আমেৰিকা যুক্তৰাষ্ট্ৰ আৰু ইৰাণৰ মাজত চলি থকা আলোচনাই যোগাত্মক গতি লাভ কৰিছে বুলি আমেৰিকাৰ ৰাষ্ট্ৰপতি ডনাল্ড ট্ৰাম্পে প্ৰকাশ কৰিছে। তেওঁ জানিবলৈ দিয়ে যে দুয়োখন দেশৰ মাজত বুজাবুজিৰ চুক্তি স্বাক্ষৰিত হোৱাৰ লগে লগে বিশ্বৰ অন্যতম গুৰুত্বপূৰ্ণ সামুদ্ৰিক বাণিজ্য পথ ‘হৰমুজ প্ৰণালী’ তাৎক্ষণিকভাৱে পুনৰ মুকলি কৰা হ’ব। অৱশ্যে, এতিয়ালৈকে কোনো চুক্তি চূড়ান্ত হোৱা নাই বুলিও তেওঁ স্পষ্ট কৰি দিয়ে।
ৱাশ্বিংটন আৰু তেহৰাণৰ মাজত উত্তেজনা হ্ৰাস কৰাৰ বাবে চলি থকা আন্তঃৰাষ্ট্ৰীয় প্ৰচেষ্টাৰ মাজতে ৰাষ্ট্ৰপতিগৰাকীয়ে এই মন্তব্য আগবঢ়াইছে। এক সম্ভাব্য চুক্তিৰ বিষয়ে উল্লেখ কৰি ট্ৰাম্পে কয় যে এই সপ্তাহান্ততে চুক্তিখন সম্পন্ন হোৱাৰ সম্ভাৱনা আছে। অৱশ্যে ইৰাণৰ সৈতে চলি থকা প্ৰক্ৰিয়াত যিকোনো মুহূৰ্ততে পৰিস্থিতি সলনি হ’ব পাৰে বুলি তেওঁ তাৎপৰ্যপূৰ্ণ মন্তব্য কৰে। দুয়োপক্ষৰ মাজত বুজাবুজিৰ চুক্তি স্বাক্ষৰিত হ’লেই হৰমুজ প্ৰণালী দ্ৰুতগতিৰে মুকলি হ’ব বুলি তেওঁ দৃঢ়তা প্ৰকাশ কৰে।
ইয়াৰ উপৰি, ভৱিষ্যতৰ যিকোনো চুক্তিৰ অংশ হিচাপে ইৰাণৰ সমৃদ্ধ ইউৰেনিয়ামৰ ভাণ্ডাৰ আমেৰিকা যুক্তৰাষ্ট্ৰই নিজৰ অধীনলৈ নিয়াৰ পৰিকল্পনা কৰিছে বুলি ট্ৰাম্পে সদৰী কৰে। সাংবাদিকৰ আগত তেওঁ কয় যে কেৱল আমেৰিকা যুক্তৰাষ্ট্ৰ আৰু চীনৰহে এই ইউৰেনিয়াম সুৰক্ষিতভাৱে পৰিচালনা কৰাৰ সক্ষমতা আছে আৰু সেয়েহে আমেৰিকাই ইয়াক হস্তগত কৰাৰ ব্যৱস্থা গ্ৰহণ কৰিব।
আনহাতে, ইৰাণৰ বৈদেশিক মন্ত্ৰী আব্বাছ আৰাঘচিয়েও দুয়োখন দেশৰ মাজত যোগাযোগ অব্যাহত থকা বুলি নিশ্চিত কৰিছে। লেবাননৰ আল মায়াদিন টেলিভিছনক দিয়া এক সাক্ষাৎকাৰত আৰাঘচিয়ে কয় যে সামগ্ৰিক আঞ্চলিক সংঘাত দূৰ কৰাৰ ক্ষেত্ৰত বিশেষ কোনো উল্লেখনীয় অগ্ৰগতি লাভ কৰা নাই যদিও ৱাশ্বিংটনৰ সৈতে তেহৰাণৰ কূটনৈতিক যোগাযোগৰ পথ এতিয়াও সক্ৰিয় হৈ আছে।
