চিকিৎসক আৰু এপ’ল’ হাস্পতাল গুৱাহাটীৰ স্থানীয় মেনেজমেন্টৰ মাজত এক বিবাদ মুকলিকৈ ওলাই আহিছে। চিকিৎসালয়খনৰ চিকিৎসক ফ’ৰামে গোটটোৰ শীৰ্ষ নেতৃত্বৰ পৰা হস্তক্ষেপ বিচাৰিছে আৰু প্ৰতিষ্ঠানটোৰ প্ৰশাসনৰ স্বতন্ত্ৰ পৰ্যালোচনাৰ দাবী জনাইছে।
চিকিৎসালয়খনৰ স্থানীয় প্ৰশাসনৰ সদস্যসকলে এজন জ্যেষ্ঠ চিকিৎসকক অপমান কৰা বুলি অভিযোগ উত্থাপন কৰি চিকিৎসকসকলে জৰুৰীকালীন সেৱা অব্যাহত ৰাখি দুদিনৰ বাবে বহিঃৰোগী বিভাগৰ সেৱা আৰু ঐচ্ছিক অস্ত্ৰোপচাৰৰ পৰা আঁতৰি থকাৰ সিদ্ধান্ত লোৱা বুলি জানিব পৰা গৈছে।
সূত্ৰসমূহে জনোৱা মতে, এই বিষয়টোৱে চিকিৎসকসকলৰ মাজত ব্যাপক ক্ষোভৰ সৃষ্টি কৰিছিল আৰু পৰৱৰ্তী সময়ত এপ’ল’ হাস্পতালৰ কৰ্পৰেট নেতৃত্বকো এই বিষয়টো অৱগত কৰা হৈছে।
এপ’ল’ হাস্পতালৰ উপাধ্যক্ষ পৃথা ৰেড্ডী, যুটীয়া পৰিচালন সঞ্চালক সংগীতা ৰেড্ডী আৰু চিকিৎসক মধু আৰু ৰোহিনীলৈ প্ৰেৰণ কৰা এখন পত্ৰত চিকিৎসক ফ’ৰামে চিকিৎসা কৰ্মী আৰু স্থানীয় প্ৰশাসনৰ মাজত ক্ৰমাৎ বৃদ্ধি পোৱা আস্থা ভংগৰ অভিযোগ উত্থাপন কৰিছে।
ফ’ৰামে কয় যে প্ৰশাসনৰ কাৰ্য্যকলাপক লৈ দুবছৰতকৈও অধিক সময় ধৰি উদ্বেগ গঢ় লৈ উঠিছে যদিও শেহতীয়াকৈ জ্যেষ্ঠ চিকিৎসক এম.পি. দাস আৰু আশীষ আগৰৱালাই বিষয়টো তুলি ধৰিছিল।
পত্ৰখনত মুখ্য পৰিচালন বিষয়া মনোজ ৰয়, মানৱ সম্পদ বিভাগৰ মুৰব্বী প্ৰতীক আগৰৱাল, পৰিচালনা মুৰব্বী অমৰ শৰ্মা আৰু চিকিৎসা অধীক্ষক হীৰক দাসৰ নাম উল্লেখ কৰি বৰ্তমানৰ নেতৃত্বই পাৰস্পৰিক সন্মান আৰু পেছাদাৰী মৰ্যাদাৰ পৰিৱেশ সৃষ্টি কৰাত ব্যৰ্থ হোৱা বুলি অভিযোগ উত্থাপন কৰিছে।
চিকিৎসকসকলৰ মতে, প্ৰশাসন আৰু চিকিৎসা পেছাদাৰীসকলৰ মাজত হোৱা বিবাদৰ ফলত প্ৰতিষ্ঠানটোৰ ভিতৰত অসন্তুষ্টি আৰু অনাস্থাৰ সৃষ্টি হৈছে।
