উত্তৰ প্ৰদেশৰ বাঘপত জিলাৰ এগৰাকী স্ত্ৰীৰোগ বিশেষজ্ঞই শেহতীয়াকৈ ছচিয়েল মিডিয়াত এটা ভিডিঅ’ শ্বেয়াৰ কৰি তীব্ৰ উদ্বেগ প্ৰকাশ কৰিছে। ভিডিঅ’টোত ৰাজস্থানৰ পৰা অহা এগৰাকী মাত্ৰ ২২ বছৰীয়া গৰ্ভৱতী মহিলাক দেখা গৈছে। আটাইতকৈ আচৰিত কথাটো হ’ল যে এই কম বয়সতে মহিলাগৰাকী ষষ্ঠবাৰৰ বাবে মাতৃ হ’বলৈ ওলাইছে। তেওঁলোকৰ ইতিমধ্যে পাঁচোটা সন্তান আছে, কিন্তু পৰিয়ালটোৱে আৰু এটা ল’ৰা সন্তান বিচৰাৰ বাবেই তেওঁ পুনৰ গৰ্ভধাৰণ কৰিবলগীয়া হৈছে।
বৰৌতৰ স্পন্দন হাস্পতালৰ চিকিৎসক ডাঃ প্ৰজ্ঞা তোমৰে গৰ্ভৱতী মহিলাগৰাকীক পৰীক্ষা কৰাৰ সময়ত সোধা-পোচা কৰিছিল। তেতিয়াই পোহৰলৈ আহে যে মহিলাগৰাকীৰ বয়স মাত্ৰ ২২ বছৰ আৰু তেওঁ পাঁচ মাহৰ গৰ্ভৱতী। স্বামীৰ সৈতে অহা মহিলাগৰাকীয়ে জানিবলৈ দিয়ে যে তেওঁলোকৰ বাল্য বিবাহ হৈছিল। মাত্ৰ ১৫ বা ১৬ বছৰ বয়সতে বিয়াত বহা মহিলাগৰাকীৰ ডাঙৰ সন্তানটোৰ বয়স এতিয়া আঠ বছৰ। বৰ্তমান তেওঁলোকৰ চাৰিগৰাকী কন্যা আৰু এটা পুত্ৰ সন্তান আছে।
ইমান কম বয়সতে ইমানবোৰ সন্তান জন্ম দিয়াৰ কাৰণ সোধাত মহিলাগৰাকীয়ে কয় যে একেৰাহে ছোৱালী জন্ম হোৱাৰ বাবেই তেওঁলোকে পুনৰ সন্তান জন্ম দিবলগীয়া হৈছিল। কিন্তু এটা ল’ৰা সন্তান জন্ম হোৱাৰ পিছতো কিয় পুনৰ গৰ্ভধাৰণ কৰিছে বুলি সোধাত স্বামীয়ে উত্তৰ দিয়ে যে মাত্ৰ এটা ল’ৰা সন্তান পৰ্যাপ্ত নহয়, তেওঁলোকক কমেও দুটা ল’ৰা লাগে। ইয়াৰ উপৰিও স্বামীয়ে যুক্তি দৰ্শায় যে পৰিয়ালত সদস্যৰ সংখ্যা বেছি হ’লে ভৱিষ্যতে উপাৰ্জন কৰা মানুহো বেছি হ’ব।
পৰীক্ষাৰ সময়ত মহিলাগৰাকীয়ে মূৰ ঘূৰোৱা আৰু উশাহ লোৱাত কষ্ট পোৱা বুলি চিকিৎসকক জনাইছিল। ডাঃ তোমৰে দম্পতীহালক সকীয়াই দিয়ে যে দুটা সন্তানৰ মাজত প্ৰয়োজনীয় ব্যৱধান নথকাটোৱে মহিলাগৰাকীৰ স্বাস্থ্যলৈ তীব্ৰ ভাবুকি কঢ়িয়াই আনিছে। বংশ ৰক্ষাৰ নামত এগৰাকী মহিলাৰ জীৱনলৈ নামি অহা এনে বিপদক লৈ চিকিৎসকগৰাকীয়ে ক্ষোভ প্ৰকাশ কৰে। তেওঁ ইনষ্টাগ্ৰামত ভিডিঅ’টো শ্বেয়াৰ কৰি কেপচনত লিখে যে কেৱল পুত্ৰ সন্তানৰ আশাত কাৰোবাৰ জীৱন বিপদত পেলোৱাটো জানো শুদ্ধ।
এই ভিডিঅ’টো ছচিয়েল মিডিয়াত বিয়পি পৰাৰ লগে লগে নেটিজেনসকলেও তীব্ৰ প্ৰতিক্ৰিয়া প্ৰকাশ কৰিছে। বহুতেই স্বামীগৰাকীৰ মন্তব্যক কঠোৰ সমালোচনা কৰিছে আৰু মহিলাগৰাকীৰ স্বাস্থ্যক লৈ চিন্তা ব্যক্ত কৰিছে। এজন ব্যক্তিয়ে প্ৰশ্ন কৰিছে যে যিখন ঘৰত পৰিয়ালক পিন্ধিবলৈ কাপোৰ, থাকিবলৈ ঘৰ আৰু খাবলৈ দিব নোৱাৰে, তেনে বংশ বৃদ্ধি কৰি কি লাভ। আন এজনে লিখিছে যে স্বামীৰ মনত পত্নীৰ প্ৰতি অকণো মৰম বা সন্মান নাই। বৰ্তমানলৈকে প্ৰায় চাৰি কোটি মানুহে এই ভিডিঅ’টো চাইছে আৰু সমাজত আজিও চলি থকা এনে পুৰণি চিন্তাধাৰাক লৈ দুখ প্ৰকাশ কৰিছে।
