বৰ্তমান দেশৰ কোটি কোটি কৃষকে পিএম কিষাণ আঁচনিৰ ২৩ তম কিস্তিৰ বাবে অপেক্ষা কৰি আছে। প্ৰতিবাৰৰ দৰে এইবাৰো কৃষকসকলৰ বেংক একাউণ্টলৈ ২০০০ টকাকৈ আহিব। পিছে এই ধন লাভ কৰিবলৈ হ’লে কিছুমান জৰুৰী কাম সম্পূৰ্ণ কৰাটো অতি প্ৰয়োজনীয়। যদি ই-কেৱাইচি আৰু আধাৰ লিংক কৰাত কোনো খেলিমেলি থাকে, তেন্তে কিস্তিৰ ধন আবদ্ধ হৈ পৰিব পাৰে।
প্ৰধানমন্ত্ৰী নৰেন্দ্ৰ মোদীয়ে ২০২৬ চনৰ ১৩ মাৰ্চত অসমৰ গুৱাহাটীৰ পৰা পিএম কিষাণ আঁচনিৰ ২২ তম কিস্তি মুকলি কৰিছিল। ইয়াৰ পাছতে এতিয়া পৰৱৰ্তী অৰ্থাৎ ২৩ তম কিস্তিক লৈ চৰ্চা আৰম্ভ হৈছে। যোৱা সময়ছোৱালৈ লক্ষ্য কৰিলে দেখা যায় যে চৰকাৰে সাধাৰণতে প্ৰতি চাৰি মাহৰ মূৰে মূৰে কৃষকৰ একাউণ্টলৈ ধন প্ৰেৰণ কৰে। এনে অৱস্থাত পৰৱৰ্তী কিস্তি ২০২৬ চনৰ জুন বা জুলাই মাহৰ ভিতৰত মুকলি হোৱাৰ সম্ভাৱনা আছে। অৱশ্যে চৰকাৰৰ ফালৰ পৰা এতিয়ালৈকে কোনো আনুষ্ঠানিক তাৰিখ ঘোষণা কৰা হোৱা নাই। উল্লেখ্য যে, কেন্দ্ৰীয় চৰকাৰৰ এই বৃহৎ আঁচনিখনৰ অধীনত যোগ্য কৃষকসকলক বছৰেকত মুঠ ৬০০০ টকা প্ৰদান কৰা হয়। এই ধন প্ৰতিটো কিস্তিত ২০০০ টকাকৈ মুঠ তিনিটা কিস্তিত পোনপটীয়াকৈ কৃষকৰ বেংক একাউণ্টলৈ প্ৰেৰণ কৰা হয়।
এই আঁচনিৰ সুবিধা লাভ কৰিবলৈ চৰকাৰে কিছুমান নিয়ম নিৰ্ধাৰণ কৰিছে আৰু ইয়াৰ ভিতৰত ই-কেৱাইচি সম্পূৰ্ণ কৰাটো বাধ্যতামূলক। আপুনি যদি এতিয়ালৈকে ই-কেৱাইচি কৰা নাই, তেন্তে সোনকালেই এই কামটো কৰি লওক। কৃষকসকলে ঘৰত বহিয়েই পিএম কিষাণৰ ৱেবছাইটৰ জৰিয়তে এই কাম কৰিব পাৰে। ইয়াৰ বাবে ৱেবছাইটলৈ গৈ ই-কেৱাইচি বিকল্পত ক্লিক কৰি নিজৰ আধাৰ নম্বৰ দিব লাগিব আৰু অ’টিপি ভেৰিফিকেচন সম্পূৰ্ণ কৰিব লাগিব। ইয়াৰ উপৰিও ওচৰৰ চিএছচি কেন্দ্ৰলৈ গৈ বায়’মেট্ৰিক পদ্ধতিৰে বা পিএম কিষাণ ম’বাইল এপৰ জৰিয়তে ফেচ অথেনটিকেচনৰ যোগেদিও ই-কেৱাইচি কৰিব পৰা যায়।
নিজৰ কিস্তিৰ অৱস্থা বা ষ্টেটাছ জানিব বিচাৰিলে কৃষকসকলে পিএম কিষাণৰ ৱেবছাইটলৈ গৈ বেনিফিচিয়াৰী ষ্টেটাছ অংশত ক্লিক কৰিব লাগিব। তাত নিজৰ আধাৰ নম্বৰ বা বেংক একাউণ্ট নম্বৰ দি গেট ডেটাত ক্লিক কৰিলেই স্ক্ৰীণত সকলো তথ্য ওলাই পৰিব। বহু সময়ত সৰু ভুলৰ বাবেও কৃষকৰ ধন অহাটো বন্ধ হৈ যাব পাৰে। সেয়েহে বেংক একাউণ্ট, আধাৰ আৰু ম’বাইল নম্বৰৰ সঠিক তথ্য আপডেট ৰখাটো অতি গুৰুত্বপূৰ্ণ। চৰকাৰেও কৃষকসকলক নিয়মীয়াকৈ নিজৰ তথ্যসমূহ আপডেট ৰাখিবলৈ আহ্বান জনাই আহিছে।
