পাকিস্তানৰ পঞ্জাব প্ৰদেশত এটা ১২৫ বছৰ পুৰণি গুৰুদ্বাৰ ধ্বংস কৰাৰ অভিযোগ উঠিছে এজন স্থানীয় ব্যৱসায়ীৰ বিৰুদ্ধে। এই ঘটনাক লৈ বৰ্তমান তীব্ৰ বিতৰ্কৰ সৃষ্টি হৈছে। পাকিস্তানত বসবাস কৰা সংখ্যালঘু শিখ সম্প্ৰদায়ৰ লোকসকলে ইয়াৰ বিৰুদ্ধে তীব্ৰ প্ৰতিবাদ সাব্যস্ত কৰিছে। সমগ্ৰ ঘটনাক ভাৰতৰ ফালৰ পৰাও কঠোৰ ভাষাৰে নিন্দা কৰা হৈছে।
ঐতিহাসিক এই গুৰুদ্বাৰটো লাহোৰৰ পৰা প্ৰায় ৭০ কিলোমিটাৰ দূৰত থকা ফাৰুকাবাদত অৱস্থিত। শেহতীয়াকৈ এজন স্থানীয় ব্যৱসায়ীয়ে এইটো সম্পূৰ্ণৰূপে ভাঙি পেলোৱা বুলি অভিযোগ উত্থাপন হৈছে। পঞ্জাব প্ৰদেশৰ এজন চৰকাৰী বিষয়াই সংবাদ সংস্থাক জনোৱা মতে, উক্ত ব্যৱসায়ীজনে বিভাগীয় কৰ্তৃপক্ষৰ পৰা কোনো ধৰণৰ প্ৰয়োজনীয় অনুমতি নোলোৱাকৈয়ে গুৰুদ্বাৰটো ভাঙি পেলাইছিল। স্থানীয় শিখ লোকসকলে প্ৰতিবাদ নকৰালৈকে প্ৰশাসনে এই বিষয়টোত কোনো ধৰণৰ গুৰুত্ব প্ৰদান কৰা নাছিল।
পৰৱৰ্তী সময়ত ৰাইজৰ ক্ষোভ বৃদ্ধি পোৱাৰ পিছত পঞ্জাবৰ মুখ্যমন্ত্ৰী মৰিয়ম নৱাজে বিষয়টোত গুৰুত্ব আৰোপ কৰে। বুধবাৰে পঞ্জাবৰ সংখ্যালঘু পৰিক্ৰমা মন্ত্ৰী ৰমেশ সিং অৰোৰাই ঘটনাস্থলী পৰিদৰ্শন কৰে। তেওঁ শিখ সম্প্ৰদায়ক আশ্বাস দিছে যে গুৰুদ্বাৰটো পুনৰ নিৰ্মাণ কৰা হ‘ব। ইয়াৰ লগতে সংখ্যালঘুসকলৰ মৌলিক অধিকাৰ ৰক্ষা কৰা আৰু তেওঁলোকৰ উপাসনাস্থলীসমূহৰ সুৰক্ষা নিশ্চিত কৰাৰো প্ৰতিশ্ৰুতি প্ৰদান কৰিছে মন্ত্ৰীগৰাকীয়ে।
