গ্ৰীষ্মকালৰ প্ৰচণ্ড গৰম আৰু ঘামৰ পৰা ৰক্ষা পাবলৈ আমি ঘৰ বা অফিচত সোমোৱাৰ লগে লগে এচিটো চলাই দিওঁ। কিন্তু আপুনি কেতিয়াবা মন কৰিছেনে যে এই অতিমাত্ৰা গৰমৰ দিনতো বহুতৰে হঠাৎ শুকান কাহ, ডিঙিৰ বিষ আৰু নাকৰ পানী ওলোৱা সমস্যা দেখা দিয়ে?
প্ৰায়ে মানুহে ইয়াক সাধাৰণ বতৰৰ ভাইৰেল ইনফেকচন বুলি ভাবি লয়। কিন্তু চিকিৎসা বিজ্ঞানৰ ফালৰ পৰা চালে এই ৰহস্যময় শুকান কাহ আৰু উশাহ-নিশাহৰ সংক্ৰমণৰ প্ৰকৃত কাৰণ কোনো বাহিৰৰ ভাইৰাছ নহয়, বৰঞ্চ আপোনাক ঠাণ্ডা দি থকা আপোনাৰ কোঠাৰ এচিটোহে। সেয়েহে জ্যেষ্ঠ পালমোনোলজিস্ট অৰ্থাৎ হাওঁফাওঁৰোগ বিশেষজ্ঞ ডাঃ সতীশ চন্দ্ৰৰ পৰা জানো আহক কেনেকৈ বন্ধ কোঠাত চলা এচিয়ে আপোনাৰ হাওঁফাওঁ আৰু শ্বাসতন্ত্ৰক বেমাৰী কৰি তুলিছে।
এচিৰ বতাহৰ পৰা ডিঙিৰ সংক্ৰমণ কেনেকৈ হয় তাৰ আঁৰত দুটা মুখ্য বৈজ্ঞানিক কাৰণ আছে। প্ৰথমটো হ’ল বতাহৰ শুষ্কতা আৰু দ্বিতীয়টো হ’ল এচিৰ ফিল্টাৰত লুকুৱাই থকা প্ৰদূষণ। ডাঃ সতীশৰ মতে এচিয়ে কোঠাটো ঠাণ্ডা কৰাৰ লগতে বতাহত থকা সম্পূৰ্ণ আৰ্দ্ৰতা বা জলীয় ভাপখিনি শুহি লয়। যেতিয়া আপুনি এনে ঠাণ্ডা আৰু শুকান পৰিৱেশত বেছি সময় বহি থাকে, তেতিয়া উশাহ লোৱাৰ সময়ত আপোনাৰ শ্বাসতন্ত্ৰৰ ভিতৰৰ অংশ সম্পূৰ্ণৰূপে শুকাই যায়। এই তিতা অংশটোৱে প্ৰকৃততে এটা সুৰক্ষা কৱচৰ দৰে কাম কৰে যিয়ে বেক্টেৰিয়া আৰু ধূলিৰ কণাবোৰ হাওঁফাওঁলৈ যোৱাত বাধা দিয়ে। ই শুকাই যোৱাৰ লগে লগে ডিঙিটো টান হৈ পৰে, যাৰ ফলত তীব্ৰ শুকান কাহ আৰু কিবা গিলিলে বিষ হোৱা সমস্যা আৰম্ভ হয়।
দ্বিতীয়টো ডাঙৰ কাৰণ হ’ল এচিৰ ফিল্টাৰৰ লেতেৰা অৱস্থা। গৰমৰ দিনত যেতিয়া কেইবামাহৰ পাছত এচি চলোৱা হয় বা তাৰ চাৰ্ভিচিং কৰা নহয়, তেতিয়া তাৰ ফিল্টাৰত ধূলি আৰু ভেঁকুৰ আদি জমা হয়। যেতিয়া এচি চলে তেতিয়া এইবোৰ বতাহৰ জৰিয়তে আপোনাৰ হাওঁফাওঁত প্ৰৱেশ কৰি এলাৰ্জি আৰু এজমাৰ দৰে গুৰুতৰ ৰোগৰ সৃষ্টি কৰিব পাৰে।
মানুহে প্ৰায়ে প্ৰচণ্ড গৰমৰ পৰা আহি এচিটো ১৬ বা ১৮ ডিগ্ৰী চেলসিয়াছত ৰাখে, যিটো শৰীৰৰ উষ্ণতা নিয়ন্ত্ৰণ ব্যৱস্থাৰ বাবে এক ডাঙৰ আঘাত। গৰমৰ দিনত এচিৰ উষ্ণতা সদায় ২৪ ডিগ্ৰীৰ পৰা ২৬ ডিগ্ৰী চেলসিয়াছৰ ভিতৰত ৰাখিব লাগে। এই উষ্ণতা মানুহৰ শৰীৰ আৰু শ্বাসতন্ত্ৰৰ বাবে আটাইতকৈ উপযোগী বুলি গণ্য কৰা হয়। যেতিয়া বাহিৰৰ উষ্ণতা ৪২ ডিগ্ৰী হয় আৰু আপুনি হঠাৎ ১৮ ডিগ্ৰীৰ কোঠাত প্ৰৱেশ কৰে, তেতিয়া উষ্ণতাৰ এই হঠাতে অহা পৰিৱৰ্তনে আপোনাৰ সিৰাবোৰ সংকুচিত কৰে আৰু ৰোগ প্ৰতিৰোধ ক্ষমতা দুৰ্বল কৰি সংক্ৰমণৰ আশংকা দুগুণ কৰি তোলে।
এচিত থাকোঁতে হাওঁফাওঁৰ যত্ন ল’বলৈ কিছুমান কথা মনত ৰখাটো জৰুৰী। এচি থকা কোঠাত পিয়াহ কম লাগে, কিন্তু ডিঙিটো তিতি থাকিবলৈ প্ৰতি আধা ঘণ্টাত অলপ পানী বা কুহুমীয়া পনীয়া বস্তু খাই থাকিব লাগে। প্ৰতি পোন্ধৰ দিনৰ মূৰে মূৰে নিজৰ এচিৰ এয়াৰ ফিল্টাৰটো উলিয়াই ছাফা কৰিব লাগে যাতে ধূলি আৰু ভেঁকুৰ কোঠাত বিয়পি নপৰে। লগতে দিনটোত কমেও এবাৰ এঘণ্টাৰ বাবে এচি বন্ধ কৰি কোঠাৰ খিৰিকীবোৰ খুলি দিব লাগে যাতে সতেজ বতাহ ভিতৰলৈ আহিব পাৰে আৰু কোঠাৰ ভিতৰত জমা হোৱা বেক্টেৰিয়া বাহিৰলৈ ওলাই যাব পাৰে।
বিঃ দ্ৰঃ এই প্ৰবন্ধটোত দিয়া তথ্যসমূহ কেৱল ৰোগ আৰু স্বাস্থ্য সম্পৰ্কীয় সমস্যাসমূহৰ বিষয়ে সজাগতা অনাৰ উদ্দেশ্যেৰে দিয়া হৈছে। কোনো ধৰণৰ চিকিৎসা বা ঔষধ ব্যৱহাৰ কৰাৰ আগতে সদায় এজন বিশেষজ্ঞ বা চিকিৎসকৰ পৰামৰ্শ লোৱাটো বাঞ্ছনীয়।
