শনিবাৰে নলবাৰী জিলাত সংঘটিত হোৱা চাঞ্চল্যকৰ গংগাপুৰৰ আছু নেতাক আক্ৰমণ কৰি হত্যাৰ ঘটনাৰ পিছতে সোমবাৰে (১ জুন) মুকালমুৱাত অসম আৰক্ষীৰ এনকাউণ্টাৰত এই ঘটানৰ মূল অভিযুক্ত ৰোজ আলী আঘাতপ্ৰাপ্ত হোৱা বুলি জানিব পৰা গৈছে।
জানিব পৰা মতে, পলাবলৈ চেষ্টা কৰোতেই আৰক্ষীয়ে অভিযুক্তলৈ গুলী কৰে। ৰোজ আলীৰ ভৰিত গুলী লাগিছে।
মাধুৰ্য বৰ্মনক হত্যা কৰাৰ ঘটনাৰ পিছতে পলায়ন কৰা ৰোজ আলী মুকালমুৱাৰ চৰত আত্মগোপন কৰি আছিল।
খবৰ অনুসৰি, আৰক্ষীৰ বন্দুক কাঢ়ি ল’ব খোজোতেই ৰোজ আলীক গুলী কৰে আৰক্ষীয়ে। মুকালমুৱাৰ চৰত আৰক্ষীৰ এটা বৃহত দল উপস্থিত হৈছে। আনহাতে, গুৰুতৰভাৱে আহত ৰোজ আলীক হাস্পাতাললৈ নিয়া হৈছে।
শনিবাৰে নিশা সংঘটিত হোৱা এই ঘটনাত ১৯ বছৰীয়া মাধুৰ্য বৰ্মনক হত্যা কৰাৰ লগতে ১৮ বছৰীয়া যুৱতী মৃদুমুদ্ৰা ডেকা গুৰুতৰভাৱে আহত হয়। মুকালমুৱাৰ অন্তৰ্গত গংগাপুৰৰ সমীপত স্কুটিৰে গৈ থকা অৱস্থাত আক্ৰমণৰ ঘটনা সংঘটিত হৈছিল। অভিযোগ অনুসৰি ৰোজ আলীৰ দাৰ ঘাপত মৃত্যু হৈছিল মাধুৰ্য বৰ্মনৰ।
চামতাৰ বালিপথাৰ নিবাসী তথা পশ্চিম নলবাৰী আঞ্চলিক ছাত্ৰ সন্থাৰ সহকাৰী সাধাৰণ সম্পাদক মাধুৰ্য বৰ্মনৰ থিতাতে মৃত্যু হয়। মৃদুমুদ্ৰা ডেকাক গুৰুতৰভাৱে আঘাতপ্ৰাপ্ত অৱস্থাত চিকিৎসালয়লৈ প্ৰেৰণ কৰা হয় আৰু বৰ্তমান তেওঁ গুৱাহাটী চিকিৎসা মহাবিদ্যালয় হাস্পাতালৰ আই চি ইউত চিকিৎসাধীন হৈ আছে।
অভিযোগ অনুসৰি ৰোজ আলী আৰু আছিক আলীয়ে এই আক্ৰমণ সংঘটিত কৰিছিল। এই ঘটনাৰ পিছতে আৰক্ষীয়ে তীব্ৰ তালাচী অভিযান আৰম্ভ কৰে আৰু ইয়াৰ পিছতে ৰোজ আলীৰ এনকাউণ্টাৰৰ ঘটনা সংঘটিত হয়।
এই ঘটনাই সমগ্ৰ ৰাজ্যজুৰি ব্যাপক ক্ষোভৰ সৃষ্টি কৰিছে। স্থানীয় একাংশ সংগঠন আৰু বাসিন্দাই অভিযোগ কৰিছে যে এই আক্ৰমণৰ সৈতে ছোৱালীজনীৰ অভিযুক্তৰ এজনৰ প্ৰস্তাৱ নাকচ কৰাৰ সম্পৰ্ক আছে। এই সংগঠনসমূহে এই ঘটনাক “লাভ জেহাদৰ” উদাহৰণ বুলি অভিহিত কৰিছে যদিও আৰক্ষীয়ে আনুষ্ঠানিকভাৱে এনে কোনো উদ্দেশ্য নিশ্চিত কৰা নাই আৰু এতিয়াও তদন্ত চলি আছে।
