অৰুণাচল প্ৰদেশৰ ইটানগৰত আজি সংঘটিত এক কৰুণ দুর্ঘটনাত এটা নিৰ্মীয়মাণ বিল্ডিঙৰ দেৱাল খহি ৫ গৰাকী নিৰ্মাণ কৰ্মীৰ মৃত্যু হয়। উল্লেখযোগ্য যে আটাইকেইগৰাকী নিহতই হৈছে বিশ্বনাথ চাৰিআলিৰ বাসিন্দা।
নিহত শ্ৰমিক কেইগৰাকীক পাপু কাটিয়া (২০), পাপু গেৰেল (২১), কানহা কেঁৱাৰ (৪০), বাব্লু তেলেংগা (১৯) আৰু জিতেন তেলেংগা (১৯) বুলি চিনাক্ত কৰা হৈছে।
প্ৰাপ্ত তথ্য মতে আজি পুৱা প্ৰায় ৬:৩০ বজাত ইটানগৰৰ সমীপৰ ডনি কলনীত শ্ৰমিক কেইগৰাকীয়ে অস্থায়ীভাৱে বাস কৰি অহা নিৰ্মীয়মাণ গৃহটোৰ পকী দেৱাল খহি পৰি তেওঁলোকক পুতি পেলায়।
দুৰ্ভাগ্যজনক ঘটনাটোৰ পিছতে এন ডি আৰ এফ আৰু অগ্নি আৰু জৰুৰীকালিন সেৱা বিভাগৰ কৰ্মী ঘটনাস্থলীত উপস্থিত হৈ বহু সময় যুঁজি মৃতদেহ কেইটাক উদ্ধাৰ কৰে।
ইটানগৰ কেপিটেল কমপ্লেক্সৰ উপায়ুক্ত প্ৰিন্স ধাৱানে ঘটনাস্থলীত উপস্থিত হৈ ঘটনাৰ বুজ লোৱাৰ লগতে নিহতৰ ব্যক্তিসকলৰ পৰিয়াললৈ সাম্ভাব্য সকলো সাহায্য আগবঢ়োৱা হ’ব বুলি সদৰী কৰে।
তদুপৰি তেওঁ এন ডি আৰ এফে দিয়া সাৱধানবাণীৰ ভিত্তিত জনসাধাৰণক বাৰিষাৰ সময়চোৱাত অত্যন্ত সাৱধানতা অৱলম্বন কৰি প্ৰয়োজন সাপেক্ষে অন্য নিৰাপদ স্থানলৈ আঁতৰি যাবলৈ আহ্বান জনায়।
ইয়াৰ উপৰি স্থানীয় বিধায়ক টেচি কাছয়ো ঘটনাস্থলী পৰিদৰ্শন কৰাৰ লগতে আৰ কে মিছন চিকিৎসালয়লৈ গৈ নিহতসকলৰ পৰিয়ালৰ লোকক সাক্ষাৎ কৰে। ঘটনাটোত দুখ প্ৰকাশ কৰি তেওঁ নিহত লোককেইজনৰ মৃতদেহ নিজ বাসস্থানলৈ লৈ যোৱাৰ বাবে বাহনৰ ব্যৱস্থা কৰা হ’ব বুলি জানিবলৈ দিয়ে।
