যোৱা দুবছৰত কৃত্রিম বুদ্ধিমত্তা বা এআইক মূলতঃ উৎপাদনশীলতা বৃদ্ধিৰ এক বিপ্লৱ হিচাপে তুলি ধৰা হৈছে। ছফ্টৱেৰ ক’ডিঙৰ পৰা আৰম্ভ কৰি গ্ৰাহক সেৱা, তথ্য বিশ্লেষণ, সমল সৃষ্টি আৰু কাৰ্যালয়ৰ দৈনন্দিন কাম-কাজলৈকে প্ৰায় সকলো ক্ষেত্রতে এআই ব্যৱহাৰৰ প্ৰৱণতা দ্ৰুতগতিত বৃদ্ধি পাইছে। বহু সংস্থাই বিশ্বাস কৰিছিল যে এআই ব্যৱহাৰ কৰিলে খৰচ কমিব আৰু কামৰ গতি তথা দক্ষতা দুয়োটাই বাঢ়িব।
কিন্তু এতিয়া পৰিস্থিতিৰ আন এটা দিশহে পোহৰলৈ আহিছে। ডাঙৰ ডাঙৰ প্ৰযুক্তি প্ৰতিষ্ঠান আৰু কৰ্প’ৰেট সংস্থাসমূহে বুজিবলৈ আৰম্ভ কৰিছে যে এআই ব্যৱহাৰৰ প্ৰকৃত খৰচ বহুত বেছি হ’ব পাৰে। বিশেষকৈ সংস্থাৰ ভিতৰত ব্যাপক হাৰত এআই ব্যৱহাৰ হ’বলৈ ধৰাৰ পিছত কম্পিউটিঙৰ খৰচ, ক্লাউড আন্তঃগাঁথনি আৰু টোকেন ব্যৱহাৰৰ ব্যয় অতি খৰতকীয়াভাৱে বৃদ্ধি পাইছে।
শেহতীয়াকৈ বিভিন্ন আন্তঃৰাষ্ট্ৰীয় প্ৰতিবেদন আৰু অনলাইন আলোচনাত প্ৰকাশ পাইছে যে একাধিক প্ৰযুক্তি প্ৰতিষ্ঠানে কৰ্মচাৰীসকলৰ এআই ব্যৱহাৰৰ ওপৰত চকু ৰাখিবলৈ আৰম্ভ কৰিছে। কাৰণ, এআই চলাবলৈ যি পৰিমাণৰ প্ৰচেছিং শক্তি আৰু চাৰ্ভাৰ ক্ষমতাৰ প্ৰয়োজন হয়, তাৰ খৰচ বহু ক্ষেত্ৰত প্ৰত্যাশিত ক্ষমতাতকৈ বহু বেছি হৈছে।
এআইয়ে নিশ্চিতভাৱে কামৰ দক্ষতা বৃদ্ধি কৰে, কিন্তু ডাঙৰ পৰিসৰত এআই চলাবলৈ বিপুল কম্পিউটিং ক্ষমতা, ক্লাউড চাৰ্ভাৰ আৰু সংৰক্ষণ ক্ষমতা বা ষ্ট’ৰেজৰ প্ৰয়োজন হয়। আৰম্ভণিতে সৰু পৰিসৰত এআই ব্যৱহাৰৰ খৰচ নিয়ন্ত্ৰণত থাকলেও, যেতিয়া এটা প্ৰতিষ্ঠানৰ বিভিন্ন বিভাগত একেলগে এআইৰ ব্যৱহাৰ বাঢ়ি যায়, তেতিয়া ইয়াৰ ব্যয়ো অতি দ্ৰুতগতিত বৃদ্ধি পায়।
এই গোটেই সমস্যাটোৰ কেন্দ্ৰবিন্দুতে আছে এটা গুৰুত্বপূৰ্ণ বিষয়, যাক টোকেন বুলি কোৱা হয়। সাধাৰণ ব্যৱহাৰকাৰীসকলৰ অনেকেই এই বিষয়টোৰ সন্দৰ্ভত অৱগত নহয়। এআই মডেলে কোনো কথা পঢ়া, বিশ্লেষণ কৰা বা উত্তৰ প্ৰস্তুত কৰাৰ সময়ত এই টোকেন ব্যৱহাৰ কৰে। অৰ্থাৎ, প্ৰতিটো প্ৰশ্ন, প্ৰতিবেদন, ই-মেইল, ক’ডিং, নথিপত্ৰ প্ৰচেছিং বা চেটবটৰ উত্তৰ তৈয়াৰ কৰাৰ ক্ষেত্ৰত এক নিৰ্দিষ্ট পৰিমাণৰ টোকেন খৰচ হয়।
এটা বা দুটা অনুৰোধত সেই খৰচ অতি কম যেন লাগিব পাৰে, কিন্তু হাজাৰ হাজাৰ কৰ্মচাৰীয়ে যদি গোটেই দিনটো এআই সঁজুলি ব্যৱহাৰ কৰে, তেন্তে মুঠ টোকেন ব্যৱহাৰৰ পৰিমাণ বিপুল হৈ পৰে। ইয়াৰ সৈতে উচ্চ ক্ষমতাসম্পন্ন চাৰ্ভাৰ আৰু ক্লাউড সেৱাৰ খৰচো যোগ হয়।
বিশেষজ্ঞদের মতে, অনাগত দিনত এআই ব্যৱহাৰৰ আটাইতকৈ ডাঙৰ প্ৰত্যাহ্বানটো কেৱল উন্নত প্ৰযুক্তি তৈয়াৰ কৰাই নহয়, বৰঞ্চ সেই প্ৰযুক্তিক দীৰ্ঘম্যাদীভাৱে আৰ্থিক দিশৰ পৰা টিকাই ৰখাটোহে। বহু সংস্থাই এতিয়া এআই ব্যৱহাৰৰ ক্ষেত্ৰত সীমা নিৰ্ধাৰণ কৰা, নিৰ্দিষ্ট কামৰ বাবে এআই ব্যৱহাৰৰ নীতি প্ৰস্তুত কৰা আৰু ব্যয় নিয়ন্ত্ৰণৰ কৌশল সন্দৰ্ভত চিন্তা-চৰ্চা কৰিবলৈ আৰম্ভ কৰিছে।
