ভাৰতীয় চফটৱেৰ ইঞ্জিনিয়াৰ আৰু প্ৰযুক্তি পেছাদাৰীসকলে বহু বছৰ ধৰি আমেৰিকাৰ প্ৰধান প্ৰযুক্তি কোম্পানীসমূহত গুৰুত্বপূৰ্ণ ভূমিকা পালন কৰি আহিছে। ছিলিকন ভেলীৰ কেইবাটাও কোম্পানীৰ প্ৰযুক্তিগত ভেটি গঢ়ি তোলাতো তেওঁলোকে অৰিহণা যোগাইছে।
কিন্তু এতিয়া সেই ভাৰতীয় কৰ্মীসকলৰ বহুতেই ডাঙৰ সংকটত পৰিছে। কাৰণ নতুনকৈ ছাটাইৰ ঢৌৱে কেৱল চাকৰি কাঢ়ি লোৱাই নহয়, আমেৰিকাত থকাৰ অধিকাৰৰ বিষয়েও অনিশ্চয়তাৰ সৃষ্টি কৰিছে।
শেহতীয়াকৈ আমেৰিকাৰ আগশাৰীৰ প্ৰযুক্তি কোম্পানীসমূহে খৰচ কমোৱাৰ উদ্দেশ্যে ইজনৰ পিছত সিজন কৰ্মচাৰীক চাকৰিৰ পৰা বৰ্খাস্ত কৰিছে। প্ৰায় ৮ হাজাৰ কৰ্মচাৰীক চাকৰিৰ পৰা বৰ্খাস্ত কৰিছে মেটাই। তাত কৃত্ৰিম বুদ্ধিমত্তা বা এআইৰ ওপৰত গুৰুত্ব আৰোপ কৰি ব্যৱসায়িক গাঁথনি সলনি কৰাৰ কাম চলি আছে। আমাজনেও কেইবাটাও ৰাউণ্ডত কৰ্মচাৰী হ্ৰাস কৰিছে। লিংকডইনকে ধৰি আন কেইবাটাও প্ৰযুক্তি কোম্পানীয়ে কৰ্মচাৰীক চাকৰিৰ পৰা বৰ্খাস্ত কৰাৰ পথত আগবাঢ়িছে।
এই পৰিস্থিতিত এইচ-১বি ভিছাৰ ওপৰত কাম কৰা ভাৰতীয় টেক পেছাদাৰীসকল আটাইতকৈ বেছি চাপত পৰিছে। কাৰণ এই ভিছাটো নিয়োগকাৰী কোম্পানীটোৰ সৈতে পোনপটীয়াকৈ জড়িত। সাধাৰণতে কৰ্মীসকলে চাকৰি হেৰুৱাই চাকৰি বিচাৰিবলৈ মাত্ৰ ৬০ দিনহে পায়। এই সময়ছোৱাৰ ভিতৰত যদি তেওঁলোকে নতুন কোম্পানী এটাৰ পৰা স্পনছৰশ্বিপ নাপায় তেন্তে তেওঁলোকে হয়তো আমেৰিকা এৰিবলগীয়া হ’ব।
ফলস্বৰূপে চাকৰি হেৰুৱাটো এতিয়া কেৱল পেছাদাৰী সমস্যা নহয়। ইয়াৰ লগতে পৰিয়ালৰ ভৱিষ্যত, হোম লোন, শিশুৰ শিক্ষা, স্বাস্থ্য বীমা আৰু গ্ৰীণ কাৰ্ডৰ বাবে দীৰ্ঘদিনীয়া অপেক্ষাৰ কথাও জড়িত হৈ আছে। বহু ভাৰতীয় পেছাদাৰীয়ে বছৰ বছৰ ধৰি গ্ৰীণ কাৰ্ডৰ বাবে অপেক্ষা কৰি আছে। আমেৰিকাত বহু সন্তানৰ জন্ম হৈছিল। একাংশই আকৌ স্থায়ীভাৱে থকাৰ আশাত ঘৰ কিনিছে। চাকৰি হেৰুৱাৰ লগে লগে সেই সকলোবোৰ পৰিকল্পনা অনিশ্চিত হৈ পৰিছে।
আমেৰিকাৰ সংবাদ মাধ্যমৰ বাতৰি অনুসৰি বৰ্তমান বহু ভাৰতীয় কৰ্মীয়ে বিকল্প পথৰ সন্ধানত আছে। ইয়াৰে কিছুমানে বি-২ ভিজিটৰ ভিছালৈ সলনি হ’বলৈ চেষ্টা কৰিছে। ইয়াৰ ফলত তেওঁলোকে নতুন চাকৰি বিচাৰিবলৈ অতিৰিক্ত কেইমাহমান সময় পাব পাৰে।
ইউ এছ চিটিজেনশ্বিপ এণ্ড ইমিগ্ৰেচন চাৰ্ভিচেছ বা ইউএছচিআইএছৰ নিয়ম অনুসৰি এইচ-১বি ভিছাধাৰীসকলে সাধাৰণতে চাকৰি হেৰুৱাৰ পিছত ৬০ দিনৰ ৰেহাইৰ সময়সীমা লাভ কৰে। বা আই-৯৪ৰ মৰ্যাদা শেষ নোহোৱালৈকে তেওঁলোকে থকাৰ সুযোগ পায়। এই সময়ছোৱাত তেওঁলোকে সিদ্ধান্ত ল’ব লগা হয় যে নতুন চাকৰি বিচাৰিব, আন ভিছা বিচাৰিব নে দেশলৈ উভতি যাব। মন কৰিবলগীয়া যে এই ৬০ দিনৰ হিচাপ শেষৰ দৰমহা পোৱা দিনৰ পৰা নহয়, শেষ কৰ্মদিনৰ পৰা আৰম্ভ হয়।
