অন্ধ্ৰ প্ৰদেশৰ বিশাখাপট্টনমত গুগলৰ প্ৰস্তাৱিত ডাটা চেণ্টাৰৰ বাবে স্থানীয় লোকসকলে সন্মুখীন হোৱা স্থানান্তৰকৰণৰ সমস্যা আৰু ইয়াৰ প্ৰভাৱৰ বিষয়ে প্ৰস্তুত কৰা এটা জনপ্ৰিয় ইনষ্টাগ্ৰাম ৰিল ভাৰতত নিষিদ্ধ কৰাক লৈ তীব্ৰ বিতৰ্কৰ সৃষ্টি হৈছে। এই পদক্ষেপৰ বিৰোধিতা কৰি ইণ্টাৰনেট ফ্ৰিডম ফাউণ্ডেচনে (IFF) শেহতীয়াকৈ অন্ধ্ৰ প্ৰদেশ চৰকাৰৰ সংশ্লিষ্ট কৰ্তৃপক্ষলৈ এখন আইনী জাননী প্ৰেৰণ কৰিছে।
২০২৬ চনৰ জানুৱাৰী মাহত স্বতন্ত্ৰ সাংবাদিক ছামছিৰ ইউচুফ আৰু মনিকা ঝাই বিশাখাপট্টনমৰ তাৰ্লুভাদা গাঁৱত গুগলৰ প্ৰস্তাৱিত ডাটা চেণ্টাৰৰ বিষয়ে এক ক্ষেত্ৰভিত্তিক প্ৰতিবেদন প্ৰস্তুত কৰিছিল। এই প্ৰকল্পটো আমেৰিকা যুক্তৰাষ্ট্ৰৰ বাহিৰত গুগলৰ আটাইতকৈ ডাঙৰ ডাটা চেণ্টাৰ হ’ব বুলি জানিব পৰা গৈছে। সাংবাদিক দুগৰাকীয়ে ‘ডাৰ্টি ডাটা’ (Dirty Data) নামৰ এটা প্ৰকল্পৰ অধীনত ‘As data centers arrive, India’s poorest face displacement, health risks’ শীৰ্ষক এটা প্ৰবন্ধ প্ৰস্তুত কৰিছিল। ইয়াৰ লগতে তেওঁলোকে ৫ মিনিট ৬ ছেকেণ্ডৰ এটা সম্পূৰ্ণ ভিডিঅ’ প্ৰতিবেদন ইউটিউব আৰু ইনষ্টাগ্ৰামত প্ৰকাশ কৰিছিল।
পাছত ইনষ্টাগ্ৰামৰ বাবে ভিডিঅ’টোৰ ২ মিনিট ১ ছেকেণ্ডৰ এটা সংক্ষিপ্ত সংস্কৰণ বা ৰিল প্ৰস্তুত কৰা হয়। এই সংক্ষিপ্ত ভিডিঅ’টোৱে দ্ৰুতগতিত জনপ্ৰিয়তা অৰ্জন কৰি প্ৰায় ২.৬ মিলিয়ন (২৬ লাখ) লোকে চায়। কিন্তু একে বছৰৰে ২২ মে’ তাৰিখে কোনো আগতীয়া জাননী নিদিয়াকৈ তথ্য প্ৰযুক্তি আইন, ২০০০-ৰ ধাৰা ৭৯(৩)(বি) অনুসৰি ভিডিঅ’টো ভাৰতত নিষিদ্ধ কৰা হয়।
তথ্য প্ৰযুক্তি মন্ত্ৰালয় আৰু মেটাৰ ওচৰত আবেদন জনোৱাৰ পাছতো কোনো সঁহাৰি নোপোৱাত, সাংবাদিক দুগৰাকীয়ে ৩০ জুন, ২০২৬ তাৰিখে দিল্লী উচ্চ ন্যায়ালয়ৰ কাষ চাপে। ন্যায়ালয়ৰ প্ৰক্ৰিয়াৰ জৰিয়তে পোহৰলৈ আহে যে অন্ধ্ৰ প্ৰদেশৰ আৰক্ষী সঞ্চালক প্ৰধান আৰু অপৰাধ তদন্ত বিভাগৰ নিৰ্দেশতেই এই অৱৰোধ কৰা হৈছিল। আটাইতকৈ উদ্বেগজনক দিশটো হ’ল অৱৰোধৰ আদেশত ভেমিৰেড্ডি প্ৰভাকৰ ৰেড্ডি নামৰ এজন ব্যক্তিৰ নাম উল্লেখ কৰা হৈছে, যাৰ সৈতে এই সাংবাদিক দুগৰাকীৰ বা ভিডিঅ’টোৰ কোনো সম্পৰ্ক নাই।
এই কাৰ্যই তথ্য প্ৰযুক্তি নিয়ম, ২০২১-ৰ উলংঘন কৰাৰ লগতে ভাৰতৰ সংবিধানে প্ৰদত্ত বাক আৰু মত প্ৰকাশৰ স্বাধীনতা ক্ষুণ্ণ কৰিছে বুলি দাবী কৰি ইণ্টাৰনেট ফ্ৰিডম ফাউণ্ডেচনৰ আইনী দলে অন্ধ্ৰ প্ৰদেশৰ গৃহ বিভাগৰ প্ৰধান সচিব আৰু আৰক্ষী সঞ্চালক প্ৰধান, অপৰাধ তদন্ত বিভাগলৈ আইনী জাননী প্ৰেৰণ কৰিছে। প্ৰেৰিত জাননীত তথ্য প্ৰযুক্তি নিয়ম অনুসৰি এই বিষয়ৰ পুনৰীক্ষণ কৰা, সাংবাদিক দুগৰাকীক শুনানিত অংশগ্ৰহণৰ সুযোগ প্ৰদান কৰা আৰু নিষেধাজ্ঞা প্ৰত্যাহাৰ কৰি ভিডিঅ’টো পুনৰ মুকলি কৰাৰ দাবী জনোৱা হৈছে।
