সমগ্ৰ দেশৰ ৫২ গৰাকী প্ৰতিযোগীক পিছ পেলাই ‘মিছ ইউনিভাৰ্ছ ইণ্ডিয়া ২০২৬’ৰ খিতাপ দখল কৰিছে কেৰেলামৰ ১৯ বছৰীয়া সুন্দৰী কেজিয়া লিজ মেজোৱে। দেওবাৰে জয়পুৰৰ জি ষ্টুডিঅ’ত অনুষ্ঠিত এক বৰ্ণাঢ্য গ্ৰেণ্ড ফাইনেল অনুষ্ঠানত তেওঁক এই সন্মানীয় মুকুট পিন্ধোৱা হয়। এই জয়েৰে কেজিয়াই আগন্তুক নৱেম্বৰ মাহত পুৱেৰ্টো ৰিকোত অনুষ্ঠিত হ’বলগীয়া ৭৫ সংখ্যক ‘মিছ ইউনিভাৰ্ছ’ প্ৰতিযোগিতাত ভাৰতক প্ৰতিনিধিত্ব কৰাৰ যোগ্যতা অৰ্জন কৰিছে।
যোৱা বৰ্ষৰ অৰ্থাৎ ২০২৫ চনৰ ‘মিছ ইউনিভাৰ্ছ ইণ্ডিয়া’ মণিকা বিশ্বকৰ্মাই কেজিয়াক এই নতুন মুকুট পিন্ধায়। খিতাপ জয় কৰাৰ পিছত নিজৰ অনুভৱ ব্যক্ত কৰি কেজিয়াই কয় যে যোৱা তিনি বছৰ ধৰি তেওঁ এই দিনটোৰ বাবেই কঠোৰ পৰিশ্ৰম কৰি আছিল। নিজৰ ৰাজ্য কেৰেলাম আৰু সমগ্ৰ দেশলৈ এই গৌৰৱ কঢ়িয়াই আনিব পাৰি তেওঁ অত্যন্ত সুখী বুলি মন্তব্য কৰে। মাত্ৰ ১৯ বছৰ বয়সতে ইমান ডাঙৰ মঞ্চত থিয় হ’বলৈ প্ৰয়োজন হোৱা সাহস আৰু আত্মবিশ্বাসৰ কথাও তেওঁ উল্লেখ কৰে। তেওঁ কয় যে জীৱনৰ আটাইতকৈ ডাঙৰ সংগ্ৰামখন মানুহৰ নিজৰ ভিতৰতেই থাকে, আৰু সেইটো হৈছে নিজৰ সামৰ্থ্যক বিশ্বাস কৰাটো।
ভৱিষ্যতৰ পৰিকল্পনা সন্দৰ্ভত সাংবাদিকৰ আগত কেজিয়াই কয় যে তেওঁৰ বৰ্তমানৰ একমাত্ৰ লক্ষ্য হৈছে ভাৰতলৈ ‘মিছ ইউনিভাৰ্ছ’ৰ খিতাপ কঢ়িয়াই অনা। তেওঁৰ প্ৰতিটো কামতে ভাৰত আৰু কেৰালামক বিশ্ব দৰবাৰত প্ৰতিনিধিত্ব কৰিব বিচাৰে বুলিও ১৯ বছৰীয়া সুন্দৰীগৰাকীয়ে মতপ্ৰকাশ কৰে।
উল্লেখ্য যে, এই সন্মানীয় প্ৰতিযোগিতাখনৰ বিচাৰকৰ আসনত আছিল ভাৰতৰ প্ৰথমগৰাকী ‘মিছ ইউনিভাৰ্ছ’ সুস্মিতা সেন, প্ৰাক্তন ‘মিছ ইউনিভাৰ্ছ ইণ্ডিয়া’ উৰ্বশী ৰৌটেলা, ২০২৪ বৰ্ষৰ বিজয়ী ৰিয়া সিংহা, প্ৰাক্তন ৰানাৰ্ছ-আপ চেলিনা জেটলী আৰু চলচ্চিত্ৰ প্ৰযোজক তথা পৰিৱেশকৰ্মী প্ৰজ্ঞা কাপুৰ।
আনহাতে, প্ৰতিযোগিতাখনত প্ৰথম ৰানাৰ্ছ-আপ তথা ‘মিছ ইণ্টাৰনেশ্যনেল ইণ্ডিয়া ২০২৬’ৰ খিতাপ জিকে বৈষ্ণৱী গণেশে। একেদৰে অনুশ্ৰী সাতভলেকাৰে দ্বিতীয়, তেজস্বিনী শ্ৰীবাস্তৱে তৃতীয় আৰু অনুভা বশিষ্ঠ চৌধুৰীয়ে চতুৰ্থ ৰানাৰ্ছ-আপৰ খিতাপ দখল কৰিবলৈ সক্ষম হয়।
