গুৱাহাটীৰ হেঙেৰাবাৰীত মঙলবাৰে নিশা এগৰাকী মহিলাৰ মৃতদেহ উদ্ধাৰ হোৱাক লৈ চাঞ্চল্যৰ সৃষ্টি হৈছে। প্ৰাথমিক তদন্তত ঘটনাটো আত্মহত্যাৰ ঘটনা বুলি সন্দেহ কৰিছে আৰক্ষীয়ে।
মৃত মহিলাগৰাকীক ৰিম্পী কলিতা বুলি চিনাক্ত কৰা হৈছে। জানিব পৰা মতে, প্ৰায় দুমাহ পূৰ্বে হীৰক জ্যোতি ডেকাৰ সৈতে তেওঁৰ বিবাহ হৈছিল। হেঙেৰাবাৰীৰ কানেক্টিং ৰোডৰ ৯ নম্বৰ ঘৰত এই ঘটনা সংঘটিত হয়।
প্ৰাথমিক তথ্য অনুসৰি, হীৰক জ্যোতি ডেকা জুবিন ক্ষেত্ৰলৈ গৈছিল। নিশা ঘৰলৈ উভতি অহাৰ পাছত তেওঁ ঘৰৰ ভিতৰত পত্নী ৰিম্পী কলিতাক মৃত অৱস্থাত দেখা পায়। ইয়াৰ পাছতে স্থানীয় লোকক খবৰ দিয়াৰ লগতে দিছপুৰ আৰক্ষীকো ঘটনাৰ বিষয়ে অৱগত কৰা হয়।
খবৰ লাভ কৰি দিছপুৰ আৰক্ষীৰ এটা দল ঘটনাস্থলীত উপস্থিত হৈ তদন্ত আৰম্ভ কৰে। আৰক্ষীয়ে ঘৰৰ ভিতৰৰ পৰিস্থিতি পৰীক্ষা কৰাৰ লগতে স্থানীয় লোক আৰু চুবুৰীয়াসকলৰ বক্তব্য সংগ্ৰহ কৰিছে।
ইফালে, আৰক্ষীয়ে ঘটনাটো আত্মহত্যা বুলি সন্দেহ কৰিলেও একাংশ চুবুৰীয়াই ৰিম্পী কলিতাক হত্যা কৰা হ’ব পাৰে বুলি সন্দেহ প্ৰকাশ কৰিছে। লগতে স্বামী হীৰক জ্যোতি ডেকাৰ সম্ভাব্য জড়িতক লৈও প্ৰশ্ন উত্থাপন কৰিছে। অৱশ্যে এই অভিযোগৰ কোনো সত্যতা আৰক্ষীয়ে এতিয়ালৈকে নিশ্চিত কৰা নাই।
ঘটনাৰ পাছত হীৰক জ্যোতি ডেকাক আৰক্ষীয়ে সোধা-পোছাৰ বাবে আটক কৰিছে। তদন্তকাৰী বিষয়াসকলে ঘটনাস্থলীৰ পৰিস্থিতি, স্থানীয় লোকৰ বক্তব্য আৰু অন্যান্য তথ্য-প্ৰমাণ পৰীক্ষা কৰি আছে।
মৃত্যুৰ প্ৰকৃত কাৰণ আৰু ঘটনাটো আত্মহত্যা নে আন কোনো ধৰণৰ ঘটনা, সেয়া মৰণোত্তৰ পৰীক্ষাৰ পাছতহে স্পষ্ট হ’ব। ঘটনাক লৈ আৰক্ষীৰ তদন্ত অব্যাহত আছে। অধিক তথ্যৰ বাবে অপেক্ষা কৰা হৈছে।
