তেলেংগানাৰ কংগ্ৰেছ মুখ্যমন্ত্ৰী ৰেভন্থ ৰেড্ডীক আমেৰিকা ভ্ৰমণৰ অনুমতি নিদিলে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে। শুকুৰবাৰে লণ্ডনৰ পৰা নিউয়ৰ্কলৈ যোৱাৰ কথা আছিল মুখ্যমন্ত্ৰীগৰাকীৰ। কিন্তু শেষ মুহূৰ্তলৈ অপেক্ষা কৰিও আমেৰিকা ভ্ৰমণৰ বাবে কেন্দ্ৰৰ পৰা অনুমতি লাভ নকৰিলে ৰেড্ডীয়ে।
বৰ্তমান ৰেভন্থ ৰেড্ডী লণ্ডনত আছে। আমেৰিকা যোৱাৰ অনুমতি নোপোৱাৰ পিছত তেওঁৰ বিদেশ ভ্ৰমণৰ কাৰ্যসূচী সলনি কৰিবলগীয়া হৈছে। এতিয়া দেওবাৰে হায়দৰাবাদলৈ উভতি অহাৰ কথা মুখ্যমন্ত্ৰীগৰাকী।
ৰেভন্থ ৰেড্ডীয়ে যোৱা সপ্তাহত ব্ৰিটেইন আৰু আমেৰিকা ভ্ৰমণৰ বাবে তেলেংগানা এৰিছিল। লণ্ডনত কেইবাটাও কাৰ্যসূচী সম্পন্ন কৰাৰ পিছত শুকুৰবাৰে নিউয়ৰ্কলৈ যোৱাৰ পৰিকল্পনা আছিল। কিন্তু আমেৰিকা ভ্ৰমণৰ বাবে কেন্দ্ৰীয় চৰকাৰৰ অনুমতি নোপোৱাত সেই কাৰ্যসূচী বাতিল কৰিবলগীয়া হয়।
তেলেংগানা মুখ্যমন্ত্ৰীৰ কাৰ্যালয়ৰ পৰা জানিব পৰা মতে, নিউয়ৰ্কত ৰেভন্থ ৰেড্ডীৰ কেইবাখনো শিক্ষা প্ৰতিষ্ঠানৰ প্ৰতিনিধিৰ সৈতে বৈঠকৰ কথা আছিল। তেলেংগানাত সেই শিক্ষা প্ৰতিষ্ঠানসমূহৰ শাখা স্থাপনৰ লক্ষ্যৰে ৰাজ্য চৰকাৰে আলোচনা আগবঢ়াইছিল।
মুখ্যমন্ত্ৰীৰ কাৰ্যালয়ে লগতে জনাইছে যে আমেৰিকা ভ্ৰমণৰ অনুমতি কিয় দিয়া নহ’ল, সেই বিষয়ে কেন্দ্ৰীয় চৰকাৰে কোনো কাৰণ উল্লেখ কৰা নাই। মন্ত্ৰী আৰু মুখ্যমন্ত্ৰীৰ দৰে উচ্চপদস্থ জনপ্ৰতিনিধিয়ে বিদেশ ভ্ৰমণ কৰাৰ পূৰ্বে কেন্দ্ৰীয় চৰকাৰৰ পৰা পলিটিকেল ক্লিয়াৰেন্স বা ৰাজনৈতিক অনুমতি ল’ব লাগে।
কংগ্ৰেছৰ অভিযোগ অনুসৰি, ইয়াৰ পূৰ্বেও বিজেপি-বিৰোধী কেইবাগৰাকী মুখ্যমন্ত্ৰীৰ বিদেশ ভ্ৰমণত কেন্দ্ৰীয় চৰকাৰৰ অনুমতি নোপোৱাৰ ঘটনা ঘটিছে। পশ্চিমবংগৰ মুখ্যমন্ত্ৰী মমতা বন্দ্যোপাধ্যায়, দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱাল, কেৰালাৰ মুখ্যমন্ত্ৰী পিনাৰাই বিজয়ন আৰু পঞ্জাবৰ মুখ্যমন্ত্ৰী ভগৱন্ত মানৰ বিদেশ ভ্ৰমণক লৈও এনে বিতৰ্ক সৃষ্টি হৈছিল।
ৰেভন্থ ৰেড্ডীৰ আমেৰিকা ভ্ৰমণৰ অনুমতি নোপোৱা ঘটনাই এতিয়া পুনৰ কেন্দ্ৰ আৰু অবিজেপি ৰাজ্য চৰকাৰৰ মাজত বিদেশ ভ্ৰমণৰ অনুমতি সম্পৰ্কীয় বিতৰ্কক নতুন ৰূপ দিছে। কেন্দ্ৰীয় চৰকাৰে এই সন্দৰ্ভত কোনো স্পষ্ট কাৰণ ৰাজহুৱা নকৰাত বিষয়টোক লৈ ৰাজনৈতিক মহলত চৰ্চা বৃদ্ধি পাইছে।
