পশ্চিমবংগৰ মুখ্যমন্ত্ৰী শুভেন্দু অধিকাৰীয়ে কেন্দ্ৰীয় গৃহমন্ত্ৰী অমিত শ্বাহৰ নিৰ্বাচনৰ পূৰ্বৰ আহ্বানক আখৰে আখৰে পালন কৰা যেন অনুভৱ হৈছে। নিৰ্বাচনৰ আগতে অমিত শ্বাহে বিজেপি কৰ্মীসকলক কৈছিল যে মমতাক তেওঁৰ নিজৰ ঘৰতেই পৰাস্ত কৰিব লাগিব। নিৰ্বাচন আয়োগৰ তথ্য অনুসৰি, শুভেন্দু অধিকাৰীয়ে কেৱল কলকাতাৰ ভৱানীপুৰ সমষ্টিৰ পৰাই প্ৰাক্তন মুখ্যমন্ত্ৰী মমতা বেনাৰ্জীক উৎখাত কৰাই নহয়, মমতাৰ নিজৰ বাসগৃহ থকা ৱাৰ্ডটোতো তেওঁক পৰাস্ত কৰিবলৈ সক্ষম হৈছে।
নিৰ্বাচন আয়োগৰ বুথভিত্তিক তথ্যই ভৱানীপুৰত শুভেন্দু অধিকাৰীৰ বিশাল জয়ৰ প্ৰমাণ দিছে। সমষ্টিটোৰ ২৬৭ টা বুথৰ ভিতৰত ২০৭ টা বুথতেই তেওঁ আগবাঢ়ি আছিল। আনকি মমতা বেনাৰ্জীৰ কালীঘাটৰ বাসগৃহ থকা ৭৩ নম্বৰ ৱাৰ্ডতো শুভেন্দুৱে ৮৯৩২ টা ভোট লাভ কৰাৰ বিপৰীতে মমতাই মাত্ৰ ৪২৮৪ টা ভোটহে লাভ কৰিবলৈ সক্ষম হয়।
মমতা বেনাৰ্জীৰ কালীঘাটৰ বাসগৃহৰ পৰা প্ৰায় ডেৰশ কিলোমিটাৰ দূৰৈৰ কাঁথিৰ বাসিন্দা শুভেন্দু অধিকাৰীৰ দক্ষিণ কলকাতাৰ এই সমষ্টিটোত পূৰ্বৰ কোনো ৰাজনৈতিক বা সাংগঠনিক ভেটি নাছিল। তথাপিও তেওঁ মমতাৰ ৱাৰ্ডত দুগুণতকৈয়ো অধিক ভোট লাভ কৰি অমিত শ্বাহৰ প্ৰতিশ্ৰুতি বাস্তৱত ৰূপায়ণ কৰিলে। ভৱানীপুৰত শুভেন্দু অধিকাৰীয়ে মুঠ ভোটৰ ৬৩ শতাংশ লাভ কৰাৰ বিপৰীতে মমতা বেনাৰ্জীয়ে মাত্ৰ ৩০ শতাংশ ভোটহে লাভ কৰে।
আটাইতকৈ আচৰিত কথাটো আছিল সমগ্ৰ ভৱানীপুৰত শুভেন্দুৰ জয়ৰ ব্যৱধান। ইয়াত এনে বহুতো বুথ আছিল য’ত মমতাই ৫০ টা ভোটো লাভ কৰিব নোৱাৰিলে। ভৱানীপুৰৰ প্ৰতিটো বুথত প্ৰায় ৪০০ ৰ পৰা ৭০০ ভোটাৰ আছিল। তথাপিও ১৪ নম্বৰ বুথত মমতাই মাত্ৰ ৪৩ টা, ১৬ নম্বৰত ৪২ টা, ২০ নম্বৰত ৪১ টা, ২৪ নম্বৰত ৪৫ টা, ৭৭ নম্বৰত ৪০ টা, ৮৯ নম্বৰত ৪১ টা আৰু ১০৫ নম্বৰ বুথত মাত্ৰ ৩১ টা ভোটহে লাভ কৰে। ঠিক সেইদৰে ১৪৯, ১৫৮, ১৭৬, ২৪২, ২৪৯ আৰু ২৬৩ নম্বৰ বুথতো তেওঁ অতি কম সংখ্যক ভোটহে লাভ কৰে যিটো আছিল ক্ৰমে ৪৪, ৪৬, ২৯, ৪০, ২৮ আৰু ৩০ টা ভোট।
মন কৰিবলগীয়া যে ২০২১ চনত নন্দীগ্ৰামত শুভেন্দু অধিকাৰীৰ হাতত পৰাস্ত হোৱাৰ পিছত ভৱানীপুৰৰ উপ-নিৰ্বাচনত মমতা বেনাৰ্জীয়ে আটাইকেইটা ৱাৰ্ডতেই জয়লাভ কৰিছিল। কিন্তু এইবাৰ মমতাই ভৱানীপুৰত নিজৰ আধিপত্য হেৰুৱালে। এইবাৰৰ নিৰ্বাচনত শুভেন্দু অধিকাৰীয়ে ৭৩৯১৭ টা ভোট লাভ কৰাৰ বিপৰীতে মমতা বেনাৰ্জীয়ে মাত্ৰ ৫৮৮১২ টা ভোটহে লাভ কৰিবলৈ সক্ষম হয়।
