নব্বৈ দশকৰ অসমৰ সংবাদ জগতৰ আলোকচিত্ৰ শিল্পী প্রদীপ দত্তৰ বুধবাৰে পৰলোকপ্ৰাপ্তি ঘটে। মৃত্যুৰ সময়ত তেওঁৰ বয়স আছিল ৫৮ বছৰ।
আৰম্ভণিৰ পৰাই অসম স্পৰ্টচ জাৰ্ণেলিষ্ট এছ’চিয়েছনৰ লগতো সক্ৰিয় সদস্য হিচাপে বহু দিন ধৰি জড়িত হৈ আছিল। তেওঁ ক্ৰীড়া ফটোগ্ৰাফাৰ হিচাপে কাম কৰিছিল। এগৰাকী হাঁহিমুখীয়া ব্যক্তি দত্তই সকলোৰে সৈতে সুসম্পৰ্ক ৰক্ষা কৰি চলিছিল।
অধুনালুপ্ত ইংৰাজী দৈনিক দ্য নিউজফ্ৰন্ট, বাংলা দৈনিক গণ পত্ৰিকা আৰু অৰ্ধসাপ্তাহিক অসমীয়া কাকত অমৰজ্যোতিত ফটোগ্ৰাফাৰ হিচাপে কাম কৰিছিল। পিছলৈ দত্ত বিভিন্ন এনজিঅ’ৰ লগত জড়িত হৈ পৰিছিল।
বুধবাৰে পুৱা কাহিলীপাৰা নৰকাসুৰৰ বাসগৃহত দত্ত হঠাতে গা বেয়া লাগি ঢলি পৰে। তেওঁক ততাতৈয়াকৈ হাস্পাতাললৈ নিয়া হয় যদিও তাৰ আগতেই তেওঁ শেষ নিশ্বাস ত্যাগ কৰে।
জিএমচিএইচত মৰণোত্তৰ পৰীক্ষাৰ পিছত নিশাৰ ভাগত নৱগ্ৰহ শ্মশানত তেওঁৰ শেষ কৃত্য সম্পন্ন কৰা হয়।
প্ৰদীপ দত্তৰ অকাল মৃত্যুত বিভিন্ন সংগঠন, তেওঁৰ সাংবাদিক বন্ধু আৰু গুণমুগ্ধসকলে গভীৰ শোক প্ৰকাশ কৰে আৰু শোকসনম্তপ্ত পৰিয়াললৈ গভীৰ সমবেদনা জ্ঞাপন কৰে।
প্রদীপ দত্তৰ আকস্মিক বিয়োগে অসমীয়া সংবাদ জগতত শোকৰ ছাঁ পেলাইছে৷
