ঋণৰ টকা সময়মতে পৰিশোধ কৰিব নোৱাৰাৰ বাবে এগৰাকী যুৱতীক কাপোৰ খুলি নিৰ্যাতন কৰাৰ অভিযোগক লৈ তীব্ৰ চাঞ্চল্যৰ সৃষ্টি হৈছে বেংগালুৰুত। অভিযোগ অনুসৰি, ঋণদাতা সকলে যুৱতীগৰাকীক এটা ঘৰত আবদ্ধ কৰি নিৰ্যাতনৰ দৃশ্য ভিডিঅ’ কৰি ৰাখিছিল। সেই ভিডিঅ’ ৰাজহুৱা কৰি দিয়াৰ ভাবুকিও দিয়া হৈছিল বুলি জানিব পৰা গৈছে। এই ঘটনাৰ সৈতে জড়িত থকাৰ অভিযোগত আৰক্ষীয়ে দুগৰাকী মহিলাসহ মুঠ চাৰিজন লোকক গ্ৰেপ্তাৰ কৰিছে।
জানিব পৰা মতে, প্ৰায় দুবছৰ পূৰ্বে নিৰ্যাতিতা যুৱতীগৰাকীয়ে ৰেশমা নামৰ এগৰাকী মহিলাৰ পৰা ১ লাখ টকা ঋণ লৈছিল। সেই ধনৰ বিপৰীতে তেওঁ অধিক সুদ দিবলগীয়া হৈছিল। কিন্তু বিগত প্ৰায় ছয় মাহ ধৰি তেওঁ কোনো ধন পৰিশোধ কৰিব পৰা নাছিল। আনহাতে, নাজৰত নামৰ আন এগৰাকী মহিলাৰ পৰাও যুৱতীগৰাকীয়ে ৫০ হাজাৰ টকা ধাৰ লৈছিল। সেই ঋণৰ বিপৰীতে প্ৰতি সপ্তাহে ৫ হাজাৰ টকা সুদ দিব লাগিছিল। কিন্তু বিগত চাৰি সপ্তাহ ধৰি সেই ধনো পৰিশোধ কৰিব পৰা নাছিল যুৱতীগৰাকী।
এই পৰিস্থিতিৰ মাজতে নাজৰতে যুৱতীগৰাকীক নিজৰ ঘৰলৈ মাতি পঠিয়াইছিল। তেওঁ যুৱতীগৰাকীক চাকৰি দিয়াৰ প্ৰতিশ্ৰুতি দিছিল বুলি অভিযোগ উঠিছে। কিন্তু পিছত এই প্ৰতিশ্ৰুতিয়েই ‘ফান্দ’ত পৰিণত হয় বুলি যুৱতীগৰাকীয়ে অভিযোগ কৰে। তেওঁৰ দাবী অনুসৰি, তেওঁক এখন অট’ৰিক্সাত বহুৱাই জোৰকৈ এটা ঘৰলৈ লৈ যোৱা হৈছিল।
অভিযোগ অনুসৰি, সেই সময়ত ৰেশমা আৰু নাজৰতৰ সৈতে তেওঁলোকৰ দুই সহযোগী ছুহেল আৰু ছাইফো উপস্থিত আছিল। বেংগালুৰুৰ ওচৰৰ এটা ঘৰত যুৱতীগৰাকীক কাপোৰ খুলিবলৈ বাধ্য কৰি নিৰ্যাতন চলোৱা হৈছিল। কেৱল সেয়াই নহয়, সমগ্ৰ ঘটনাটো ভিডিঅ’ কৰি ৰখা হৈছিল আৰু ভৱিষ্যতে ঋণৰ ধন পৰিশোধ নকৰিলে সেই ভিডিঅ’ ৰাজহুৱা কৰি দিয়াৰ ভাবুকি দিয়া হৈছিল। পিছত যুৱতীগৰাকীক সেই ঘৰটোতে আবদ্ধ কৰি ৰখা হৈছিল ।
ইফালে, যুৱতীগৰাকী সন্ধানহীন হোৱাৰ পিছত তেওঁৰ মাতৃয়ে আৰক্ষীৰ কাষ চাপি অভিযোগ দাখিল কৰে। অভিযোগৰ ভিত্তিত আৰক্ষীয়ে তদন্ত আৰম্ভ কৰি অৱশেষত যুৱতীগৰাকীৰ সন্ধান উলিয়ায় আৰু তেওঁক উদ্ধাৰ কৰে। ঘটনাটোৰ সম্পূৰ্ণ তদন্ত অব্যাহত আছে।
আৰক্ষীয়ে ইতিমধ্যে ৰেশমা, নাজৰত, ছুহেল আৰু ছাইফক গ্ৰেপ্তাৰ কৰিছে। তেওঁলোকক জেৰা কৰি ঘটনাটোৰ আঁৰত আৰু কোনো লোক জড়িত আছে নেকি, সেই বিষয়েও তদন্ত চলাই আছে আৰক্ষীয়ে। ঋণৰ ধন আদায়ৰ নামত এগৰাকী যুৱতীৰ সৈতে সংঘটিত হোৱা এই ভয়ংকৰ ঘটনাই বেংগালুৰুত ব্যাপক চাঞ্চল্যৰ সৃষ্টি কৰিছে।
