্ৰ ৰচনা কৰে।
পৰিয়ালৰ লোকে অভিযোগ কৰিছে যে সুখবিন্দৰ সিঙে কেৱল ইণ্ডাৰ কৌৰৰ পৰা প্ৰতিশোধ লোৱাৰ উদ্দেশ্যৰে কানাডাৰ পৰা পঞ্জাবলৈ আহিছিল। সি তাৰ আন সহযোগীসকলৰ সৈতে লগ হৈ বাটত গায়িকাগৰাকীৰ গাড়ীখন আগভেটি ধৰে আৰু অস্ত্ৰৰ ভয় দেখুৱাই তেওঁক অপহৰণ কৰে। ইয়াৰ পিছত অপৰাধীকেইটাই তেওঁক নিষ্ঠুৰভাৱে হত্যা কৰি মৃতদেহটো নীলো জুৰিত পেলাই দিয়ে। এই অপৰাধ সংঘটিত কৰাৰ লগে লগে মূল অভিযুক্ত সুখবিন্দৰ সিং আৰক্ষীৰ চকুত ধূলি দি পুনৰ কানাডালৈ পলাই যায়।
এই সমগ্ৰ ঘটনাত স্থানীয় আৰক্ষীৰ ভূমিকাৰ ওপৰতো গুৰুতৰ প্ৰশ্ন উত্থাপন হৈছে। ভুক্তভোগী পৰিয়ালটোৱে জানিবলৈ দিয়া মতে, তেওঁলোকে ১৫ মে’তেই মূল অভিযুক্ত সুখবিন্দৰ সিং আৰু তাৰ সহযোগী কৰমজিৎ সিঙৰ বিৰুদ্ধে এজাহাৰ দাখিল কৰিছিল। ইমানৰ পিছতো আৰক্ষীৰ লেহেমীয়া কাম-কাজৰ বাবেই মূল অভিযুক্তজনে দেশ এৰি পলাই যোৱাত সফল হ’ল।
জুৰিত এগৰাকী মহিলাৰ মৃতদেহ পোৱাৰ খবৰ পোৱাৰ লগে লগে আৰক্ষীৰ দল ঘটনাস্থলীত উপস্থিত হৈছিল। পৰিয়ালৰ লোকে কাপোৰ আৰু চেহেৰা দেখি মৃতদেহটো ইণ্ডাৰ কৌৰৰ বুলি চিনাক্ত কৰে। আৰক্ষীয়ে এই গোচৰত প্ৰয়োজনীয় আইন অনুসৰি ব্যৱস্থা গ্ৰহণ কৰি আছে। বৰ্তমান পলাতক হৈ থকা আন সহযোগীসকলক বিচাৰি উলিওৱাৰ লগতে মূল অভিযুক্তটোক বিদেশৰ পৰা ঘূৰাই আনিবলৈ আইনী আৰু কূটনৈতিক প্ৰক্ৰিয়া আৰম্ভ কৰা হৈছে।