ফ’ৰামে লগতে অভিযোগ কৰে যে ৰোগীৰ যত্ন আৰু পেছাদাৰী নৈতিকতাৰ প্ৰতি প্ৰতিষ্ঠানটোৰ বৃহত্তৰ প্ৰতিশ্ৰুতিৰ মূল্যত চিকিৎসালয়ৰ সিদ্ধান্তসমূহ হ্ৰস্বম্যাদী আৰ্থিক বিবেচনাৰ দ্বাৰা প্ৰভাৱিত হৈছে।
চিকিৎসালয়খনৰ ভিতৰৰ সূত্ৰসমূহেও অভিযোগ কৰিছে যে চিকিৎসকসকলক ৰাজহৰ সৈতে জড়িত ফলাফলৰ আশাৰ বলি কৰা হৈছে। তেওঁলোকে দাবী কৰে যে ৰোগীসকলক কিছুমান ক্ষেত্ৰত নিৰ্দিষ্ট ৰোগৰ চিকিৎসা বিচাৰিলেও সম্পূৰ্ণ শৰীৰৰ স্বাস্থ্য পেকেজকে ধৰি বিস্তৃত নিদান পৰীক্ষা কৰিবলৈ উৎসাহিত কৰা হৈছিল, যাৰ ফলত অতিৰিক্ত খৰচ হৈছিল। এই অভিযোগসমূহ স্বতন্ত্ৰভাৱে পৰীক্ষা কৰিব পৰা নগ’ল।
চিকিৎসকসকলে কয় যে প্ৰচলিত প্ৰশাসনিক কৰ্ম সংস্কৃতিৰ লগতে এনেধৰণৰ প্ৰথাই মনোবলত প্ৰভাৱ পেলাইছে আৰু প্ৰতিষ্ঠানটোৰ ভিতৰৰ আত্মবিশ্বাসৰ ক্ষতি কৰিছে।
গুৱাহাটীৰ পৰিস্থিতিৰ কেন্দ্ৰীয় আৰু স্বতন্ত্ৰ মূল্যায়ন গ্ৰহণ কৰিবলৈ এপ’ল’ নেতৃত্বক আহ্বান জনাই ফ’ৰামে কয়, ‘আমাৰ বহুতেই আমাৰ পেছাদাৰী জীৱনৰ ২৫ বছৰতকৈ অধিক সময় একান্তভাৱে এই প্ৰতিষ্ঠানটো নিৰ্মাণৰ বাবে উৎসৰ্গা কৰিছো।
ধৰ্মঘটৰ সময়ত অ’পিডিৰ “পৰিত্যক্ত ৰূপ”ৰ কথাও উল্লেখ কৰি পত্ৰখনত কোৱা হৈছে যে ইয়াৰ ফলত চিকিৎসালয়খন নিৰ্মাণৰ বাবে দশক দশক ধৰি বিনিয়োগ কৰা জ্যেষ্ঠ চিকিৎসকসকলৰ মাজত ক্ষোভৰ সৃষ্টি হৈছে।
সংশোধনীমূলক ব্যৱস্থা বিচাৰি ফ’ৰামে বৰ্তমানৰ প্ৰশাসনিক গাঁথনি আৰু নেতৃত্বৰ পুনৰ মূল্যায়নৰ আহ্বান জনাই কয় যে চিকিৎসক আৰু কৰ্মচাৰীৰ মাজত আস্থা ঘূৰাই অনাটো প্ৰয়োজনীয়।
চিকিৎসকসকলে অৱশ্যে প্ৰতিষ্ঠানটোৰ প্ৰতি থকা দায়বদ্ধতা পুনৰবাৰ উল্লেখ কৰি চিকিৎসালয়খনৰ দীৰ্ঘম্যাদী বিকাশ আৰু সুনামৰ স্বাৰ্থত হস্তক্ষেপ বিচাৰিছে বুলি কয়।
এই প্ৰতিবেদন দাখিল পৰ্যন্ত এই অভিযোগৰ কোনো সঁহাৰি দিয়া নাই এপ’ল’ হাস্পতাল গুৱাহাটীয়ে।
