জুলাই মাহৰ সৰহভাগ সময় বিধ্বংসী বানপানীৰ সৈতে যুঁজ দিয়াৰ পাছতো অসমত চলিত বাৰিষা কালত এতিয়ালৈকে স্বাভাৱিকতকৈ ২৮ শতাংশ কম বৰষুণ হৈছে। ভাৰতীয় বতৰ বিজ্ঞান বিভাগৰ (IMD) শেহতীয়া তথ্যত এই কথা প্ৰকাশ পাইছে। বৰষুণৰ এই ঘাটিয়ে ৰাজ্যখনত বানপানীৰ ভয়াবহতাৰ মাজতো বৰষুণৰ অসমান বিতৰণৰ ছবিখন স্পষ্ট কৰি তুলিছে।
বতৰ বিজ্ঞান বিভাগৰ তথ্য অনুসৰি, জুন আৰু জুলাই মাহত প্ৰাকৃতিক দুৰ্যোগৰ মাজতো উত্তৰ-পূবৰ আঠখন ৰাজ্যৰ পাঁচখনতেই স্বাভাৱিকতকৈ কম বৰষুণ হৈছে। বিষয়াসকলৰ মতে, বংগোপসাগৰত সৃষ্টি হোৱা দুৰ্বল বতৰ প্ৰণালী, সক্ৰিয় মৌচুমী বতাহৰ অভাৱ আৰু ‘এল নিনো’ৰ প্ৰভাৱেই ইয়াৰ মূল কাৰণ।
বৰষুণৰ ঘাটিৰ ক্ষেত্ৰত মেঘালয় আটাইতকৈ আগত আছে, য’ত ৫৮% বৰষুণ কমকৈ হৈছে। ইয়াৰ পিছতেই আছে অৰুণাচল প্ৰদেশ (৪১%), মণিপুৰ (৪০%), অসম (২৮%) আৰু মিজোৰাম (২৪%)। আনহাতে, ছিকিম, ত্ৰিপুৰা আৰু নাগালেণ্ডত এই দুমাহত স্বাভাৱিক বৰষুণ হৈছে।
কেৱল জুন মাহৰ কথা চালে দেখা যায় যে অসমত বৰষুণৰ ঘাটি আছিল ৩৭%। সেই মাহত নাগালেণ্ডত ৫৬%, অৰুণাচল প্ৰদেশত ৪৪%, মিজোৰামত ৩৭% আৰু ত্ৰিপুৰাত ৩৬% ঘাটতি দেখা গৈছিল। মেঘালয় আৰু মণিপুৰক আই এম ডিয়ে “অতি ঘাটতিপূৰ্ণ” শ্ৰেণীত ৰাখিছিল, কাৰণ তাত ক্ৰমে ৭৪% আৰু ৭১% বৰষুণ কম হৈছিল।
উত্তৰ-পূবৰ লগতে পশ্চিমবংগ, বিহাৰ আৰু ঝাৰখণ্ডক সামৰি লোৱা অঞ্চলটোতো জুন-জুলাইত সামগ্ৰিকভাৱে ৩০ শতাংশতকৈ অধিক বৰষুণৰ নাটনি দেখা গৈছে।
চলিত বৰ্ষত দক্ষিণ-পশ্চিম মৌচুমী বতাহ স্বাভাৱিকতকৈ দুদিন পলমকৈ ৭ জুনত উত্তৰ-পূবত প্ৰৱেশ কৰিছিল। বতৰ বিজ্ঞানীসকলৰ মতে, চলিত বৰ্ষৰ দ্বিতীয় ভাগত ‘এল নিনো’ অধিক শক্তিশালী হোৱাৰ সম্ভাৱনা আছে, যাৰ ফলত এছিয়াৰ বহু ঠাইত গৰম আৰু শুকান পৰিৱেশ সৃষ্টি হ’ব পাৰে।
অৱশ্যে, আগষ্ট আৰু ছেপ্টেম্বৰ মাহত দেশৰ আন ঠাইত কম বৰষুণ হোৱাৰ সম্ভাৱনা থাকিলেও উত্তৰ-পূব ভাৰতত স্বাভাৱিক বা তাতকৈ অধিক বৰষুণ হ’ব পাৰে বুলি আই এম ডিয়ে আশা প্ৰকাশ কৰিছে, যিয়ে অঞ্চলটোলৈ কিছু সকাহ আনিব।
ভাৰতৰ মুঠ বৰষুণৰ প্ৰায় ৭০ শতাংশ আহে দক্ষিণ-পশ্চিম মৌচুমী বতাহৰ পৰা। উত্তৰ-পূবৰ বৃহৎসংখ্যক মানুহ কৃষিকাৰ্যৰ বাবে বৰষুণৰ ওপৰতেই নিৰ্ভৰশীল। সেয়েহে, আগন্তুক মাহকেইটাত পৰ্যাপ্ত বৰষুণ হ’লেহে খৰিফ শস্যৰ উৎপাদন ভাল হ’ব আৰু নদী, জলাশয় তথা ভূগৰ্ভৰ জলস্তৰ স্বাভাৱিক অৱস্থালৈ ঘূৰি আহিব।
