চুম্বন মানে কেৱল প্ৰেমৰ প্ৰকাশ নহয়, ই মানসিক চাপ কমোৱাৰ লগতে শৰীৰ আৰু মনকো শান্তি দিব পাৰে বুলি বহু গৱেষণাত উল্লেখ কৰা হৈছে। জাৰ্মান মনোবিদ আৰ্থাৰ জাবোৰ পুৰণি এক গৱেষণাৰ জৰিয়তে চুম্বন আৰু দীৰ্ঘায়ুৰ মাজত থকা সম্ভাৱ্য সম্পৰ্কৰ ওপৰত দৃষ্টি আকৰ্ষণ কৰিছিল। সেই গৱেষণাক আধাৰ কৰি এতিয়া ছ’চিয়েল মিডিয়াত দাবী কৰা হৈছে যে প্ৰতিদিনে ২২ মিনিট চুম্বন কৰিলে আয়ুস ৭ বছৰ পৰ্যন্ত বৃদ্ধি পাব পাৰে।
জাবোৰে যোৱা শতিকাৰ আশীৰ দশকত প্ৰকাশ কৰা এক গৱেষণাপত্ৰত দাবী কৰা হৈছিল যে যিসকল পুৰুষে পুৱা কামলৈ ওলাই যোৱাৰ আগতে পত্নীক চুম্বন কৰিছিল, তেওঁলোকে চুম্বন নকৰা পুৰুষৰ তুলনাত গড়ে প্ৰায় ৫ বছৰ অধিক জীয়াই আছিল। অৱশ্যে সময়ৰ লগে লগে এই দাবী ছ’চিয়েল মিডিয়াত সলনি হৈ ৫ বছৰৰ ঠাইত ৭ বছৰ আৰু সাধাৰণ পুৱা চুম্বনৰ ঠাইত প্ৰতিদিনে ২২ মিনিট চুম্বনৰ কথা প্ৰচলিত হৈছে।
সেয়ে ২২ মিনিট চুম্বন কৰিলে নিশ্চিতভাৱে আয়ু ৭ বছৰ বৃদ্ধি পাব বুলি কোৱাটো বৈজ্ঞানিকভাৱে যথেষ্ট সাৱধানতাৰে চাবলগীয়া বিষয়। দাবীটো মূল গৱেষণাৰ তথ্যক সময়ৰ সৈতে অতিৰঞ্জিত কৰি উপস্থাপন কৰা হৈছে বুলি ধৰা হয়। তথাপি, ঘনিষ্ঠতা আৰু শৰীৰ-মনৰ ওপৰত ইতিবাচক প্ৰভাৱ থাকিব পাৰে বুলি বিজ্ঞানীসকলে বিভিন্ন সময়ত উল্লেখ কৰিছে।
নিয়মিত চুম্বনৰ সময়ত শৰীৰত আনন্দ আৰু স্বস্তিৰ সৈতে জড়িত কিছুমান হৰম’ন নিঃসৃত হয়। ইয়াৰ ফলত মানসিক চাপ কিছু পৰিমাণে কমিব পাৰে আৰু মন ভাল হৈ থকাত সহায় কৰিব পাৰে। প্ৰিয়জনৰ সৈতে ঘনিষ্ঠ সম্পৰ্কই মানুহক অধিক সুখী কৰি তোলাৰ লগতে স্বাস্থ্যকৰ জীৱনশৈলী বজাই ৰখাতো উৎসাহ যোগাব পাৰে।
চুম্বনৰ আন কিছুমান সম্ভাৱ্য শাৰীৰিক উপকাৰিতাৰ কথাও গৱেষণাত আলোচনা কৰা হৈছে। ইয়াৰ ফলত ৰক্তচাপ কিছু সময়ৰ বাবে কমিব পাৰে আৰু মানসিক চাপৰ সৈতে জড়িত উত্তেজনাও হ্ৰাস পাব পাৰে। চুম্বনৰ সময়ত লেলাৱটিৰ আদান-প্ৰদান হয়, যাৰ জৰিয়তে মুখগহ্বৰত নতুন অণুজীৱৰ সংস্পৰ্শ ঘটে। কিছুমান বিজ্ঞানীৰ মতে, এই প্ৰক্ৰিয়াই শৰীৰৰ ৰোগ প্ৰতিৰোধ ক্ষমতাক নতুন অণুজীৱ চিনাক্ত কৰাত এক ধৰণৰ প্ৰাকৃতিক অনুশীলন দিয়ে।
অৱশ্যে চুম্বনক কোনো চিকিৎসা বা আয়ুস বৃদ্ধিৰ নিশ্চিত উপায় হিচাপে গণ্য কৰিব নোৱাৰি। ৫ বছৰ, ৭ বছৰ বা ২২ মিনিটৰ নিৰ্দিষ্ট সংখ্যাতকৈ গুৰুত্বপূৰ্ণ কথাটো হৈছে মানুহৰ মাজৰ মৰম, ঘনিষ্ঠতা আৰু সুস্থ সম্পৰ্ক। অৰ্থাৎ হাতত ষ্টপৱাচ লৈ সময় গন্তি কৰাৰ প্ৰয়োজন নাই; প্ৰিয়জনৰ সৈতে আন্তৰিকভাৱে কটোৱা সময়েই হয়তো মন আৰু শৰীৰ দুয়োটাৰে বাবে অধিক মূল্যৱান।
