গুৱাহাটীৰ নেমকেয়াৰ হাস্পতালত কৰ্তব্যৰত অৱস্থাতে এজন আই চি ইউ চিকিৎসকৰ মৃতদেহ উদ্ধাৰ হোৱা ঘটনাই চাঞ্চল্যৰ সৃষ্টি কৰিছে। বুধবাৰে হাস্পতালখনৰ নতুন ভৱনৰ দ্বিতীয় মহলাৰ এটা কক্ষৰ ভিতৰত চিকিৎসকজনক অচেতন অৱস্থাত উদ্ধাৰ কৰা হয়।
মৃত চিকিৎসকজনক ডাঃ প্ৰয়াশ সিংঘল বুলি চিনাক্ত কৰা হৈছে। তেওঁ হাস্পতালখনৰ নতুন ভৱনত থকা Intensive Care Unit (ICU)-ত কৰ্তব্যৰত আছিল। কৰ্তব্যৰত অৱস্থাত তেওঁক কক্ষটোৰ ভিতৰত অচেতন হৈ থকা দেখা পোৱাৰ পাছতে হাস্পতালৰ কৰ্মচাৰীয়ে বিষয়টো কৰ্তৃপক্ষক অৱগত কৰে।
খবৰ লাভ কৰাৰ পাছতে ভঙাগড় আৰক্ষী থানাৰ এটা দল নেমকেয়াৰ হাস্পতালত উপস্থিত হয়। আৰক্ষীয়ে ঘটনাস্থলীত প্ৰাথমিক তদন্ত আৰম্ভ কৰাৰ লগতে চিকিৎসকজনৰ মৃত্যুৰ আঁৰৰ পৰিস্থিতি সম্পৰ্কে তথ্য সংগ্ৰহ কৰি আছে।
জানিব পৰা মতে, ডাঃ প্ৰয়াশ সিংঘলে প্ৰায় ছয় মাহ পূৰ্বে নেমকেয়াৰ হাস্পতালত যোগদান কৰিছিল। তেওঁ কিছুদিন ধৰি মানসিক চাপত ভুগি থকাৰ সম্ভাৱনা থকা বুলি একাংশ সূত্ৰই জানিবলৈ দিছে। অৱশ্যে তেওঁৰ মৃত্যুৰ প্ৰকৃত কাৰণ এতিয়াও নিশ্চিত হোৱা নাই।
আৰক্ষীয়ে ঘটনাটো সন্দৰ্ভত প্ৰাথমিক তদন্ত অব্যাহত ৰাখিছে। চিকিৎসকজনৰ মৃত্যুৰ সঠিক কাৰণ তদন্ত সম্পূৰ্ণ হোৱাৰ পাছতহে স্পষ্ট হ’ব। ঘটনা সন্দৰ্ভত অধিক তথ্যৰ বাবে আৰক্ষীৰ তদন্তৰ ফলাফললৈ অপেক্ষা কৰা হৈছে।
